އިދިކޮޅު ކެނޑިޑޭޓަކާއި ވާދަކުރެވޭނީ ކެނޑިޑޭޓަކު ހުރެގެން، ކަމަށާއި އަދި މިހާތަނަށް ރިޔާސީ ރޭހުން ފެންނަން ހުރީ ރައީސް އިބްރާހިމް މުހައްމަދު ޞާލިހު އެކަނިކަމަށް އެސްޓީއޯގެ މެނޭޖިން ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
ކ. މާފުށީގައި ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަފުޅުދައްކަވަމުން ޝަރީފް ވިދާޅުވީ އިދިކޮޅުގައި އޮތީ ހިޔަންޏަށް މުޑި ނަގާ ބައެއްކަމަށެވެ. ކެނޑިޑޭޓަކު ނެރެވޭތޯ ކެނޑިނޭޅި އެބޭފުޅުން މަސައްކަތް ކުރާ ކަމަށާއި، ނަމަވެސް އަދި މިހާތަނަށް ކެނޑިޑޭޓަކު ފެންނަން ނެތްކަމަށެވެ.
ކެނޑިޑޭޓެއް ފެންނާނެ ކަމަށް ބައެއް ބޭފުޅުން މަސައްކަތް ކުރަމުންދަނ. ކެނޑިޑޭޓަކު ނެރެ ދައްކައިފިނަމަ ވާދަކުރަން އެމްޑީޕީން މިއޮތީ ތައްޔާރަށް.
– ޝަރީފް ވަނީ ވިދާޅުވިއެވެ.
ރައީސް ސާލިހު ވަނީ ރައްޔިތުންނަށްޓަކައި އާއުސް މިންގަނޑެއް ކަނޑައަޅުއްވާފައި ކަމަށާއި، ދެން އަންނަ ރައީސަކު ތަރައްގީއަށްޓަކައި ރައްޔިތުންނަށް އިތުރަށް ކޮށްދެއްވާނެ ކަމެއް ނޯންނާނެކަމަށް ޝަރީފް ވިދާޅުވިއެވެ. އެހެންނަމަވެސް ހަގީގަތުގައި އެމްޑީޕީ ނޫން ބަޔަކަށް އަދި ކެނޑިޑޭޓެއް ނުދެއްކޭކަމަށް ޝަރީފް ވަނީ ވިދާޅުވެފައެވެ.
ރާއްޖޭގެ ވެރިކަން ކުރެއްވި ހުރިހާ ބޭފުޅުންގެ ތެރެއިން އެންމެ ނަމޫނާ ބޭފުޅަކީ ރައީސް ސާލިހުކަމަށް އޭނާ ވިދާޅުވިއެވެ. ރައީސް ސާލިހަކީ ހިކުމަތްތެރި އަދި އޯގާތެރި ބޭފުޅެއް ކަމަށާއި، ރައްޔިތުން ވެރިންގެ ގޮތުގައި ބޭނުން ވަނީ އެ ފަދަ އިޚުލާސްތެރިން ކަމަށްވެސް އޭނާ ވިދާޅުވިއެވެ.
މި ސަރުކާރަށް ކަންކަން ކޮށްދިނުމަށް ހަގީގަތުގައި ލިބުނީ ތިން އަހަރު ކަމަށާއި، ދެ އަހަރު ކޮވިޑްގެ ސަބަބުން މަސައްކަތްތައް ހުއްޓުނު ކަމަށް ޝަރީފް ވިދާޅުވިއެވެ. އެހެންނަމަވެސް މިދިޔަ ސަރުކާރުތަކުގައި ކުރިވަރަށް ވުރެ ތިންގުނަ އިތުރަށް މި ސަރުކާރުން ރައްޔިތުންނަށްޓަކައި މަސައްކަތްތައް ކޮށްދީފައިވާކަމަށް ޝަރީފް ވިދާޅުވިއެވެ.
