ދިވެހި ގައުމަށް ޣައްދާރުވާ މީހުންނަށް ހަރުކަށި އަދަބު ދިނުމަށް ރައްޔިތުންގެ މަޖިލިހަށް ގާނޫނެއް ހުށަހަޅުއްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިރޭ ވައުދުވެވަޑައިގެންފިއެވެ.
ކުރިއަށް އޮތް ރިޔާސީ އިންތިހާބުގެ ކެމްޕެއިނަށް ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުގައި ރ. ދުވާފަރަށް ވަޑައިގެން މުއިއްޒު ވިދާޅުވީ ދިވެހިންގެ މިނިވަންކަމާ ދޭތެރޭގައި ކޮމްޕްރޮމައިޒެއް ނުކުރެވޭނެ ކަމަށެވެ. އަދި ދިވެހިންގެ ސިޔާދަތީ ބާރު ދުލެއް ނުކުރެއްވޭނެ ކަމަށް ވެސް އޭނާ ވިދާޅުވިއެވެ. އެކަމަކު، މި ސަރުކާރުގެ ބައެއް ވެރިން މިނިވަންކަމާއި ސިޔާދަތު ގެއްލޭ ކަންކަން ކުރައްވާފައިވާ ކަމަށް އޭނާ ވިދާޅުވިއެވެ.
އަޅުގަނޑުމެންގެ ގައުމަކު އެހެން އެއްވެސް ގައުމެއްގެ ސިފައިންނަށް ނުތިބެވޭނެ. އަޑި ނޭނގޭ އެގްރީމެންޓްތަކެއް ހަދައިގެން އަޅުގަނޑުމެންގެ ގައުމުގެ ތެރެއަށް އެހެން ގައުމުގެ މީހުުން އައިސް އެއީ އެ ގައުމުގެ ސިފައިން ކަމަށްވަންޏާ ހަމައަކަށް އަޅުވަން ޖެހޭނެ.
– މުއިއްޒު ވިދާޅުވިއެވެ.
ގައުމުގެ މިނިވަންކަމަށް އަސަރު ކުރާނެ ކަންކަން ކުރައްވާ ނަމަ، އެއީ ގައުމަށް ޣައްދާރުވުން ކަމަށާއި އެކަމުގައި އަދަބު ދެވެން ޖެހޭނެ ކަމަށް މުއިއްޒު ވިދާޅުވިއެވެ. އެހެންވެ، އެއީ ކުށެއް ކަމަށް ކަނޑައަޅައި އެ ގާނޫނު މަޖިލިހަށް ހުށަހަޅުއްވާނެ ކަމަށް އޭނާ ވިދާޅުވިއެވެ.
މީގެއިތުރުން ހައްގު ނޫން ގޮތުގައި ހައްޔަރުކޮށް ބަންދު ކުރާ މީހުންނަށް ބަދަލު ނަގައި ދިނުމުގެ ގާނޫނެއް ވުޖޫދު ކުރައްވާނެ ކަމަށް މުއިއްޒު ވިދާޅުވިއެވެ. އަދި އެއްވެސް ހައްގަކާ ނުލައި ބަންދުކޮށްފައި ބޭތިއްބުމުން ބައެއް މީހުންނަށް ނާއިންސާފު އިންތިހާ އަށް ލިބޭ ކަމަށް ވިދާޅުވިއެވެ.
