ވެރިކަމަށް ހޮވިވަޑައިގެންފި ނަމަ، ރާއްޖޭގެ މަގުތައް އަމާން ވާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އަމިއްލަ ގޮތުން ވާދަކުރައްވާ އުމަރު ނަސީރު ކުރިއަށް އޮތް ފަސް އަހަރު ވެރިކަމަށް ހޮވިވަޑައިގެންފި ނަމަ ގެންގުޅުއްވާނެ ތަސައްވުރު ހާމަކުރައްވައިފައެވެ.
އަދި ޕީއެސްއެމް އިން ގެނެސް ދިން "ރިޔާސީ ކެންޑިޑޭޓާއި އެކު" ޕްރޮގްރާމްގައި ވާހަކަ ދައްކަވަމުން އުމަރު ވަނީ އޭނާގެ ސަރުކާރެއްގައި ގެންގުޅުއްވާނެ ބައެއް ސިޔާސަތުތައް ހާމަކުރައްވައިފައެވެ.
އުމަރު ވިދާޅުވި ގޮތުގައި އޭނާގެ ވެރިކަމެއްގައި މަގުމަތީގައި މަސްތުވާތަކެތި ވިއްކުމުގެ ފުރުސަތު ނޯންނާނެއެވެ. އަދި ވަޅި ހެރުން ފަދަ ކަންކަން ނުކުރެވޭނެ ކަމަށް ވެސް އުމަރު ވިދާޅުވިއެވެ. ވަޅީގެ އިތުރުން ކަނޑި އާއި ކަތިވަޅި ފަދަ ތަކެތި ވެސް މަގުމަތީގައި ނުގެންގުޅެވޭނެ ކަމަށް އުމަރު ވިދާޅުވިއެވެ.
"ތިބޭފުޅުންގެ ދަރީންނަށް މަގުމަތީ އަމާންކަމާއެކު ހިނގާބިނގާވެ އުޅެވޭނެ. ތިބޭފުޅުންގެ ދަރިންނާއި ދިމާލަށް މަސްތުވާތަކެތި ވިއްކުމަށް ނާދެވޭނެ،" އުމަރު ވިދާޅުވިއެވެ.
"ހައްލަކީ އުމަރުތޯ ޓެސްޓުކުރުމަށް ލިބުނު ހޯމް މިނިސްޓަރުކަން ދެ އަހަރު ދުވަހަށް. ދިވެހިރާއްޖޭގެ އެއްވެސް ހޯމް މިނިސްޓަރަކު ރާއްޖެ އަމާންކުރަން މަސައްކަތް ނުކުރާވަރަށް އަޅުގަނޑު ހުންނާނެ ރާއްޖެ އަމާންކުރަން މަސައްކަތްކޮށްފައި،" އުމަރު ވިދާޅުވިއެވެ.
އުމަރު ނަސީރު ފާހަގަ ކުރެއްވި ގޮތުގައި 43 ގޭންގް ލީޑަރުންގެ ފައިގައި ޓެގް އަޅުވައި ރާއްޖެ އަށް 18 ކުއްތާ ގެނެސް، މަސްތުވާތަކެތި ކޮންޓްރޯލް ކުރަން ފެށީ އޭނާގެ މިނިސްޓަރު ކަމުގައެވެ.
