ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ޖަލްސާތައް މާދަމާ ފަށާއިރު، މަޖިލީހުގެ ދާއިމީ ކޮމިޓީތަކުގައި މެންބަރުން ތަމްސީލުކުރާ ގޮތަށް ގެނެވޭ ބަދަލާގުޅޭ މައްސަލަ އެޖެންޑާކޮށްފިއެވެ.
މަޖިލީހުގެ މާދަމާގެ ޖަލްސާގެ އެޖެންޑާގައިވަނީ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާގުޅޭ މައްސަލަ އެކަންޏެވެ.
އާ ދައުރު ފަށާއިރު މަޖިލީހުގައި މުހިންމު މަސައްކަތްތަކެއް ހުއްޓާ ރައްޔިތުންގެ މަޖިލީހުގެ ދެވަނަ ދައުރު ނިންމާ މަޖިލިސް ޗުއްޓީއަށް ދިޔައީ ޖޫން 22 ވަނަ ދުވަހު އެވެ.
މަޖިލީހުގެ ކޮމްޕޮޒިޝަން
– އެމްޑީޕީ – 56
– ޑިމޮކްރެޓްސް – 14
– ޕީޕީއެމް – 5
– ޕީއެންސީ – 3
– އެމްއެންޕީ – 3
– ޖުމްހޫރީ ޕާޓީ – 2
– އެމްޑީއޭ – 2
– ވަކި ޕާޓީއަކަށް ނިސްބަތްނުވާ – 2
މަޖިލިސް ޗުއްޓީ އަށް ދިޔައިރު މުހިންމު މަސައްކަތްތަކެއް ހުރީ ނުނިމި އެވެ. އޭގެ ތެރޭގައި ބައެއް ވަޒީރުންނާއި މަޖިލީހުގެ ރައީސާއި ނައިބު ރައީސްގެ އިތުބާރު ނެތް ކަމުގެ މައްސަލަ ހިމެނެއެވެ. އަދި އިލެކްޝަންސް ކޮމިޝަންގެ މެންބަރެއްގެ ދައުރު ހަމަވެފައިވާތީ މެންބަރެއް ކަނޑައެޅުމުގެ މައްސަލަ ވެސް އޮތީ ހުއްޓިފައެވެ.
ދައުރުން ބޭރުން ބޭއްވި ޖަލްސާގައި މަޖިލީހުގެ ދާއިމީ ކޮމިޓީތަކުގައި މެންބަރުން ތަމްސީލުކުރާ ނިސްބަތް ފާސްކުރި ނަމަވެސް ބައެއް މެންބަރުން ދަ ޑިމޮކްރެޓްސްއަށް ގުޅިވަޑައިގަތުމުން ދާއިމީ ކޮމިޓީތަކުގައި މެންބަރުން ތަމްސީލުކުރާ ގޮތަށް ވަނީ އަލުން ބަދަލު ގެންނަން ޖެހިފައެވެ.
