ކުރިއަށް އޮތް 2024 ވަނަ އަހަރުގެ ރައްޔިތުންގެ މަޖިލީހަށް އިތުރު ދާއިރާތަކެއް އިތުރުވާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިންތިޚާބުތަކާއި ބެހޭ ޢާންމު ޤާނޫނުގައި މިހާރު އޮތް ރައްޔިތުންގެ މަޖިލީހުގެ އުމުރު ހަމަވުމުގެ 10 މަސް ދުވަހުގެ ކުރިން، ކުރިއަށް އޮތް ދައުރަށް މަޖިލީހަށް އިތުރުވާ ދާއިރާތަކާއި، އާބާދީގެ ނިސްބަތް އިލެކްޝަންސް ކޮމިޝަނުން ހާމަ ކުރައްވަން ޖެހެއެވެ. އިލެކްޝަނުން ވިދާޅުވީ މި މަސައްކަތް މިއަހަރުގެ ފެބްރުއަރީ މަހުން ފެށިގެން ކުރައްވަމުންދާކަމަށެވެ. އެގޮތުން މިހާތަނަށް ލިބިފައިވާ މަޢުލޫމާތާއި، ފެންނަން ހުރި ހިސާބުތަކަށް ބަލާއިރު 2 ސިޓީ ކައުންސިލަކާއި، 3 އަތޮޅަކަށް ދާއިރާތަކެއް އިތުރުވެގެންދާނެކަމަށެވެ.
ކޮމިޝަނުން ކުރަމުންދާ މަސައްކަތަކަށް ފަހުން މިމަހުގެ 27 ވަނަ ދުވަހު އިތުރުވާ ދާއިރާތަކާއި އެކަމުގެ މަޢުލޫމާތު ހިމެނޭ ރިޕޯޓް އާންމު ކުރައްވާނެކަމަށް ހަބީބް ވިދާޅުވިއެވެ. އަދި ދާއިމީ ރިޕޯޓް ސެޕްޓެމްބަރު މަހުގެ 28 ވަނަ ދުވަހު ޢާންމު ކުރާނެކަމަށް ހަބީބް ވިދާޅުވިއެވެ.
ރައްޔިތުންގެ މަޖިލީހުގެ ދާއިރާތައް ކަނޑައެޅިގެންދަނީ، އާބާދީގެ ނިސްބަތަށް ބަލައި، އަންނަ ބަދަލުތަކުގެ މައްޗަށެވެ. ޤާނޫނު އަސާސީގައި ކޮންމެ 5،000 މީހުން ހިމެނޭ ނަމަ އެދާއިރާއަކަށް ވަކި މެމްބަރެއް އިންތިޚާބު ކުރެއްވުމަށް ވަނީ ކަނޑައަޅުއްވާފައެވެ. އިލެކްޝަންސް ކޮމިޝަނުން ބުނީ ރިޔާސީ އިންތިޚާބުގެ މަސައްކަތް ކުރައްވަމުންދާއިރު، ކުރިއަށް އޮތް 2024 ވަނަ އަހަރުގެ މަޖިލިސް އިންތިޚާބުގެ މަސައްކަތްތައްވެސް ކޮމިޝަނުން ކުރަމުންދާކަމަށެވެ.
މިހާރު އޮތް ރައްޔިތުންގެ މަޖިލީހުގެ ދައުރު ހަމަވާނީ އަންނަ އަހަރުގެ މޭމަހުގެ 30 އަށެވެ. ރައްޔިތުންގެ މަޖިލީހަށް ދައުރަކަށްފަހު ދައުރެއްގައި މެމްބަރުން އިތުރުވުމަކީ ގިނަ ބައެއްގެ ކަންބޮޑުވުން އޮތް މައްސަލައެކެވެ. މަޖިލީހުގައި މިހާރު 87 މެމްބަރުން ތިއްބަވައެވެ.
