ވެރިކަމާއި ހަވާލުވެ ފުރަތަމަ ދުވަހުވެސް ރާއްޖޭގައި ތިބި އިންޑިއާގެ ސިފައިން ރާއްޖެއިން ފައިބަން ދަންނަވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ގަލޮޅު ދެކުނު ޖަގަހަ ހުޅުވުމަށް ބޭއްވި ހަފްލާގައި ވާހަކަ ދައްކަވަމުން މުއިއްޒު ވިދާޅުވީ ހޮނިހިރު ދުވަހުގެ ވޯޓުގައި ދިވެހިންގެ ކުރިމަތީގައި އޮތް އެންމެ ބޮޑު ސުވާލަކީ މިނިވަންކަމުގެ ސުވާލު ކަމަށެވެ. މިއަދު މިނިވަން ކަމަކީ ގަނޑެއްގައި ލިޔެފައި އޮތް ހިސާބުގައި އެކަނި އޮތްކަމަށް ވެފައިވާކަމަށް މުއިއްޒު ވިދާޅުވިއެވެ. މިއަދު އަމިއްލަ އެދުންތައް އެއްކައިރިކޮށް ވަށައިގެން ހިނގާ ކަންކަމާއިމެދު ވިސްނައި ޤައުމުގެ ޅަދަރީންނާއިމެދު ވިސްނައި ނަންބަރު 4 އަށް ވޯޓު ދެއްވުމަށް މުއިއްޒު ވަނީ އެދިވަޑައިގެންފައެވެ.
އެމްޑީޕީ މީހަކަށްވީ ދިވެއްސަކަށް ވެފަ. މި ރާއްޖެއަކީ ދިވެހިންގެ ރާއްޖެއަކަށް ހަދަންޖެހޭ. އަޅުގަނޑު ޔަގީން ކަމާއިއެކީ މިދަންނަވަނީ މިކަން ހުއްޓުވައި މިނިވަންކަން ދަމަހައްޓާނަން. އަޅުގަނޑުމެންގެ ކަނޑު އަޑިއާއި، ބިމާއި ފަޅު ވިއްކާލާކަަށް ޖާގައެއް ނުދޭނަން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ މިއަދު ލީކުވެފައިވާ ސިޓީއަކީވެސް ދިވެހިން ނުހަނު ވިސްނަންޖެހޭ ސިޓީއެއް ކަމަށެވެ. ހަނިމާދޫ އެއާޕޯޓާއިއެކީ 15 ހެކްޓަރުގެ ބިން 90 އަހަރަށް އަދި އައްޑޫ ގަމުގެ އެއާޕޯޓާއިއެކީގައި 99 އަހަރަށް ބިން ދޭން ނިންމާފައިވާކަމަށެވެ. ހަމަ މިއާއިއެކު ރާއްޖޭގެ ކަނޑުއަޑީގެ ސާވޭވެސް މިހާރު ޖެހެނީ އިންޑިއާއިން ގަންނަންކަމަށް މުއިއްޒު ވިދާޅުވިއެވެ.
ރާއްޖޭގެ ކަނޑު އަޑީގެ ސާވޭ ރާއްޖެއިން ގަންނަން ޖެހެނީ އިންޑިޔާއިން ގަންނަން. މިހާ ނުބައި އެގްރީމަންޓް ހަދައިގެން މިމީހުން މިތިބީ. މިގޮތް އޯކޭ ކޮށްގެން ނުތިބެވޭނެ. ކަނޑުން ބޮޑުބައެއް ވިއްކާލީމަވެސް އަޅުގަނޑުމެންވީ އޯކޭ ވާންތޯ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ޤައުމުގެ މިނިވަންކަން ނެތި ކޮށްދެވޭނެ ތަރައްޤީއެއް ނޯންނާނެކަމަށެވެ. ތަރައްޤީއަކީ ރައްޔިތުން އަބަދު ބޭނުންވާ ކަމަކަށްވާއިރު މިނިވަންކަން އޮވެގެން ނޫނީ ތަރައްޤީ ނުކުރެވޭނެކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ މިސަރުކާރަށް ނުދެވުނު ބޯހިޔާވަހިކަމާއި، ގެދޮރާއި، އިޖުތިމާއީ ރައްކާތެރިކަން ކަށަވަރު ކޮށްދޭނީ ޕީޕީއެމް/ޕީއެންސީީގެ ސަރުކާރުގައި ކަމަށެވެ.
