ވެރިކަމާއި ހަވާލުވެ ފުރަތަމަ ދުވަހު ރައީސް ޔާމީން ގެޔަށް ބަދަލު ކުރާނެކަމަށާއި، އަދި ވެރިކަމުގެ ދައުރު ފުރިހަމަ ކުރައްވާނީ ޕީޕީއެމް/ޕީއެންސީ ކޯލިޝަންގެ ބަދަހި ކަމާއިއެކުގައި އެއްބައެއްގެ ގޮތުގައި ތިބެގެންކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން ވާދަކުރައްވާ ޑރ. މުއިއްޒު "ޚަބަރު އޮންލައިން" އަށް ދެއްވި ޚާއްސަ އިންޓަރވިއުއެއްގައި ވިދާޅުވީ ޕީޕީއެމް/ޕީއެންސީގެ ޢާންމު މެމްބަރުންނާއި ރާއްޖޭގެ އެތައް ހާސް ރައްޔިތުން ރައީސް ޔަމީން މިނިވަންކުރުމަށް ގޮވާލަމުން ދާކަމަށެވެ. އެމަަނިކުފާނަށް ކޮށްފައިވާ ހުކުމަކީ ޖުޑީޝަރީއަށް ސީދާ ރައީސް އޮފީސް މެދުވެރިވެގެން ނުފޫޒު ފޯރުވައިގެން ކޮށްފައިވާ ހުކުމެއްކަމަށެވެ.

ވެރިކަމާއި ހަވާލުވެ ފުރަތަމަ ދުވަހަކީ ޖުޑީޝަރީގެ ނުފޫޒު ރައީސް އޮފީސް ތެރޭގައި އޮތް އޮތުން ނިމުމަކަށް ގެނެސް ރައީސް ޔަމީން ގެޔަށް ބަދަލު ކުރައްވާނެ ދުވަސްކަމަށް މުއިއްޒު ވިދާޅުވިއެވެ. ރައީސް ޔާމީނަށް ކުރަމުންދާ އަނިޔާތަކީ ނުހައްގު އަނިޔާތަކެއްކަމަށް މުއިއްޒު ތަކުރާރުކޮށް ވަނީ ވިދާޅުވެފައެވެ.

މިނިވަން ޖުޑީޝަރީއެއް ޑޭވަން އިން ފެށިގެން އަޅުގަނޑު ޤާއިމް ކުރަން މަސައްކަތް ކުރާނަން. ފުރަތަމަ ދުވަަކީވެސް ޖުޑީޝަރީއަށް ހަމަނޭވާ ލެވޭނެ ދުވަހަކަށް ވާނެ. ރައީސް ޔަމީން އެދުވަހުވެސް އިރާދަކުރެއްވިއްޔާ މިނިވަން ވާނެ. ރައީސުލްޖުމްހޫރިއްޔާއަކަށް ހުންނަ މީހަކަށް ލިބޭ ފުރުސަތެއް ޖަލުގަ ހުންނަ މީހަކު ގެޔާއި ހަމައަށް ގެނައުން. އެންމެ ކުޑަމިނުން ފުރަތަމަ ދުވަހުވެސް އެމަނިކުފާނު ގެޔާއި ހަމައަށް ގެނެސް އިރާދަ ކުރެއްވިޔާ ފުރަތަމަ ދުވަހަކީވެސް މިނުފޫޒާއި ބާރުވެރިކަން ހުއްޓުވައި އެމަނިކުފާނު މިނިވަން ކުރާނަން. މުއިއްޒު ވިދާޅުވިއެވެ.

އަޅުގަނޑުގެ ފަރާތުން ތިކަމަށް އޮތީ 100 ޕަސެންޓް ޔަގީންކަން. އަޅުގަނޑު މިއަންނަނީކީ ވަކި މީހަކަށް ވަކިބަޔަކަށް ވެރިކަން ކުރާކަށްނޫން. އަޅުގަނޑު މިކުރިމަތިލަނީ ދިވެހި ކޮންމެ ރައްޔިތަކަށް އަޅުގަނޑުގެ ފަރާތުން ޚިދުމަތް ދިނުމަށްޓަކައި. ކޮންމެ ދިވެހި ރައްޔިތެއްގެ ރައީސަކަށް ވާންވެގެން. ވަކި ޕާޓީއަކަށް ވަކި ތަފާތު ކުރުމެއް ގެންގުޅޭކަށް ނޫން. ހަމަހަމަ ގޮތުގައި ކޮންމެ ސިޔާސީ ޕާޓީއެއްގެ ފިކުރުގެ މީހަކަށްވެސް އެއީ ދިވެހި ރައްޔިތެއްވީމަ ހަމަހަމަ ކަމާއިއެކު ޚިދުމަތް ކުރަން މިއަންނަނީ.

– މުއިއްޒު ވިދާޅުވިއެވެ.

2008 އިން ފެށިގެން މިހާތަނަށް ރާއްޖޭގައި އުފެދުނު ސަރުކާރުތަކުގެ މައި ޕާޓީ ތެރޭގައި އުފެދޭ ޚިޔާލް ތަފާތުވުންތަކާއިއެކު ޕާޓީ ރޫޅި ބޮޑެތި ޚިޔާލް ތަފާތުވުން އުފެދުނު ނަމަވެސް މުއިއްޒު ދެއްވި އެންމެ ބޮޑު ޔަގީންކަމަކީ ޕީޕީއެމް/ޕީއެންސީ ރޫޅާ ނުލެވޭނެ ކަމުގެ ޔަގީންކަމަށެވެ. މުއިއްޒު ވިދާޅުވީ ޕީޕީއެމް/ޕީއެންސީ އޮތީ ވަރަށް ބަދަހިކޮށް އެކީގައިި ވެރިކަމުގެ ދައުރު ފުރިހަމަ ކުރަން ކަމަށެވެ. އަދި ވަޑައި ގަންނަވަނީ ވަކި ޕާޓީއަކަށް ވަކި މީހަކަށް ވެރިކަން ކޮށްދެއްވަން ނޫންކަމަށާއި ޚިދުމަތް ކުރައްވާނީ ދިވެހި ހުރިހާ ރައްޔިތުންނަށް ކަމަށް މުއިއްޒު ވިދާޅުވިއެވެ.

އަޅުގަނޑުގެ ޔަގީންކަން އޮތީ އަޅުގަނޑުމެން ޕާޓީ، ޕީޕީއެމް/ޕީއެންސީ ކޯލިޝަނަކީ މިބަދަހިކަން މިއިސްނެގުން މިގޮތުގަ ހުރިއްޔާ މިރަހުމަތްތެރިކަން މިއެކުވެރިކަން ގުޅިގެން އެންމެން އެކީގައި އުޅުމުގެ ވިސްނުމާއި، މިގޮތަށް ކުރިއަށްދާ އަޅުގަނޑު ބޭނުންވާ ބޭނުންވުމުގެ ސަބަބުން އަޅުގަނޑުމެންނަށް އެކީގައި ކުރިއަށް ދެވޭނެ. އަދި އެއްވެސް ކަހަލަ ބައިބައި ވުމެއް ނައިސް އަޅުގަނޑުމެންނަށް ކުރިއަށް ދިއުމުގައި މިޤައުމު އިސްކޮށް މިޤައުމުގައި ހުރި ބޮޑެތި މައްސަލަތައް ހައްލު ކުރަން ބޭނުންވަނީ. އަޅުގަނޑު އެއްވެސް ކަންބޮޑުވުމެއް އޮތްކަމެއް ނޫންމިއީ. އަޅުގަނޑު މިއަންނަނީ ވަކި ސެކްޓާ އަކަށް ވަކި ޕާޓީއަކަށް އިސްކޮށް ކަންތައްތައް ކޮށްދޭ ކަށްނޫން.

– މުއިއްޒު ވިދާޅުވިއެވެ.

މުއިއްޒު ވިދާޅުވީ މިހާތަނަށް ސިޔާސީ ޕާޓީތަކުގެ ތެރޭގައި އަދި އިސް ލީޑަރުންގެ މެދުގައި މައްސަލަތައް އެފެދި ޕާޓީތައް ބައިބައިވީ ސިޔާސީ ގޮތުން އަމިއްލަ މަންފާތަކާއިހެދި އުޅުމުންކަމަށެވެ. ނަމަވެސް ދެން އުފެދޭ ޕީޕީއެމް/ޕީއެންސީގެ ސަރުކާރުގައި މިފަދަ އެދުންތަކުން އެއްކިބާކޮށް އެއްބައި ވަންތަ ކަމާއިއެކު ޤައުމަށް ޚިދުމަތްކުރާ ޤައުމަށް ހެޔޮ ވެރިކަމެއް ގެނެސް ދެއްވާނެކަމަށް ޑރ.މުއިއްޒު ވިދާޅުވިއެވެ.