އިދިކޮޅު ޕީޕީއެމްގެ ރިޔާސީ ކެނޑިޑޭޓުގެ ގޮތުގައި ކުރީގެ ރައީސް އަބްދުﷲ ޔާމީނަށް ރިޔާސީ އިންތިޚާބުގައި ވާދަނުކުރެވިއްޖެ ހާލަތެއްގައި، އިދިކޮޅު ކޯލިޝަންގައި ހިމެނޭ ޕީއެންސީގެ ފަރާތުން ކެނޑިޑޭޓަކު ނެރުމުގެ މަސައްކަތް ރައީސް ޔާމިންގެ ލަފާފުޅާއެކު އެކޯލިޝަނުން ފަށައިފިއެވެ.
އެކޯލިޝަންގެ އިސް ފަރާތެއް ނަންނުޖެހުމަށް ޝަރުތުކޮށް ޚަބަރު އޮންލައިނަށް މައުލޫމާތު ދެއްވި ގޮތުގައި އިދިކޮޅު ކޯލިޝަންގެ ވިސްނުން މިވަގުތު ހުރީ ޔާމީންގެ ކެންޑިޑެސީ ފޯމުގެ އިތުރަށް ޕީއެންސީން ކެންޑިޑޭޓަކާއި ރަނިން މޭޓު ކަނޑައަޅައި އިލެކްޝަންސް ކޮމިޝަނަށް ފޯމު ހުށަހެޅުމަށެވެ. އަދި ރައީސް ޔާމީންގެ ކެންޑިޑެސީ ފޯމު ކިމިޝަނުން ބަލައި ނުގެންފިނަމަ ޕީއެންސީގެ ކެންޑިޑޭޓާއި ރަނިން މޭޓާއެކު ރިޔާސީ އިންތިހާބަށް ނުކުތުމުގެ ވިސްނުން ގެންގުޅުއްވާކަމަށް އެފަރާތުން މައުލޫމާތު ދެއްވިއެވެ.
އިދިކޮޅު ޕީޕީއެމް ޕީއެންސީގެ ލީޑަރޝިޕްގެ ބޭފުޅެއް ޕީއެންސީގެ ކެންޑިޑޭޓެއްގެ ގޮތުގައި ނެރުއްވުމަށް ރައީސް ޔާމިން މިހާރު އިދިކޮޅު ލީޑާޝިޕަށް އަންގަވާފައި ވާއިރު ރިޔާސީ ކެނޑިޑޭޓެއްގެ ގޮތުގައި މާލެ ސިޓީގެ މޭޔަރ ޑރ. މުޙައްމަދު މުޢިއްޒު ކަނޑައެޅުމަށް އިދިކޮޅުގެ ލީޑަރޝިޕްގައި މާބޮޑު ޚިޔާލުތަފާތުވުމެއް ނެތްކަމަށް ވަނީ މަޢުލޫމާތު ލިބިފައެވެ. އެހެންނަމަވެސް ރަނިންމޭޓެއް ކަނޑައެޅުމުގައި ގިނަ ޚިޔާލުތަފާތުވުންތަކެއް ހުރިކަމަށް މަޢުލޫމާތު ލިބެއެވެ. އެގޮތުން ރަނިންމޭޓެއްގެ ގޮތުގައި ވާދަކުރުމަށް އިދިކޮޅު ކޯލިޝަން ހިންގުމާއި ހަވާލުވެ ހުންނެވި އަބްދުރަހީމް އަބްދުﷲ އާއި ނައިފަރު ދާއިރާގެ މެމްބަރު އަޙްމަދު ޝިޔާމާއި މަޑުއްވަރީ ދާއިރާގެ މެމްބަރު އާދަމް ޝަރީފާއި ތ. ގުރައިދޫ ދާއިރާގެ މެމްބަރު މުޙައްމަދު ޣައްސާން މައުމޫން ޝައުގުވެރިކަން ފާޅުކުރައްވާފައި ވާކަމަށް މައުލޫމާތު ލިބެއެވެ.
އެހެންކަމުން ޕީއެންސީގެ ފަރާތުން ވާދަކުރައްވާނެ ކެނޑިޑޭޓަކަށް ޑރ. މުއިއްޒު ހަމަޖައްސައި ރަނިންމޭޓު އިހްތިޔާރުކުރުން އިދިކޮޅު ލީޑަރު ރައީސް ޔާމީނަށް ހުށަހެޅުމަށް އިދިކޯޅު ކޯލިޝަނުން މަސައްކަތް ކުރައްވަމުން ގެންދަވާކަމަށް މަޢުލޫމާތު ވަނީ ލިބިފައެވެ.
ރިޔާސީ އިންތޚާބުގައި ވާއްދަ ކުރައްވާ އިދިކޮޅު ޕީޕީއެމްގެ ރިޔާސީ ކެނޑިޑޭޓް، ރައީސް ޔާމިންގެ ރަނިން މޭޓަކަށް ކުރީގެ ނައިބުރައީސް ޑރ. ޖަމީލް ހަމަޖައްސަވައި އެޕާޓީން އެކަން އިއުލާން ކޮށްފައި ވަނީ އިއްޔެއެވެ. އެހެންނަމަވެސް، ގާނޫނު ބުނާގޮތުން، ޚިޔާނާތާއި މަނީ ލޯންޑަރިންގެ ދައުވާ ސާބިތުވެ، މިހާރު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް ޔާމިންގެ އިންތިޚާބީ ޝަރުތުރު ފުރިހަމައެއް ނުވެއެވެ. ނަމަވެސް ރައީސް ޔާމިނަށް އިންތިހާބުގައި ވާދަކުރެވޭނެތޯ ނުވަތަ ނޫންތޯ ކަނޑައަޅާނީ ކެނޑިޑެސީ ފޯމު ހުށަހެޅުމުން އިލެކްޝަންސް ކޮމިޝަނުންނެވެ.
ކުރިޔަށް އޮތް ރިޔާސީ އިންތިޚާބަށް ކުރިމަތި ލުމުގެ ފުުރުސަތު އިލެކްޝަންސް ކޮމިޝަނުން ހުޅުވާލާފައިވަނީ އަންނަ އޮގަސްޓުމަހުގެ 7 ވަނަ ދުވަހާ ހަމައަށެވެ.
ކޮމެންޓު ފޮނުވާ