އަންނަ މަހުގެ 9 ގައި އޮންނަ ރިޔާސީ އިންތިހާބުގައި ވާދަކުރެއްވުމަށް ޕީޕީއެމް/ޕީއެންސީގެ ބައެއް ބޭފުޅުން ކުށުގެ ރިކޯޑު ސާފު ކުރަމުން އަންނަ ކަން އެނގިއްޖެއެވެ.
ކުރިއަށް އޮތް ރިޔާސީ އިންތިހާބުގައި ޕްރޮގްރެސިވް ކޯލިޝަންގެ ރިޔާސީ ކެންޑިޑޭޓަކަށް ކުރީގެ ރައީސް އަބްދުﷲ ޔާމީން ކަނޑައަޅުއްވާފައި ވަނީ ޕީޕީއެމް/ޕީއެންސީގެ ސެނެޓުންނެވެ. އަދި އެ ކޯލިޝަނުން ރައީސް ޔާމީނަށް ޓިކެޓު އަރުވާފައި ވަނީ މިދިޔަ އޮގަސްޓް މަހުގެ 19 ވަނަ ދުވަހުއެވެ.
ރިޔާސީ ޓިކެޓު ޔާމީނަށް ދީފައި ވަނިކޮށް ވ. އާރަށް ކުއްޔަށް ދޫކުރި މައްސަލައިގައި ޔާމީންގެ މައްޗަށް ރިޝްވަތު ނެންގެވުމާއި މަނީ ލޯންޑަރިންގެ ކުށް ސާބިތުވެ، ކްރިމިނަލް ކޯޓުން މިދިޔަ ޑިސެމްބަރު 25 ވަނަ ދުވަހު ވަނީ އެމަނިކުފާނުގެ މައްޗަށް 11 އަހަރު ދުވަހުގެ ޖަލު ހުކުމެއް އިއްވައިފައެވެ.
އެ ހުކުމް ޔާމީންގެ ފަރާތްޕުޅުން ހައި ކޯޓުގައި އިސްތިއުނާފްކޮށްފައިވާ އިރު، އެ މައްސަލައިގައި އިސްތިއުނާފީ ޝަރީއަތްތައް މިހާރު ވަނީ މެދުކެނޑިފައެވެ. އެއީ އެ މައްސަލަ ބައްލަވާ ތިން ފަނޑިޔާރުންގެ ތެރެއިން ދެ ފަނޑިޔާރަކު ޗުއްޓީ ނެންގެވުމުންނެވެ. ޔާމީންއާ ދެކޮޅަށް ކްރިމިނަލް ކޯޓުން ކުރި ހުކުމަށް ނިހާއީ ހުކުމެއް ނައިސް ދިގުލައިގެން ދިއުމުގެ ފުރުސަތު އޮތުމުން އެމަނިކުފާނަށް ރިޔާސީ އިންތިހާބުގައި ވާދަކުރެއްވިދާނެތޯ ވަނީ ވަރަށް ބޮޑަށް ސުވާލު އުފެދިފައެވެ.
ޖަލު ހުކުމް ތަންފީޒު ކުރައްވަމުން ގެންދަވާ ޔާމީން ރިޔާސީ އިންތިހާބުގައި ވާދަކުރައްވަން ނިންމަވައި ކެންޑިޑެސީ ފޯމް އިއްޔެ އިލެކްޝަންސް ކޮމިޝަން (އީސީ) އަށް ހުށަހެޅުމުން އެ ކޮމިޝަނުން ވަނީ އެ ކެންޑިޑެސީ ބަލައިނުގަނެ ބޭރުކޮށްލައިފައެވެ. އެހެންވެ، ޔާމީންގެ ފަރާތްޕުޅުން އެ މައްސަލަ ވަނީ ސުޕްރީމް ކޯޓަށް ހުށަހަޅައިފައެވެ. އެ ކޯޓުން އެ މައްސަލަ މިހާރު ވަނީ ބަލައިގެންފައެވެ.
ޔާމީނަށް ކުރިމަތިނުލެވޭ ހާލަތެއް އަތުވެއްޖެ ނަމަ، ޕީއެންސީން ކެންޑިޑޭޓަކު ނެރުމަށް ޔާމީން އަންގަވާފައިވާ އިރު، އެ ޕާޓީގެ ސެނެޓް ބައްދަލުވުމެއް މާދަމާ ހެނދުނު ބޭއްވުމަށް ވަނީ ނިންމައިފައެވެ. އެ ބައްދަލުވުމުގައި ރިޔާސީ އިންތިހާބުގައި ވާދަކުރުމާ ގުޅޭ ގޮތުން މަޝްވަރާ ކުރާނެއެވެ.
ކުރިއަށް އޮތް ރިޔާސީ އިންތިހާބުގައި ޕީއެންސީން ކެންޑިޑޭޓަކު ނެރޭނެ ކަމަށް ބެލެވޭ އިރު، ރިޔާސީ ޓިކެޓަށް ޝައުގުވެރިކަން ހުންނެވި ބައެއް ބޭފުޅުން ވަނީ ކުށުގެ ރިކޯޑު ސާފު ކުރެއްވުމުގެ މަސައްކަތް ކުރައްވަމުންނެވެ. އޭގެ ތެރޭގައި ރަނިންމޭޓު ކަމަށް ޝައުގުވެރިވެވަޑައިގަންނަވާ ބޭފުޅުން ވެސް ހިމެނެއެވެ.
