މިވެރިކަމުގައި ވަޒީރު ކަމާއި ހަވާލުވެ ކުރި މަސައްކަތަށް ދިން ހަދިޔާއަކީ ފެންވެސް ނުދީ ކަތިލުން ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމްގެ އިންތިހާބީ އެޖެންޓް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ށ. އަތޮޅަށް ގާސިމް ކުރައްވަމުންގެންދަވާ ދަތުރުފުޅުގައި އެ އަތޮޅު މިލަންދޫގައި ބޭއްވި ޖަލްސާގައި ވަރަށް އަސަރާއިއެކު ވާހަކަ ދައްކަވަމުން ޢަލީ ވަހީދު ވިދާޅުވީ އުމުރުގެ އެންމެ މުހިންމު ދުވަސް ވަރުގައި 5 އަހަރު ހޭދަ ކުރަންޖެހުނީ ސިޔާސީ މިނިވަންކަން ގެއްލި ޤައުމުން ބޭރުގައި ކަމަށެވެ. މިވެރިކަން ގެނައުމަށް ކުރި މަސައްކަތް ހެކިވާނެ އެތައް ބަޔަކު ތިބޭނެކަމަށް އަލީ ވަހީދު ވިދާޅުވިއެވެ. ނަމަވެސް ނިމިގެން ދިޔައީ ވަރަށް ހިތިކޮށް ކަމަށް އަލީ ވަހީދު ވިދާޅުވިއެވެ.

އަޅުގަނޑުމެން އުުމުރުން 30 އަހަރާއި 40 އަހަރާއި މެދުދުގެ 5 އަހަރު ގެއްލިގެން މިދިޔައީ މިޤައުމުގެ އުޅުމުގެ ފުރުސަތު ނުލިބި. އެހެންވެ ދެން އަޅުގަނޑުމެން ބޭނުން ނުވޭ ހާކަނޑުގަ ލަބަރި ތަޅާކަށެއް. އެކަމުން ވާފައިދާ އެއް ނޯވޭ. ވަރަށް ބުރަ މަސައްކަތުން އަޅުގަނޑުމެން މިވެރިކަންތައް މިގެނައީ. މިވެރިކަން ގެންނަން އަޅުގަނޑުމެން ކުރި މަސައްކަތް ކުޑައެއް ނުވާނެ.

– ޢަލީ ވަހީދު ވިދާޅުވިއެވެ.

އަޅި ވަހީދު ވިދާޅުވީ މިސަރުކާރަށް ކުރިމަތިވި އެންމެ ބޮޑު މުސީބާތަކީ ކޯވިޑްގެ މުސީބާތް ކަމަށެވެ. އެދުވަސް ވަރު ގެއިން ނުނިކުމެ ޤައުމު ލޮކްޑައުންގައި އޮތް އިރު ފްރަންޓް ލައިނަށް ނިކުތް މަދު މީހުންގެ މީހުންގެ ތެރޭގައި އޭނާވެސް ވާނެކަމަށެވެ. ނަމަވެސް މިސަރުކާރުން އޭގެ ބަދަލު ދިނީ ކިހިނެތްކަން ރައްޔިތުންނަށް ފެންނާނެކަމަށް އަލީ ވަހީދު ވިދާޅުވިއެވެ.

މިވެރިކަމުގަ ދިމާވި އެންމެ ބޮޑު މުސީބާތަކީ ކޯވިޑްގެ މުސީބާތް. އަޅުގަނޑުމެން ނިކުތީ ކޯވިޑްގެ އެމުސީބާތުގަ، ދިވެހި ރައްޔިތުންގެ ތެރެއިން 5،000 ރައްޔިތުން ދުވާލަކު މަރުވާނެކަމަށް ޑޮކްޓަރުން އައިސް އެންމެ ފުރަތަމަ ކެބިނެޓްގަ ވިދާޅުވީ. ބައެއް ކެބިނެޓް ވަޒީރުން ދިޔައީ ގެޔަށް. އޭގެ ތިން މަސްފަހުން ލޮކްޑައުންއަށްފަހު ނިކުތްއިރު ތިބީ ތުބުޅީގަ ނުރަޖަހާފަ. އަޅުގަނޑުމެން ނިކުތީ އޭގެ ފުރަންޓް ލައިނަށް. އެހެން ނަމަވެސް ފެންވެސް ނުދީ އަޅުގަނޑުމެން ކަތިލީ. މިއީ ކަންކަން ވާގޮތް.

– ޢަލީ ވަހީދު ވިދާޅުވިއެވެ.

ޢަލީ ވަހީދު ވިދާޅުވީ މިއިންތިޚާބަށްފަހު ސިޔާސީ މަސަކަތުގައި އުޅެން ގަސްތު ނުކުރައްވާ ކަމަށެވެ. ދެން މަސައްކަތް ކުރައްވާނީ ފުޓުބޯޅައިގެ ކޯޗެއްގެ ގޮތުގައި ކަމަށް އަލީ ވަހީދު ވިދާޅުވިއެވެ. ކޯވިޑްގައި އެންމެ ކުރީ ސަފުގައި މަސައްކަތް ކުރި ޖުމްހޫރީ ޕާޓީއަށް ނިސްބަތްވާ އަލީ ވަހީދާއި އަމީން ފަދަ ބޭފުޅުން މިސަރުކާރުން ވަކިވާނެ ޖެހުނީ ބޮޑެތި ތުހުމަތު ތަކާއިއެކުގައެވެ. ނަމަވެސް އެއީ އެއްވެސް ހަގީގަތެއް ނެތް ދޮގު ތުހުމަތުތަކެއްކަން ފަހުން ވަނީ ހާމަވެފައެވެ.