ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރަށް މަގުމަތިން ދިން ހަމަލާގެ ތަހުގީގު އަވަސްކުރުމަށް އިލެކްޝަންސް ކޮމިޝަނުން ގޮވާލައިފިއެވެ.
އުމަރު ނަސީރަށް އިއްޔެ ހަވީރު ހަމަލާދީފައިވަނީ އުމަރާއި އޭނާގެ ރަނިންމޭޓް އަހްމަދު ސަލީމާއި އިތުރު ބަޔަކު މަޖީދީ މަގުން ޕިކަޕެއްގައި ދުއްވާފައި ދަނިކޮށް މަޖީދީ މަގުގައި ހުންނަ ބިއްލޫރިޖެހި ގެއާ ހަމައިންނެވެ. ހަމަލާ ދިނީ ދަގަޑު އެއްޗެއް ދުރުން އެއްލައިގެން ކަމަށާއި އެ އެއްޗެއް އޭނާގެ މޫނުގައި ޖެހުނު ކަމަށްވެސް އުމަރު ވިދާޅުވިއެވެ.
މިމައްސަލައިގައި އިލެކްޝަންސް ކޮމިޝަންގެ ނައިބް ރައީސް އިސްމާއީލް ހަބީބް ވިދާޅުވީ ކެންޑިޑޭޓެއްގެ ހައްގަކަށް އަރައިގަންނަނަމަ، އެކަމެއް ހުއްޓުވަން ދައުލަތުގެ ސަލާމަތީ ބާރުތަކަށް ގޮވާލާ ކަމަށެވެ. އަދި ކެންޑިޑޭޓުންނަށް ހަމަލާދިނުން ފަދަ ނާތަހުޒީބު އަމަލުތަކުން ހުރިހާ އެންމެންވެސް ދުރުހެލިވުމަށް ހަބީބް ވަނީ އިލްތިމާސްކުރައްވާފަ އެވެ.
މީގެއިތުރުން ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އިއްޔެ ކ. ގުރައިދޫއަށް ކުރެއްވި ކެމްޕޭން ދަތުރުފުޅާ ދިމާކޮށް އެރަށުގައި ހަމަނުޖެހުން ހިންގާފައިވާތީ އެކަމުގައިވެސް ހަބީބް ވަނީ ކަންބޮޑުވުން ފާޅުކުރައްވާފައެެވެ.
ރިޔާސީ އިންތިހާބުގެ ގާނޫނު ބުނާ ގޮތުން އިންތިހާބަށް ކުރިމަތިލި މީހުންގެ ނަންތައް އިލެކްޝަންސް ކޮމިޝަނުން އާންމުކޮށް އަންގައި އިއުލާންކުރާ ދުވަހުން ފެށިގެން އިންތިހާބު ބާއްވައި، ރައީސުލްޖުމްހޫރިއްޔާކަމުގެ މަގާމަށް އިންތިހާބުވާ މީހާ އެމީހާގެ މަގާމާ ހަވާލުވަންދެން، އެންމެހައި ކެންޑިޑޭޓުންނަށާއި އެ ކެންޑިޑޭޓުންނާ އެކުގައި ރައީސުލްޖުމްހޫރިއްޔާގެ ނައިބް ކަމަށް ހުންނަން، އެ ކެންޑިޑޭޓުން ހުށަހަޅާފައިވާ މީހުންނަށް، ދައުލަތުގެ ޚަރަދުގައި ސަލާމަތާއި ރައްކާތެރިކަމުގެ ހިދުމަތް ދޭން ޖެހެއެވެ.
އެއްވެސް ކެންޑިޑޭޓެއްގެ އަދި ރަނިންމޭޓެއްގެ ސަލާމަތާއި ރައްކާތެރިކަމަށް ހުރަސް އެޅޭނެ އެއްވެސް ކަމެއް އެއްވެސް ފަރާތަކުން ކުރުމަކީ ކުށެކެވެ.
