ކުރިޔަށް އޮތް ރިޔާސީ އިންތިޚާބުގައި އެމްއެންޕީއިން ވާދަކުރައްވާ އެޕާޓީގެ ރިޔާސީ ކެނޑިޑޭޓް ކާނަލް ނާޒިމްގެ ރަނިން މޭޓަކަށް ކުރީގެ އެސިސްޓެންޓް ކޮމިޝަނަރު ޑރ. އަބްދުﷲ ފައިރޫޝް ހަމަޖައްސަން ނިންމަވާފައިވާކަމަށް މައުލޫމާތު ލިބިއްޖެއެވެ.
ނާޒިމްގެ މި ނިންމެވުމާއި ގުޅޭގޮތުން އެމްއެންޕީގެ ރަސްމީ ބަހެއް ލިބިފައި ނުވިނަމަވެސް، "ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ފައިރޫޝްގެ ކުށުގެ ރެކޯޑު ސާފުކުރުމުގެ މަސައްކަތް އެމްއެންޕީން މިހާރު ގެންދަނީ ކުރަމުންނެވެ.
ފުލުހުންގެ ޚިދުމަތުގައި 20 އަހަރު ހޭދަ ކުރައްވާ ރިޓަޔަރ ކުރެއްވުމަށްފަހު ފައިރޫޝް ދިރުއުޅުއްވަމުން ގެންދަވަނީ އޮސްޓްރޭލިއާގައެވެ. އެސިސްޓެންޓް ކޮމިޝަނަރގެ މަގާމުން އޭނާ އިސްތިއުފާ ދެއްވާފައިވަނީ 2021 ވަނަ އަހަރުގެ ޖެނުއަރީމަހުގެ 2 ވަނަ ދުވަހުއެވެ.
އޭނާއަކީ، 2012 ވަނަ އަހަރު ކުރީގެ ރައީސް މުހައްމަދު ނަޝީދުގެ ވެރިކަން ވެއްޓިގެން ދިޔައިރު، ނަޝީދަށް ތާއީދު ކުރާ ފަރާތްތަކުން، "ބަޢާވާތް" ކުރިކަމަށް އަބަދުވެސް ތުހުމަތު ކުރާ ބޭފުޅެކެވެ. އަދި މި ސަރުކާރުގައި އޭނާއަށް ރިޓަޔަރ ކުރުމުގެ ފުރުސަތު ދިނުމުން، ނަޝީދަށް ތާއީދު ކުރާ ފަރާތްތަކުން ފުލުހުންގެ އެ ނިންމުމަށް ފާޑު ކިޔާފައި ވެއެވެ.
އަދި މި ދައުރުގައި ފާސްކުރި ދިވެހި ފުލުހުން ބިލް ފާސްކޮށްފައިވަނީ ނަޝީދުގެ ވެރިކަން ބަދަލުވުމުގައި، ތުހުމަތު ކުރެވޭ ފުލުހުން ވަޒީފާއިން ވަކިކުރެވޭ ގޮތަށެވެ.
