ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުއަށް މަރުހަބާ ކިޔަން ފުވައްމުލަކު އަދާލަތު އުފެއްދި ބޭފުޅުން ފެހި ކުލައިގެ ޓީޝާޓުގައި ނިކުތުން އަދާލަތު ޕާޓީން އެކަން ކުށްވެރި ކޮށްފިއެވެ.
މުއިއްޒަށް މަރުހަބާ ކިޔުމަށް ފެހި ޓީޝާޓުގައި ފުވައްމުލަކުން ނުކުމެފައިވަނީ އަދާލަތު ޕާޓީ ވުޖޫދުވިއިރު އެ ޕާޓީއާ ގުޅުނު ފުވައްމުލަކު އިސް، ފައުންޑިން މެންބަރުންތަކެވެ. އެމީހުން މުއިއްޒަށް މަރުހަބާ ދަންނަވަން ނުކުތީ މިހާރު އޮތް އާދަލަތު ޕާޓީއަށް ތާއިދު ނުކުރާކަން ހާމަކުރާށެވެ.
އަލީ ނަޒީރު ކުރެއްވި ޓުވީޓެއްގައި ވިދާޅުވީ، ޑރ.މުއިއްޒުގެ ކެމްޕޭނުގައި އަދާލަތު ޕާޓީގެ ކުލަ ބޭނުންކުރާކަން ފާހަގަކުރެވިފައިވާތީ އެކަން ހަރުކަށި އިބާރާތުން ކުށްވެރިކުރާ ކަމަށާއި، އަދި އެކަމަކީ އިންތިހާބާ ބެހޭ އާންމު ގާނޫނުގެ ދަށުން މަނާކަމަކަށްވާތީ އެކަން ހުއްޓުވަން އިލެކްޝަންސް ކޮމިޝަނަށް ގޮވާލާ ކަމަށެވެ.
ޕީއެންސީގެ ކެންޑިޑޭޓް ޑރ. މުއިއްޒުގެ ކެމްޕޭނުގައި ޢަދާލަތު ޕާޓީގެ ކުލަ ބޭނުންކުރާކަން ފާހަގަކުރެވިފައިވާތީ އެކަން ހަރުކަށި އިބާރާތުން ކުށްވެރިކުރަން. މިކަމަކީ އިންތިޚާބާ ބެހޭ އާންމު ޤާނޫނުގެ ދަށުން މަނާކަމެއްކަމަށް ވާތީ މިކަން ހުއްޓުވުމަށް އިލެކްޝަންސް ކޮމިޝަނަށް ގޮވާލަން.
– އަލީ ނަޒީރު ވިދާޅުވިއެވެ.
މުއިއްޒުގެ ސިޔާސީ ހަޔާތް ފެއްޓެވި އަދާލަތު ޕާޓީ މިވަގުތު އޮތީ ރައީސް އިބްރާހިމް މުހައްމަދު ސޯލިހާ އެކު ކޯލިޝަނުގަ އެވެ. ޕާޓީގެ އިސް ބޭފުޅުން ގެންދަވަނީ ރައީސްއާ އެކު ކެމްޕޭނު ކުރައްވަމުންނެވެ. ނަމަވެސް ރަށްރަށުގައި ތިއްބެވި އަދާލަތުގެ މެމެމްބަރުން ގެންދަނީ އެޕާޓީގެ ކުރީގެ މެމްބަރު ޕީއެންސީގެ ކެންޑިޑޭޓް ޑރ. މުއިއްޒުއަށް ތާއީދު ކުރަމުންނެވެ.
