ރައްޔިތުންގެ މަޖިލީހުގެ ނައިބް ރައީސް އީވާގެ ދަރިކަލުންގެ ފޮޓޯ ޓްވިޓާގައި ބޭނުންކޮށްގެން އީވާއަށް ބިރު ދެއްކި މީހާ ހައްޔަރުކުރުމަށްފަހު ފޯނު އަތުލާފައި ދޫކޮށްލައިފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ކޯޓު އަމުރު ތަންފީޒު ކުރުމަށްފަހު ރޭގެ ވަގުތެއްގައި އެ މީހާ ދޫކޮށްލައިފައިވާ ކަމަށެވެ. ނަމަވެސް އޭނާގެ ފޯނު ފުލުހުންގެ ބެލުމުގެ ދަށަށް ގެނެސް މައްސަލަ އިތުރަށް ތަހުގީގު ކުރަމުންދާ ކަމަށްވެސް ވިދާޅުވިއެވެ. އިވާއަށް ބިރު ދެއްކި މައްސަލާގައި މީހަކު ހައްޔަރުކުރި ނަމަވެސް އެމީހާގެ އެއްވެސް ތަފްސީލެއް ފުލުހުން އަދި ހާމައެއް ނުކުރެއެވެ.
އީވާގެ 18 އަހަރު ނުފުރޭ ދަރިކަލުން ފޮޓޯ ބޭނުންކޮށްގެން އީވާއަށް ބިރު ދެއްކި ކަމަށް ބުނާ މީހާއަކީ ފޭކް އެކައުންޓަކުން އެކަން ކުރި މީހެއް ކަމަށް މައުލޫމާތު ލިބިފައިވެއެވެ. މިމައްސަލައިގައި އީވާ ކުރެއްވި ޓްވީޓެއްގައި ކޮމިޝަނާ އޮފް ޕޮލިސް މުހައްމަދު ހަމީދު ޓެގް ކުރައްވާ މައްސަލަ ބަލައިދިނުމަށްވެސް ކުރިން އެދިވަޑައިގެންފައިވެއެވެ.
އީވާގެ ދަރިކަލުންގެ ފޮޓޯ ޓްވިޓާގައި ބޭނުންކޮށްގެން އީވާއަށް ބިރު ދެއްކި ކަމުގެ ތުހުމަތުގައި މީހަކު ހައްޔަރުކޮށްފައިވާއިރު އީވާ ގެންދަވަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
