ރިޔާސީ އިންތިޚާބުގެ ކެމްޕޭންގައި ކެމްޕޭން ކުރަން ލިބުނު މަދު ދުވަސްކޮޅުގެ ތެރޭގައި، މިހާތަނަށް 150 އަށްވުރެ ގިނަ ރަށަށް ދެވުނުއިރު ކޮންމެ ރަށަކުންވެސް އަޑުއިވުނު ވާހަކައަކީ މިސަރުކާރު ބަދަލުކޮށް ދިނުމުގެ އާދޭސް ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބުގައި ޑރ. މުއިއްޒާއި، ސެމްބެއަށް އަތޮޅު ތެރޭގައި ކެމްޕޭން ކުރަން ލިބުނީ 28 ދުވަހެވެ. މި ދުވަސްތަކުގައި ވީހާވެސް ގިނަ ރަށްތަކަށް ވަޑައިގެން ރައްޔިތުންގެ އިހުސާސްތައް އަޑުއެހުމަށް ވަނީ މަސައްކަތް ކޮށްފައެވެ. "ޚަބަރު އޮންލައިން" އަށް ދެއްވި ޚާއްސަ އިންޓަރވިއުއެއްގައި ޑރ. މުއިއްޒު ވިދާޅުވީ ކެމްޕޭންގައި ހުރިހާ ރަށަަކަށް ދާން ވަރަށް ބޭނުންވި ކަމަށެވެ. ނަމަވެސް ވަގުތު ތަންދިން އެންމެ ގިނަ އަދަދެއްގެ ރަށްތަކަށް ވަޑައިގެން ރައްޔިތުންނާއި ބައްދަލު ކުރެއްވި ކަމަށެވެ.

މުއިއްޒު ވިދާޅުވީ ވަޑައިގެންނެވި ކޮންމެ ރަށަކުން ފެންނަނީ މިސަރުކާރު ބޮޑުތަނުން ފެއިލްވެފައިވާ މަންޒަރު ކަމަށެވެ. ތަރައްޤީގެ ނަމުގައި ކުރި ކަމެއް ރައްޔިތުންނަށް ފައިސާ ހުރި މަސައްކަތެއް ނެތްއިރު، ރަށްރަށުގައި އެންމެ އާދައިގެން އަސާސީ ކަންކަންވެސް ވެފައި ނެތްކަމަށް މުއިއްޒު ވިދާޅުވިއެވެ.

ހުރިހާ ރަށަކުންވެސް ފެންނަނީ މިސަރުކާރުގެ ފެއިލިޔާ. މާޔޫކަން ފެންނަނީ. ބޮޑެތި ކަންކަން ކީއްކުރަންތީ ކުދި ކުދި، އާދައިގެ ކަންކަންވެސް ނުވޭ. މިސްކިތު ފުރާޅުން ފެން ފޭބުން، މަލަން ކޮޅެއް ނެތުން މިފަދަ އެތައް ކަމެއް. ރައްޔިތުން ބޭނުންވަނީ އިނަފްއީސް އިނަފް އަޅުގަނޑާއިއެކު ކުރިއަށްދާން ބޭނުންވަނީ. އެއީ އަޅުގަނޑަށް އަޑު އިވުނު ވާހަކައަކީ.

– މުއިއްޒު ވިދާޅުވިއެވެ.

މުއިއްޒު މިއަދާއި މާދަމާ މާލެ ސަރަހައްދުުގެ ކެމްޕޭންގައި އިސްކޮށް ހަރަކާތްތެރިވާއިރު، ސެމްބެ ގެންދަވަނީ އިތުރުގެ ރަށްތަކުގައި ހަރަކާތްތެރި ވަމުންނެވެ. އަދި ރާއްޖޭގެ އެކި ކަންކޮޅު ތަކުގައި ޕީޕީއެމް/ޕީއެންސީގެ ލީޑަރޝިޕްގެ ބޭފުޅުން ތިއްބެވީ ކެމްޕޭންގައެވެ.

މުއިއްޒު ވިދާޅުވީ އިންތިޚާބަށް މިސަރުކާރުން އިންތިހާއަށް ނުފޫޒު ފޮރުވަމުންދާކަމަށެވެ. އަރާ ފައިބާ ރަށަށް ސަރުކާރުން ފައިސާއާއި، ވަޒީފާތަކާއި ތަކެތި ގެންގޮސް ރައްޔިތުންނަށް ހުށަހަޅަމުންދާކަމަށެވެ. މުއިއްޒު ވިދާޅުވީ ކިނަމެ ވަރަކަށް ނުފޫޒު ފޯރުވުމަށް މަސައްކަތް ކުރި ނަމަވެސް އެކަމަށް އިޖާބަ ނުދިނުމަކީ ޤައުމަށްޓަކައި ކޮށްދެވޭނެ އެންމެ ނުހިންމު ކަންތައް ކަމަށެވެ. މުއިއްޒުވަނީ ވީހާވެސް ހެނދުނާ ގޮސް ވޯޓުގެ ކަންކަން ނިންމުމަށް އެދިވަޑައިގެންފައެވެ.

ވީހާވެސް ހެނދުނާ ގޮސް ރައްޔިތުން ވޯޓުލާން އަޅުގަނޑު އިލްތިމާސް ކުރަން. މެންދުރުގެ ކުރިން ވޯޓުގެ ކަންކަން ނިންމުމަކީ އިންތިޚާބުގައި މަކަރު ހަދަން ލިބޭނެ ޖާގަ ކުޑަވާނެ ކަމެއް. ސަރުކާރުން އުޅެނީ ވޯޓުގެ ވަގުތު 4 ޖެހުމުން ހަމަވުމުން ދެން ވަގުތު އިތުރުކޮށް ވޯޓު ގަޑުބަޑު ކުރަން. އެޖާގަ ދީގެން ނުވާނެ މިފަހަރު.

– މުއިއްޒު ވިދާޅުވިއެވެ.

މުއިއްޒު ވިދާޅުވީ މިއީ މިނިވަންކަމައި ސިޔާސަތު އިސްތިގުލާލުގެ ދިފާއުގައި ދިވެހިން ކުރަންޖެހޭ ވަރަށް ބޮޑު ޖިހާދެއް ކަމަށެވެ. މި އިންތިޚާބުގައި ދެވޭ ކޮންމެ ވޯޓަކީ ޤައުމުގެ މިނިވަންކަމާއި ސިޔާސަތަށްޓަކައި ދެވޭ މިނިވަންކަމުގެ ވޯޓެއްކަމަށް މުއިއްޒު ވިދާޅުވިއެވެ.