މިއަހަރުގެ ރިޔާސީ އިންތިޚާބުގައި ވާދަކުރައްވާނެކަމަށް ކުރިން އިއުލާން ކުރެއްވި ކުރީގެ ބަންޑާރަ ނައިބް ޑރ.މުހައްމަދު މުނައްވަރު ޕީއެންސީގެ ކެންޑިޑޭޓް ޑރ.މުހައްމަދު މުއިއްޒަށް ކުރައްވަން ނިންމައިފިއެވެ.
ރިޔާސީ ރޭހުގައި ވާދަކުރައްވާނެކަމަށް މުނައްވަރު ވިދާޅުވި ނަމަވެސް ފަހުން ވަނީ ކުރިމަތި ނުލައްވާނެކަން ހާމަކުރައްވާފައެވެ. އޭގެ ފަހުން މުނައްވަރު ހުންނެވީ އެއްވެސް ކެންޑިޑޭޓަކަށް ތާއީދު ނުކުރައްވައި މަޑުކޮށްލައިގެންނެވެ. ނަމަވެސް މުނައްވަރު ވަނީ ރިޔާސީ އިންތިޚާބުގައި މުއިއްޒުއަށް ތާއީދު ކުރައްވަން ނިންމައި އެކަން ހާމަކުރައްވާފައެވެ.
ޑރ.މުއިއްޒުއަށް ތާއީދު ކުރައްވަން މުނައްވަރު ނިންމެވި އެންމެ ބޮޑު ސަބަބަކީ ރާއްޖޭގެ ކަނޑުގެ ސަރަހައްދުން ބައެއް ގެއްލޭގޮތަށް ސަރުކާރުން ނިންމާފައި ނިންމުމާއި ދެކޮޅަށް އެންމެ ބޮޑަށް އަޑުއުފުއްލެވި ބޭފުޅަކީ ޑރ.މުއިއްޒުކަމަށް ވުމެވެ. އަދި މިކަމުގައި އެންމެ ބޮޑު އިސްނެންގެވުމެއް ނަންގަވައި ބޮޑު ހަރަކާތްތަކެއް ބޭއްވެވީ ޕީޕީއެމް، ޕީއެންސީން ކަމަށް މުނައްވަރު ފާހަގަ ކުރެއްވިއެވެ. މިފަދަ ޤައުމީ މައްސަލައެއްގައި ޤައުމުގެ ހައްގުގައި ވަކާލާތު ކުރެއްވި ކެންޑިޑޭޓެއްގެ ފަހަތުގައި މަސައްކަތް ކުރުމަކީ މިހާރު ޤައުމުގެ ހާލަތު އޮތް ގޮތުން އެންމެ ރަނގަޅު ގޮތްކަމަށްވެސް ޑރ.މުނައްވަރު ދެކެ ވަޑައި ގަންނަވައެވެ.
ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ބަންޑާރަނައިބުގެ މަގާމް 10 އަހަރު ފުރުއްވެވި މުނައްވަރަކީ ރާއްޖޭގައި ތިއްބެވި ގާނޫނީ ދާއިރާގެ އެންމެ ތަޖުރިބާކާރު ބޭފުޅުންގެ ތެރޭގައި ހިމެނޭ ބޭފުޅެކެވެ. އޭނާ ވަނީ 2008 ގައި އެމްޑީޕީގެ ރިޔާސީ ޕްރައިމަރީގައި ވާދަކުރައްވާފައެވެ. ނަމަވެސް ރައީސް މުހައްމަދު ނަޝީދު އެމްޑީޕީގެ ރިޔާސީ ޕްރައިމަރީ އޮޅުވާލެއްވީ ކަމަށް ވިދާޅުވެ ފަހުން އެމްޑީޕީން އިސްތިއުފާ ދެއްވީއެވެ.
މުނައްވަރު އެމްޑީޕީ އާއި ފެއަށް ޖެހުނު ސަބަބަކީ ނަޝީދު ކަމަށް ވީނަމަވެސް ޖަނަވަރީ މަހު އޮތް އެމްޑީޕީގެ ރިޔާސީ ޕްރައިމަރީގައި ނަޝީދަށް ކެމްޕޭން ކޮށްދެއްވަން މުނައްވަރު އައްޑުއަށް ވެސް ވަޑައިގެންނެވިއެވެ.
ރިޔާސީ ކެމްޕޭނަށް މާދަމާ ޑރ.މުއިއްޒު އައްޑޫ ސިޓީއަށް ވަޑައި ގަންނަވާނެއެވެ. މުއިއްޒުގެ ރަނިންމޭޓް ހުސެއިން މުހައްމަދު ލަތީފް މިވަގުތު ހުންނެވީ އައްޑޫސިޓީގައިި ކެމްޕޭންގައެވެ. މިރޭ މާލޭގައި ޑރ.މުއިއްޒުގެ މެނިފެސްޓޯ އިފްތިތާހު ކުރުުން އޮންނާނެއެވެ.
