މިހާރު ކުރިއަށްދާ ކުލަބު މޯލްޑިވްސް ކަޕުގެ ކުއާޓާ ފައިނަލުން އެންމެ ފަހުގެ ޗެމްޕިއަން ޓީމު ފެނަކަ ކަޓުވާލުމަށްފަހު، މުބާރާތުގެ ސެމީ ފައިނަލުން ފިއުލް ސަޕްލައި މޯލްޑިވްސް (އެފްއެސްއެމް) ޖާގަ ހޯދައިފިއެވެ.
އެފްއެސްއެމް އާއި ފެނަކަ ކުޅުނު މެޗު ނިމުނީ 1-1 އިން އެއްވަރުވެގެންނެވެ. ފެނަކަ ޓީމުގެ ކެޕްޓަން، ހުސެއިން ނާޝިދު (ނާއްޓޯ) އެ ޓީމަށް ލީޑުނަގައިދީފައިވަނިކޮށް، އެފްއެސްއެމްގެ އަލީ އަލްސަން ވަނީ އެ ޓީމަށް އެއްވަރުކޮށްދީފައެވެ.
ނަތީޖާ ނެރެން ޕެނަލްޓީ ޖެހިއިރު، ފެނަކަ އަށް ކާމިޔާބުކުރެވުނީ އައްޒާމް (އެޑޫ) އާއި މުހައްމަދު އިންޝާލް ފޮނުވާލި ޕެނަލްޓީއެވެ. މުހައްމަދު އިޔާދު އަލީ އާއި ނަޝާހު އަހުމަދު (ނައްޓު) ޖެހި ޕެނަލްޓީތައް ކާމިޔާބެއްނުވއެވެ. އެފްއެސްއެމް އިން ހަތަރު ޕެނަލްޓީ ވެސް ކާމިޔާބުކުރި އެވެ. އެ ޓީމުގެ ޕެނަލްޓީތައް ޖެހީ އަހުމަދު އައިހަމް (އައިހު)، ޒިޔާން، އަލްސަން އަދި އިބްރާހިމް ހުސެއިންއެވެ.
މި ނަތީޖާއާއެކު ސެމީގައި އާރްއާރްސީ އާއި އެފްއެސްއެމް ބައްދަލުކުރާއިރު، މީގެ ކުރިން 2021 ވަނަ އަހަރު އާރްއާރްސީން ވަނީ ފައިނަލުގައި އެފްއެސްއެމް ބަލިކޮށް މުބާރާތުގެ ތަށި އުފުލާލާފައެވެ. ކުލަބު މޯލްޑިވްސް ކަޕުގެ ސެމީ ފައިނަލް މެޗުތައް އޮންނާނީ އަންނަ ބުދަ ދުވަހުގެރޭއެވެ.
