ރާއްޖޭގެ ބައެއް ސަރަހައްދުތަކަށް މިއަދާއި މާދަމާ އުދަ އަރައިފާނެ ކަމަށް ލަފާކޮށް އެކަމަށް ސަމާލުވާން މޫސުމާ ބެހޭ ގައުމީ އިދާރާ (މެޓް އޮފީސް)އިން އިލްތިމާސްކޮށްފިއެވެ.
މެޓް އޮފީހުން ބުނީ އުދަ އަރާނީ ދިޔަވަރު ބޮޑުވާ ވަގުތު ނުވަތަ އޭގެ ކުޑައިރުކޮޅެއް ކުރިން ކަމަށެވެ. އުތުރުގެ ރަށްތަކަށް ދިޔަވަރު ބޮޑުވާނީ މެންދުރު 12:00 އާ 13:00 ދެމެދުގެ ވަގުތެއްގައެވެ. މެދު ރާއްޖެ ތެރެއަށް ދިޔަވަރު ބޮޑުވާނީ 13:00 އާ 14:00 ދޭތެރޭގައެވެ.
ރާއްޖޭގެ ބައެއް ހިސާބުތަކުގައި ރާޅުގެ އުސްމިން 8 ފޫޓަށް އުފުލިގެން ދިޔުމުގެ ފުރުސަތު އޮތްކަމަށްވެސް މެޓް އޮފީހުން ބުނެފައިވެއެވެ.
ރާއްޖޭގެ މިއަދުގެ މޫސުމަށް ބަލާއިރު އާއްމު ގޮތެއްގައި މޫސުން ރަނގަޅުވާނެކަމަށް މޫސުމާއި ބެހޭ ޤައުމީ އިދާރާއިން ބުނެފައިވެއެވެ. ވައި ޖެހޭނީ ހުޅަނގާއި ހުޅަނގު އުތުރުން ގަޑިއަކު 5 މޭލާ 15 މޭލާ ދެމެދުގެ ބާރު މިނެއްގައި ވައިޖެހޭނެކަމަށާއި ރާއްޖޭގެ ކަނޑުތައް އާދައިގެ ވަރަކަށް މަޑުވާނެކަމަށްވެސް މޫސުމާއި ބެހޭ ޤައުމީ އިދާރާއިން ބުނެފައިވެއެވެ.
މީގެ ކުރިން ދިޔަވަރު އެންމެ ބޮޑުވާ ދުވަސްތަކުގައި ބައެއް ރަށްތަކަށް އުދަ އަރައި ބޮޑެތި ގެއްލުންތައް ކުރިމަތިވެފައިވެއެވެ. އަދި މިދިޔަ އޮގަސްޓު ފަސްވަނަ ދުވަހު މާލެ ސަހައްދަށް ވަނީ އާދަޔާހިލާފަށް އުދައަރާފައެވެ.
ކޮމެންޓު ފޮނުވާ