ރިޔާސީ ކެމްޕޭނަށް ރައީސް އިބްރާހިމް މުހައްމަދު ޞާލިހު ނ.އަތޮޅުގެ ރަށްތަކަށް ކުރައްވާ ދަތުރުފުޅު މާދަމާ ފެއްޓެވުމަށް ހަމަޖެހިއްޖެއެވެ.
ރައީސް ޞާލިހު ކެމްޕޭނަށް ނ.އަތޮޅަށް މިކުރައްވާ ދަތުރުފުޅު ފައްޓަވާނީ މާދަމާ ހެނދުނުއެވެ. މިދަތުރުފުޅުގައި، ނ.އަތޮޅުގެ ހުރިހާ ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. ނ.އަތޮޅަކީ ރައީސް ޞާލިހާއިއެކު ކޯލިޝަން ހަދާފައިވާ އެމްޑީއޭގެ ލީޑަރު އަހުމަދު ސިޔާމް މުހައްމަދުގެ ތާއީދު ބޮޑު އަތޮޅެކެވެ.
ރައީސް އެންމެ ފަހުން ކެމްޕޭނަށް ވަޑައިގެންނެވީ ހުވަދު އަތޮޅަށެވެ. ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވޯޓުލުމުގެ ހައްގު ލިބިފައިވާ ޖުމްލަ 26،244 މީހުން ތިބި ހުވަދު އަތޮޅަށް ރައީސް ކުރެއްވި މި ދަތުރުގައި ޖުމްލަ 17 ރަށަކަށް ވަޑައިގެންނެވިއެވެ. މި ދެ އަތޮޅުން މި ދަތުރުގައި ރައީސް ވަޑައިނުގަންނަވާނީ ގދ. ތިނަދޫއަށެވެ. ފަހުގެ ތާރީހެއްގައި ހާއްސަ ކެމްޕެއިން ދަތުރެއް އެ ރަށަށް ރޭވިފައިވާ ކަމަށް އެމްޑީޕީގެ ކެމްޕެއިން ޓީމުން ބުނެއެވެ.
ރައީސްގެ އަރިހުގައި ރަނިން މޭޓު ހިތަދޫ އުތުރު ދާއިރާގެ މަޖިލިސް މެމްބަރު މުހައްމަދު އަސްލަމްގެ އިތުރުން އެމްޑީޕީ އާއި ގުޅިފައިވާ ޕާޓީތަކުގެ ލީޑަރުން އަދި ސަރުކާރުގެ އިސްވެރިން ބައިވެރިވިއެވެ.
