ރާއްޖޭގެ ފުޓުބޯޅަ ވެއްޓިފައިވާ އަނދަވަޅުން އަރައި ގަތުމަށްޓަކައި ކުރީގެ ޓުވަރިޒަމް މިނިސްޓަރ އަދި ރާއްޖޭގެ ތާރީޚުގެ ކްލަބް ލެވެލްގައި އެންމެ ކާމިޔާބު ޗެއާމަން އަލީ ވަހީދު އުންމީދުން ފުރިގެންވާ ތަސައްވަރެއް ހުށަހަޅުއްވައިފިއެވެ.
ދިވެހި ފުޓުބޯޅައަށް އުފާވެރި ދުވަސްތަކެއް ހޯދައި ދިނުމަށް ހާސިލް ކުރެވޭނެ ތަސައްވަރަކާއިއެކު އަލީ ވަހީދު ރޭ ހިރިޔާ ސްކޫލުގައި ބޭއްވި ޚާއްސަ ހަފްލާގައި ވަނީ އޭނާގެ ސިޔާސަތުތަކާއި ތަންފީޒު ކުރާނެ ގޮތް ދިވެހި ރައްޔިތުންނާއި، ފުޓުބޯޅައަށް ލޯބި ކުރާ ފަރާތްތަކަށް ހިއްސާ ކުރައްވާފައެވެ. އަލީ ވަހީދު ސުމަކުން ފެށުމަށް ނިންމާފައިވަނީ އެޓޯލްސް އެފްސީގެ ނަމުގައި އުފެއްދު ކަލަބާއިއެކުގައެވެ. ކުލަބުގެ ފަހަތުގައި ހުރި މަސައްކަތްތަކަކީ ބުރަ އަދި ހާސިލް ކުރަން ގޮންޖެހުން ބޮޑު މަސައްކަތްތަކެކެވެ.
ސްޓޭޖުގައި އަލީ ވަހީދު ހުށަހަޅައިދިން ޕްރެސެންޓޭޝަން އަޑު އެހުމަށް ޝައުގުވެރިކަމާއިއެކު ހިރިޔާ ސްކޫލު ފުރާލާފައި އޮތް ޒުވާނުން ތިބީ ކެތްތެރި ކަމާއިއެކުގައެވެ. މިފަހުގެ ތާރީހުގައި ކުޅިވަރުގެ މިފަދަ އިވެއްޓެއްގައި ހޯލެއް ފުރާލައި ދިވެހި ކުޅިވަރުގެ ޚިދުމަތްތެރިންނާއިއެކު ބޭއްވި މިހަފްލާގައި އަލީ ވަހީދު ދެއްވި އުންމީދީ މެސެޖުތަކަކީ ގަދަ އަޒުމާއިއެކު މަސައްކަތް ކޮށްފިނަމަ ހާސިލް ވާނެ ކަންތައްތަކެއްކަމަށް ގަބޫލު ކުރާ މީހުން މަދެއް ނޫނެވެ.
ޢަލީ ވަހީދުގެ އެޓޯލް ފުޓުބޯޅަ ކުލަމުގެ އެންމެ ޒިންމާދާރު އަދި އެންމެ އަވަހަށް ކުލަބުން އެއްފަރާތްކޮށްލެވޭ މަޤާމު ފުރުއްވަނީ އޭނާއެވެ. އަލީ ވަހީދަކީ އެކުލަބުގެ ކޯޗެވެ.
ސައްބީސް އެޓޯލްސްއަކީ ރާއްޖެއަށް ކުރިން ކީ ނަން. މަހަލްދީބް، މޯލްޑިވްސް، ދިވެހިރާއްޖެ އައީ އޭގެ މާ ފަހުން. މުޅި ދިވެހީން ތަމްސީލުކުރާފަދަ ނަމެއް ދުނިޔޭގައި ގުގުމާލުމަށް ޓަކައި އެޓޯލްސްގެ ނަން މި ކްލަބަށް ކިޔަން ނިންމީ.
– އަލީ ވިދާޅުވިއެވެ.
އަލީ ވަނީ އޭނާގެ ކްލަބްގެ ޓާގެޓްތައް ވެސް ވިދާޅުވެފައެވެ. އޭނާ ވިދާޅުވީ އެޓޯލްސް އެފްސީއިން އެއް އަހަރު ދުވަހުގެ ތެރޭގައި ބައިނަލްއަގްވާމީ ކްލަބް ނެޓްވޯކެއް އުފައްދާނެ ކަމަށެވެ. ފުރަތަމަ ފަހަރަށް ރާއްޖޭގެ ކްލަބެއް އިންޓަނޭޝަނަލް ނެޓްވޯކްގެ ތެރެއަށް ވަންނާނެ ކަމަށާއި އޭގެ ފައިދާ ދިވެހި ކޯޗުންނަށް، ކުޅުންތެރިންނަށް ކުރާނެ ކަމަށް ވިދާޅުވިއެވެ. އަދި އެ ކަމުގެ ސަބަބުން ޕްރޮފެޝަނަލް ކުޅުންތެރިން ބިނާކުރަން މަގުފަހިވާނެ ކަމަށް ވެސް އަލީ ވިދާޅުވިއެވެ.
ތިން އަހަރު ތެރޭގައި ރާއްޖޭގެ ހުރިހާ ރަށެއްގައި އެޓޯލްސް އެފްސީގެ ވިއުގަ ގާއިމުކުރާނެކަމަށް ވެސް އަލީ ވިދާޅުވިއެވެ. މިހާރު މާލެއަށް ނިސްބަތްވާ ގައުމީ ޓީމުގައި ހުރީ އެންމެ ކުޅުންތެރިއެެއް ކަމަށާއި މާލެއަށް ފޯކަސް ކޮށްގެން ފުޓްބޯޅަ ޑިވަލޮޕްކުރަން މަސައްކަތްކޮށްގެން އޮންނާނީ މާލެއާ ހިސާބުގައި އެކަނި ކަމަށް ވެސް އޭނާ ވިދާޅުވިއެވެ.
އަލީ ވަހީދުގެ މިތަސައްވަރާއިއެކު އޭނާގެ އަޒުމަކީ ތިން ވަނަ ޑިވިޝަނުން ފަށައި، 5 ވަނަ އަހަރުގައި ރާއްޖޭގެ ލީގާއި ޤައުމީ ޗެންމްޕިއަންކަން ނެގުމެވެ. އޭނާ ގެ ޓާގެޓްތަކުގެ ތެރޭގައި 10 އަހަރު ތެރޭގައި އެޓޯލް އެފްސީ އޭފްސީ ކަޕް ކާމިޔާބު ކުރުމަކީ ޓާގެޓެކެވެ. އަދި އަމާޒަކީ ކުރިއަށް އޮތް 15 އަހަރު ތެރޭގައިި ޤައުމީ ފުޓުބޯޅަ ޓީމް ރަނގަޅު ފެންވަރަކަށް ބިނާކޮށް އާޖީލެއް ބިނާކުރުންކަމަށެވެ. އަލީ ވިދާޅުވީ ކުރިއަތް އޮތް 20 އަހަރު ދުވަހުގެ ތެރޭގައި ރާއްޖެ ވޯލްޑްކަޕަށް ކޮލިފައިވުމަކީ ވެސް ޓާގެޓެއް ކަމަށެވެ.
ވިހި އަހަރު ދުވަހުގެ ތެރޭގައި ދިވެހިރާއްޖެ ވޯލްޑްކަޕަށް ކޮލިފައިވާނެކަމަށް މީހަކު މިތާ ސްޓޭޖެއްގައި ބުނީމަ ބައެއް މީހުން ބުނެފާނެ އެއީ މޮޔައެކޭ.
– އަލީ ވަހީދު ވިދާޅުވިއެވެ.
އަލީ ވަހީދު ރޭ ދިން މެސެޖުތަކަކީ ދިވެހި ފުޓުބޯޅައަށް ދިން އުފާވެރި އުންމީދީ މެސެޖުތަކެވެ. އަދި އޭނާ ދިވެހި ރާއްޖެއާއި ރާއްޖެއިން ބޭރުގައި ހޯދި ކާމިޔާބީތަކާއި ލިބުނު ތަޖުރިބާގެ މައްޗަށް ދިވެހި ފުޓުބޯޅަ އެހެން ހަރުފަތަކަށް ގެންދިއުމަކީ އަލީ ވަހީދުގެ ބޮޑު ތަސައްވަރެކެވެ.
