ރާއްޖޭގެ ހަމަޖެހުމާއި، އަމަން އަމާންކަން ނަގާލައިގެން ލިބޭނެ މޮޅެއް ނެތްކަމަށާއި، ކުރިއަށް އޮތް ރިޔާސީ އިންތިޚާބު ރައްޔިތުންގެ ސާފު އައުލަބިއްޔަތާއިއެކު ރައްޔިތުންގެ ވޯޓުން ކާމިޔާބު ކުރައްވާނެކަމަށް އެމްޑީޕީ ކޯލިޝަންގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ޞާލިޙް ކެމްޕެއިން ދަތުރުފުޅެއްގައި ގދ. މަޑަވެއްޔަށް ވަޑައިގެން އެ ރަށުގައި ޖަލްސާ ބާއްވަން ތައްޔާރުކުރި ތަނުގައި ބަޔަކު ހުޅުޖަހާ ވަނީ ރޯކޮށްލާފައެވެ. ރައީސް ޞާލިހާއި ކެމްޕޭން ޓީމުން މިއަދުއެރަށުގައި ޖަލްސާ ބާއްވަން ޖެހުނީ ގަސް ދޮށުގައެވެ.

ޖަލްސާގައި ވާހަކަ ދައްކަވަމުން ރައީސް ވިދާޅުވީ އެމްޑީޕީއަކީ ހަމަޖެހުން ނަގާލައި ރައްޔިތުންގެ މުދަލާއި ތަކެއްޗަށް ގެއްލުންދޭނެ ބައެއް ނޫންކަމަށެވެ. މިހިނގައިދިޔަ ކަންކަމީ ބަލައިގަނެވޭ ކަމެއް ނޫންކަމަށާއި، ނަމަވެސް ރައީސް ވަނީ މަޑަވެލީ އެމްޑީޕީއާއި ކޯލިޝަންގެ މެމްބަރުން އެކަމާއި ނުވިސްނައި އިންތިޚާބު ކާމިޔާބު ކުރުމަށް ކުރަންޖެހޭ މަސައްކަޔް ކުރުމަށް ގޮވާލާފައެވެ.

އެއްގޮތަކަށްވެސް އެކަމާއިމެދު ކަންބޮޑުވެ، ޖަވާބު ދެއްވުމަށް އެއްވެސް ކަމެއް ކުރާނެ ކަމެއްނެތް. އަމާޒު ހިފަންވީ އިންތިޚާބު ކާމިޔާބު ކުރުމަށް. އިންތިޚާބު ކާމިޔާބު ކުރެވޭނީ ވޯޓުން. އަމަން އަމާންކަމާއި ސުލްހަވެރިކަން ނަގާލައިގެން ލިބޭނެ ކާމިޔާބީއެއް ނެތް. އަމާޒު ހުރީ އިންތިޚާބު ކާމިޔާބުކޮށް ހުރިހާ ރައްޔިތުންނަށް އަމާން ރާއްޖެއެއް ހޯދައި ދިނުމަށް.

– ރައީސް ޞާލިހު ވިދާޅުވިއެވެ.

ރައީސް ވަނީ މިޖަލްސާގައި މަޑަވެލީ ރައްޔިތުންނަށް ކުރިއަށް ދައުރުގައި ކުރާނެ ކަންކަމާއި އެކު ގިނަ ވައުދުތަކެއް ހުށަހަޅާފައެވެ. އެގޮތުން މަޑަވެލީގެ މަސްވެރިންނަށް ބޭނުންވާ ކަންކަމާއި ޒުވާނުންނަށް ބޭނުންވާ ކަންކަން ހަމަޖެހޭނެކަމުގެ ޔަގީންކަން ރައީސް ވަނީ ދެއްވާފައެވެ.

މަޑަވެލީގައި ޖަލްސާ ބޭއްވުމަށް ހަދާފައިވާ ތަނުގައި ބަޔަކު ރޯކޮށްލާ އެތަނުގައި ހުރި ހުރިހާ އެއްޗަކަށް ވަނީ ގެއްލުންދީފައެވެ. އެ ތަނުގައި ބަޔަކު ރޯކޮށްލާފައިވަނީ ރޭގެ ފަތިހުގެ ވަގުތެއްކަމަށް އެނގިފައިވެއެވެ. ފުލުހުން ވިދާޅުވީ އަލިފާން ނިންވާލީ އާއްމުންނާއި ފުލުހުން ގުޅިގެންކަމަށެވެ. މި މައްސަލަ ފުލުހުން ތަހުޤީގުކުރަމުން އަންނަކަމަށާއި މައްސަލައާއި ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ނުވާކަމަށް ފުލުހުން ވިދާޅުވެއެވެ.