ގިނިކަންޏާ ވާދަކުރެއްވި "ދަ ޑިމޮކްރެޓްސް" ޕާޓީގެ ރިޔާސީ ޕްރައިމަރީ، އިލްޔާސް ލަބީބު ކާމިޔާބު ކުރައްވައިފިއެވެ.

"ދަ ޑިމޮކްރެޓްސް" ޕާޓީން ހާމަ ކޮށްފައިވާ ގޮތުގައި އެޕާޓީގެ ރިޔާސީ ޕްރައިމަރީ އިލްޔާސް ލަބީބު ކާމިޔާބު ކުރައްވާފައިވަނީ 3،041 ވޯޓުންނެވެ. އެޕާޓީން ހާމަ ކޮށްފައިވާ ގޮތުގައި މިއަދު ބޭއްވި އިންތިހާބުގައި 3،208 މީހަކު ވޯޓު ލާފައި ވެއެވެ. އިލްޔާސް ރިޔާސީ ކެންޑިޑޭޓް ކަމަށް ކަނޑައަޅަން ނުފެންނަ ކަމަށް 153 މީހަކު ވޯޓު ދިންއިރު، 9 ވޯޓު ވަނީ ބާތިލް ވެފައެވެ.

"ދަ ޑިމޮކްރެޓްސް" ޕާޓީގެ ރިޔާސީ ޕްރައިމަރީއަށް އިއުލާން ކުރުމުން ޕްރައިމަރީގައި ވާދަކުރުމުގެ ޝައުގުވެރިކަން ފާޅުކޮށްފައިވަނީ އިލްޔާސް ލަބީބު އެކަންޏެވެ. އެހެންކަމުން އޭނާއަށް ޓިކެޓް ހަވާލު ކުރަން ފެނޭތޯ ބާއްވާފައިވަނީ ފެންނަ ނުފެންނަ ވޯޓެކެވެ.

މިއަދު ބޭއްވުނު އެޕާޓީގެ ރިޔާސީ ޕްރައިމަރީއަށްފަހު، އެޕާޓީގެ އެންމެ އިސް ފަރާތްތަކަށްވާ، އެމްޑީޕީގެ ކުރީގެ ރައީސް ނަޝީދު ވިދާޅުވެފައިވަނީ ކުރިޔަށް އޮތް ރިޔާސީ އިންތިޚާބު އިލްޔާސް ކާމިޔާބު ކުރައްވާނެ ކަމުގައެވެ.

ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނެކަން މިހާތަނަށް އިއުލާން ކޮށްފައިވަނީ، ވެރިކަން ކުރާ އެމްޑީޕީންނާއި، އިދިކޮޅު ޕީޕީއެމްއާއި، އެމްއެންޕީންނެވެ. އޭގެ އިތުން އެމްއާރުއެމްއިންވެސް މިހާރު ގެންދަނީ އެޕާޓީގެ ރިޔާސީ ޕްރައިމަރީ އޮންލައިންކޮށް ބޭއްވުމަށް ތައްޔާރު ވަމުންނެވެ. އެޕާޓީގެ ޕްރައިމަރީގައި ވާދަކުރައްވަނީ ޕާޓީގެ ރައީސް ފާރިސް މައުމޫންއެވެ. އަމިއްލަ ގޮތުން ރިޔާސީ އިންތިޚާބުގައި ވާދަކުރެއްވުމަށް އުމަރު ނަސީރު މިހާރުވަނީ 2،000 ސޮއި ހަމަކޮށްފައެވެ.