މައިންބަފައިންގެ ހައްގުތަކަށް ރައްކާތެރި ވުމަށާއި، މައިންބަފައިންނަކީ ސުވަރުގޭގެ އެންމެ މާތް ދޮރުކޮޅު ކަމުގައި މިއަދުގެ ހުކުރު ޚުތުބާގައި ބުނެފިއެވެ.
"މައިންބަފައިންނަކީ ސުވަރުގޭގެ ދޮރުކޮޅުތަކެއް" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މާތް ރަސްކަލާނެ އަށާއި، ކީރިތި ރަސޫލާ އަށް އަދާކުރަން ޖެހޭ ހައްގުތަކަށް ފަހު، ދެން މުސްލިމުންގެ މައްޗަށް އެންމެ އިސް ހައްގަކީ، މައިންބަފައިންނަށް އަދާކުރަންޖެހޭ ހައްގުތައްކަމަށެވެ. ކީރިތި ޤުރުއާނާއި، ރަސޫލާގެ ސުންނަތުގައި ވެސް އެކަމަށް ބާރުއަޅުއްވާފައިވާއިރު، ޝަރުއީ ނައްސުތަކުގައި މައިންބަފައިންނަށް ކިޔަމަންގަތުމަށް އަމުރުކުރައްވައި، އެބައިމީހުންނަށް އުރެދުމުގެ ނުބައިކަން ބަޔާންކުރައްވާފައި ވާކަމަށްވެސް ޚުތުބާގައި ބުނެފައިވެއެވެ.
ހަމަ އެހެންމެ ޝަރުއީ ނައްސަތުތަކުގައި ވެސް މައިންބަފައިންނަށް ކިޔަމަން ގަތުމަށް އަމުރުކުރައްވައި އެބައިމީހުންނަށް އުރެދުމުގެ ނުބައިކަން ބަޔާންކުރައްވާފައިވާ ކަމަށް ހުތުބާގައި ވެއެވެ. ހުތުބާގައި ވިދާޅުވީ މާތް ރަސްކަލާންގެ ކަމެއް ކަނޑައެޅުއްވުމުގެ މާނައަކީ އެކަމާ ބެހޭ ގޮތުން ނިޔާ އިއްވުން ކަމަށެވެ. އެހެންކަމުން އެ ނިޔާއަށް އަމަލުކުރުން ވާޖިބުވާނެ ކަމަށާއި އަދި އެކަމެއް ނުކޮށްފިނަމަ ފާފަވެރިވެސް ވާނެ ކަމަށެވެ.
މާތް ރަސްކަލާނގެ އަށް އަޅުކަން ކުރުމަށާއި މައިންބަފައިންނަށް ހެޔޮކޮށް ހިތުން ބަނދެލައްވާފައި ވަނީ އެއް ވާފަށަކުންނެވެ. މިކަމުން އެނގެނީ މައިންބަފައިންނަށް އަޅާލުމާއި އެ މީހުންނަށް ހެޔޮކޮށް ހިތުމުގެ މުހިންމު ކަމެވެ. އަދި އެ މީހުންނަށް އުރެދުމަކީ މާތް ރަސްކަލާންގެ ހަރާން ކުރައްވާފައިވާ ކަމެވެ.
– ހުތުބާގައި ވިދާޅުވެފައި ވެއެވެ.
މީގެ އިތުރުން، މައިންބަފައިންގެ ހައްގުތަކަށް ރައްކާތެރިވުމަކީ، ސުވަރުގެ ވަނުމަށް ހުޅުވިފައިވާ ދޮރެއް ކަމަށާއި، މައިންބަފައިންގެ ހައްގުތަކަށް ރައްކާތެރި ނުވުމަކީ، ސުވަރުގޭގެ އެ މަތިވެރި ނިޢުމަތުން މަހްރޫމް ވެގެންދާނެކަމެއް ކަމަށްވެސް ޚުތުބާގައ ބުނެފައިވެއެވެ.
މީގެ އިތުރުން ޚުތުބާގައި ބުނީ، މުސްކުޅި މައިންބަފައިންނާއިއެކު އެއް ގެއެއްގައި އުޅުމަކީ، ދަރިންނަށް މިއަދު ހުތުރު ކަމަކަށް ވެފައިވާކަމަށާއި، މުސްކުޅި މައިންބަފައިން ނުކުޅެދޭ މީހުންނަށް ހާއްސަ ހިޔާވަހިތަކުގައި ބައިތިއްބަން ދަރިން ބޭނުންވާކަމަށެވެ. މިއީ ބައެއްގެ ފާސިދު ސަގާފަތުގައި ޖެހި، އާޝޯހުވެ، އާވާރާވެ ތިބެ ދަރިން ކުރާކަމެއްކަންވެސް ޚުތުބާގައި ފާހަގަކުރިއެވެ. އަދި މިކަމަށް އޮތް ހައްލަކީ އިސްލާމީ ތަރުބިއްޔަތާއި، އިސްލާމީ ރިވެތި އަހްލާގާއި، އިސްލާމީ އަދަބާއި ސުލޫކު ކަމަށްވެސް ޚުތުބާގައި ބުނެފައިވެއެވެ.
