ރިޔާސީ އިންތިޚާބު މިނިވަން ކަމާއި އިންސާފުވެރި ކަމާއިއެކު ބޭއްވުމުގެ ޤާނޫނީ ޒިންމާތައް އިލެކްޝަންސް ކޮމިޝަނަށް އަދާނުކުރެވޭތީ އިންތިހާއަށް ކަންބޮޑުވާ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ ތަރުޖަމާން މުހައްމަދު ތޮލާލް ވިދާޅުވެއްޖެއެވެ.
މިއަދު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތޮލާލް ވިދާޅުވީ ރިޔާސީ އިންތިޚާބަށް 10 ދުވަހަށް ވެފައިވާއިރު މިނިވަން އިންސާފުވެރި އިންތިޚާބެއް ބޭއްވުމަށް އީސީއަށް އެއްވެސް މަސައްކަތެއް ކުރެވޭ ތަނެއް ނުފެންނަކަމަށެވެ. ތޮލާލް ވަނީ ބައެއް މައްސަލަތައްވެސް ފާހަގަ ކޮށްފައެވެ. އެގޮތުން އިންތިޚާބުުގެ ވޯޓު ކަރުދާހުގައި ޕީޕީއެމްގެ ލޯގޯ ޑރ.މުއިއްޒުގެ ނަމާ ދިމާލުގައި ޖެހުމަށް އެދުމުން އެކަން ނުކޮށް ދިންކަމަށެވެ. ނަމަވެސް ވޯޓު ކަރުދާސް ޗާޕުކޮށް ނިންމުމަށްފަހު މިއަދު ބޭއްވި ކޮމިޝަންގެ ބައްދަލުވުމުގައި ކެންޑިޑޭޓަކު ބޭނުންވާ ލޯގޯއެއް ޖެހުމަކީ ކުރެވިދާނެ ކަމެއްކަމަށް ނިންމާފައިވާކަމަށެވެ. މިއީ ސީދާ ޕީއެންސީގެ ކެންޑިޑޭޓުގެ ހައްގަށް ލިބިގެންދާ އުނިކަމެއްކަމަށް ތޮލާލް ވިދާޅުވިއެވެ.
ތޮލާލް ވިދާޅުވީ ވަކި ގަލަމަކުން ފާހަގަ ޖެހުމަށް ބައެއް ކުންފުނިތަކުން މަސައްކަތް ކުރާކަމުގެ ކަންބޮޑުވުންވެސް އެބައޮތް ކަމަށެވެ. އަދި ވޯޓުލާ ބޫތުގައި ވަކި ނުފޫޒެއް ފޯރުވައިގެން ވޯޓުލާން ބާރުއަޅާކަންވެސް ފާހަގަވެފައިވާކަމަށެވެ. މިކަންކަން ސީދާ އިލެކްޝަނަށް ހުށަހަޅާފައިވާނެކަމަށް ތޮލާލް ވިދާޅުވިއެވެ.
ތޮލާލް ވިދާޅުވީ މާލޭގެ ބައެއް މަގުތަކުގައި ދަމާފައިވާ ބެނާތައްވެސް ނެގުމަށް ސަރުކާރުން އަންގަމުންދާކަމަށެވެ. އެގޮތުން މީގެ ކުރިން ގްރޫން ޒޯނުގައި ކެމްޕޭންތަކުގައި ބެނަ ދެމި ނަމަވެސް މިފަހަރު ބެނާތައް ގްރީން ޒޯނުގައި ދެމޭނީ އެމްއެންޑީއެފްއިން ހުއްދަ ދީގެންކަމަށް ސިޓީ ކައުންސިލަށް އަންގާފައިވާކަމަށެވެ. ނަމަވެސް މިއީ އެމްއެންޑީއެފްއިން ހުއްދަ ހޯދައިގެން ކުރަންޖެހޭ ކަމެއްކަމަށް ގަބޫލު ނުކުރައްވާކަމަށް ތޮލާލް ވިދާޅުވިއެވެ.
ތޮލާލް ވިދާޅުވީ މިނިވަން އިންސާފުވެރި އިންތިޚާބަކީ ބިރުދެއްކުމާއި، ނުފޫޒާއި، ތަޅާފޮޅުމެއް ނެތި ކުރިއަށް ދާންޖެހޭ އިންތިޚާބުތައް ކަމަށެވެ. ނަމަވެސް މިއިންތިޚާބު ބާއްވަން 10 ދުވަހަށް ވެފައިވާއިރު މިކަންކަން އިންތިހާއަށް އޮތްއިރު އިލެކްޝަނަށް މިކަންކަން ނުހުއްޓުވޭކަމީ ކަންބޮޑުވާ ކަމެއްކަމަށް ތޮލާލް ވިދާޅުވިއެވެ.
