ކުރިޔަށް އޮތް ރިޔާސީ އިންތިޚާބަ އެންމެ ދޮޅުމަހަށް ގާތްވެފައިވާއިރު، އިންތިޚާބުގައި ވާދަކުރާނޭކަން އިއުލާން ކޮށްފައިވާ ހުރިހާ ސިޔާސީ ޕާޓީއަކުންވެސް މިހާރު ގެންދަނީ އިންތިޚާބަށް އަމާޒުކޮށް އެކި ގޮތްގޮތުން ކެމްޕޭން ހަރަކާތްތައް ރާވާ ހިންގަމުންނެވެ. އޭގެ ތެރޭގައި، ވެރިރަށް މާލޭގައި ބާއްވާ ކެމްޕޭން ހަރަކާތްތަކުގެ އިތުރުން އެކި ރަށްރަށަށް ދަތުރުކޮށް، ކެނޑިޑޭޓުން ދޮރުން ދޮރަށް ހިނގުމުގެ އިތުރުން، ރިޔާސީ އިންތިޚާބަށް އަމާޒުކޮށް ކޯލިޝަންތައް އެކުލަވާލުމުގެ މަސައްކަތްވެސް ހިމެނެއެވެ.

މިގޮތުން، ވެރިކަންކުރާ އެމްޑީޕީން މިހާރު އެޕާޓީގެ ރިޔާސީ ކެމްޕޭން "ފުލް ގިޔަރުގައި" މިހާރު ކުރިޔަށް ގެންދާން ފަށާފައިވާއިރު، ޕާޓީގެ ރިޔާސީ ކެނޑިޑޭޓް، ރައީސް ސާލިހު ގެންދަވަނީ ރަށްރަށް ދަތުރުކޮށް، ދޮރުން ދޮރަށް ހިންގަވާ އަދި އާބާދީ ބޮޑެތި ރަށްތަށުގައި ކެމްޕޭން ޖަލްސާތައްވެސް ބާއްވަމުންނެވެ.

ހަމައެއާއެކު، ރިޔާސީ އިންތިޚާބުގައި ރައީސް ސާލިހާއި ވާދަކުރައްވަމުން ގެންދަވާ، އެމްއެންޕީގެ ރައީސް ކާނަލް ނާޒިމްވެސް ގެންދަވަނީ ރަށްރަށަށް ކެމްޕޭން ދަތުރުތައް ކުރައްވަމުންނެވެ.

އެހެންނަމަވެސް ރިޔާސީ އިންތިޚާބަށް ކެނޑިޑޭޓުން ފޯމު ހުށަހެޅުއްވުމަށް އެންމެ 10 ވަރަކަށް ދުވަހަށް ގާތްވެފައިވާއިރުވެސް ފާހަގަވާން އޮތް އެންމެ މުހިންމު ކަމެއްގެ ގޮތުގައި ސިޔާސީ މަސްރަހުން ފެންނާން އޮތީ އެންމެ ބޮޑު އިދިކޮޅު ޕާޓީ، ޕީޕީއެމްގެ ހާލަތެވެ. އެޕާޓީއަށް، މިނިވަންކަމާއެކު ވާދަކުރެވޭނެ ހާލަތުގައި ހުރި ރިޔާސީ ކެނޑިޑޭޓަކު އަދިވެސް ހޯދިފައި ނުވާއިރު، ޕާޓީގެ ރިޔާސީ ކެނޑިޑޭޓަށް އަދިވެސް އޮންނަވަން ޖެހިވަޑައިގެންފައި ވަނީ ޖަލުގައެވެ.

ހަމައެއާއެކު، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެކަމަށް އަދިވެސް ވަކާލާތު ކުރައްވަން ޖެހިފައި އޮތުމާއެކުވެސް، ރަގަޅު ފޯމިއުލާއެއް ހޯދުމަށް އެޕާޓީއަށް ކުރާން ޖެހިފައިހުރި މަސައްކަތްތަކާއި، އަދި ޕާޓީގެ އެތެރޭގައި އޮތް ސިޔާސީ ވާދަވެރިކަމެވެ.

ރައީސް ޔާމިނަށް ވާދަ ނުކުރެއްވޭނެ ކަން ޔަގީން! އެންމެ ރަގަޅު ހައްލަކީ ގާސިމް!

އެހެންނަމަވެސް، އިދިކޮޅު ޕީޕީއެމްގެ ރިޔާސީ ކެނޑިޑޭޓް ރައީސް ޔާމިންގެ މައްޗަށް ޝަރުއީ އެތައް މަރުހަލާއެއްގައި ކުރިޔަށްދާ ޝަރީއަތްތަކާއެކު، އެމަނިކުފާނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭނެކަމަށް އެތައް ބަޔަކު ހިސާބު ޖަހަމުންދާތާ މިހާރުވަނީ އެތައް ދުވަހެއް ފާއިތުވެގެން ގޮސްފައެވެ. ހަމައެއާއެކު، ހައިކޯޓުގައި މިހާރު ކުރިޔަށްދާ، ޔާމިންގެ އިސްތިއުނާފްގެ ޝަރީއަތް، ބެންޗުގެ ބައެއް ފަނޑިޔާރުން ޗުއްޓީއަށް ވަޑައިގަނެވި ހިސާބުން މަޑުޖެހުމަކަށް އައުމާއެކު، ކުރިޔަށް އޮތް ރިޔާސީ އިންތިޚާބުގައި ވާދަކުރުމުގެ ފުރުސަތު ޝަރުއީ މަރުހަލާގެ ތެރެއިން ޔާމިނަށް ތަނަވަސްވެގެން ނުދާނޭކަން މިހާރުވަނީ ކަށަވަރުވެ ޔަގީން ކުރެވިފައެވެ.

ފާއިތުވެދިޔަ މުއްދަތުގައި، ޖަލުން މިނިވަންވުމަށް އޮތް ފުރުސަތާއި އަދި އަމިއްލަފުޅު ޕާޓީ މުށުން ބީވެ ދިޔަ ނުދިނުމަށް ބޭނުންކުރެއްވި އެންމެ މުހިންމު ހަތިޔާރަކަށް ރައީސް ޔާމިން ހެެއްދެވީ، ރިޔާސީ އިންތިޚާބުގައި ވާދަކުރެއްވުމަށް "މަރުފަލި" ޖެއްސެވުމެވެ. އެމަސައްކަތުގެ އެންމެ މުހިންމު އަމާޒަކަށް ހެއްދެވީ ރިޔާސީ އިންތިޚާބަށް އިދިކޮޅު ޕީޕީއެމްގެ އެތެެއިން، ކުޑަމިނުން ޝައުގުވެރިކަންވެސް، އެއްވެސް ފަރާތަކަށް ފާޅު ނުކުރެވޭ މިންވަރަށް ޕާޓީ އަޅުވެތިކޮށް، "ކަސްތޮޅުގައި" އެޅުވުމެވެ.

އަދި އެމަސައްކަތް ކޮންމެވެސް މިންވަރަކަށް ފާއިތުވެދިޔަ ތަނުގައިވަނީ ޔާމިން ވަނީ ކާމިޔާބުވެސް ކުރައްވާފައެވެ. ރިޔާސީ އިންތިޚާބުގައި، ރައީސް ޔާމިނަށް ކުރިމަތި ނުލެއްވޭ ހާލަތުގައިވެސް، އެޕާޓީގެ ފަރާތުން އެހެން ކެނޑިޑޭޓަކު ނެރެން ޖެހޭކަމަށް ވަކާލާތު ކުރި ބައެއް ފަރާތްތައް ވަނީ ޕާޓީން ވަކިކޮށްފައެވެ. އަނެއް ބަޔަކަށް ވަނީ ޕާޓީން ވަކިކުރާނޭ ކަމުގެ ބިރު ދައްކާފައެވެ.

އެހެންނަމަވެސް، މި ހުރިހާ ބިރު ދެއްކުންތަކާއެކުވެސް، އަދި، ޕާޓީ މުށުތެރޭގައި ބޭއްވާ، ޕާޓީގެ ފަރާތުން އެހެން ކެނޑިޑޭޓަކަށް ފުރުސަތު ނުދިނުމަށް ޔާމިން ޖައްސަވަމުން ގެންދެވި ހިސާބުތަކާއެކުވެސް، އިދިކޮޅު ޕީޕީއެމްއިން އެއްގޮތަކުން ނުވިއްޔާ އަނެއް ގޮތަކުން ނަމަވެސް އެޕާޓީއަށް އެންމެ ރަގަޅު ފޯމިއުލާއެއް ހޯދުމަށް ކުރަމުންދާ މަސައްކަތްތަކަށް ހުއްޓުމެއް އަޔަނުދީ ކުރިޔަށް ގެންދާކަމީ، ޕާޓީގެ އެތައް ހާސް އާންމު މެމްބަރުންގެ ހިތްތަކަށް ހަގީގީ ތަސައްލީއެއް ގެނެސްދީފައިވާ މަސައްކަތެއްކަންވެސް މި ފުރުސަތުގައި ފާހަގަ ކޮށްލާން ޖެހެއެވެ.

މިގޮތުން، ވާދަވެރި ސިޔާސީ ޕާޓީތަކާއެކު އިދިކޮޅު ޕީޕީއެމްއިން ކުރިޔަށް ގެންދާ ސިޔާސީ މަޝްވަރާތަކުގެ ސިލްސިލާތަކުގެ އެންމެ ފަހުގެ ބޮޅަކަށް ވެގެން މިދިޔައީ، ޖުމުހޫރީ ޕާޓީގެ ލީޑަރު އަދި އެޕާޓީގެ ރިޔާސީ ކެނޑިޑޭޓް ގާސިމް އިބުރާހިމްއާއެކު، ޕާޓީގެ އިސް ބޭފުޅުންކޮޅެއް ސަން އައިލޭންޑުގައި ކުރިޔަށް ގެންދިޔަ މަޝްވަރާތަކެވެ.

ރިޔާސީ އިންތިޚާބަށް ފޯމު ހުށަހެޅުމަށް އެންމެ 10 ދުވަހަށް ވެގެން ގޮސްފައިވާއިރު، ޕީޕީއެމްގެ ލީޑަރޝިޕުން ގާސިމްއާއެކު މިބޭއްވި މަޝްވަރާތައް އެތައްބަޔަކު ދަނީ އެތައް ގޮތަކަށް މޭރުން ކުރަމުންނެވެ. މި މަޝްވަރާތަކާއެކު، ރައީސް ޔާމިނަށް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި، އިދިކޮޅު އެންމެ ބޮޑު ޕާޓީގެ ތާއީދާއެކީ، އިދިކޮޅު ކެނޑިޑޭޓެއްގެ ގޮތުގައި ގާސިމް އިބުރާހިމް ވާދަކުއްވާނޭކަމަށް، ޚުދު ޕީޕިއެމްގެވެސް ލީޑަރޝީޕްގެ އެތައް ބޭފުޅުންނެއްގެ އިތުރުން، އެތައް ހާސް އާންމު މެމްބަރުން ކުރަމުންދިޔަ އުއްމީދުތަކަށް ވަނީ ދިރުމެއް އައިސްފައެވެ. އުއްމީދުގެ ހުޅުކޮޅު ރޯވެ، އެތައްބަޔަކަށްވަނީ ޖޯޝާއި ފޯރި ގެނުވާފައެވެ.

ޕީޕީއެމްގެ ތާއީދާއެކީ، އިދިކޮޅު ކެނޑިޑޭޓެއްގެ ގޮތުގައި ގާސިމް!

ކުރިޔަށް އޮތް، 2023ގެ ރިޔާސީ އިންތިޚާބުގެ ކެމްޕޭނަށް ބެރުޖަހަން ފެށީއްސުރެ، ސަރުކާރާ ޚިޔާލު ތަފާތު އެތައް ބަޔަކު ކުލަޖައްސަން ބޭނުންވި އެއް ހުވަފެނަކަށް ވެގެން ގޮސްފައިވަނީ، ރައީސް އިބުރާހިމް މުހައްމަދު ސާލިހު ބަލިކުރެވޭ ފޯމިއުލާއެއް ހޯދުމެވެ. އެކަމަށްޓަކާ ނުފޮރުޅާ އެންމެ ގާކޮޅެއްވެސް ނުބާއްވާނޭކަމުގައި އިދިކޮޅު ޕީޕީއެމްގެ ލީޑަރޝިޕުންވެސް ގެންދިޔައީ ބުނަމުންނެވެ.

އަދި، އެ ފޯމިއުލާއަކީ ކޮބައިތޯ އެއީ އަބަދުވެސް އުފެދި، ރަގަޅު ފުރިހަމަ ޖަވާބެއް މިހާތަނަށް ލިބިފައިނުވާ ސުވާލެއް ކަމުގައިވެސް ދަންނަވާން ޖެހެއެވެ.

އެހެންނަމަވެސް، ޕީޕީއެމްގެ ކެނޑިޑޭޓް ޔާމިންގެ މައްޗަށް ކުރިޔަށްދާ ޝަރީއަތްތަކުގެ މިސާރާބަށް މިހާރު އައިސްފައިވާ ބަދަލުތަކާއެކު، ކުރިޔަށް އޮތް ރިޔާސީ އިންތިޚާބުގައި ރައީސް ޔާމިންއަށް ވާދަ ނުކުރެއްވޭނެކަން ކަށަވަރުވެ ޔަގީންވުމާއެކު، ޕީޕީއެމްގެ ލީޑަރޝިޕުން، ޖޭޕީގެ ރިޔާސީ ކެނޑިޑާއެކީ އިއްޔެ ބޭއްވި ބައްދަލުވުން މިހާރު މޭރުން ކުރެވެމުން ދަނީ، ރިޔާސީ އިންތިޚާބު ކާމިޔާބު ކުރުމަށް އިދިކޮޅަށް މިހާރު އޮތް އެންމެ ރަގަޅު ހައްލުގެ ގޮތުގައެވެ.

އެއީ ޕީޕީއެމްއިން ރިޔާސީ އިންތިޚާބަށް ކުރިޔަށް އޮތް ރިޔާސީ އިންތިޚާބަށް ކެނޑިޑޭޓަކު ނުނެރެ، އިދިކޮޅު ކެނޑިޑޭޓެއްގެ ގޮތުގައި ގާސިމް އިބުރާހިމަށް ރިޔާސީ އިންތިޚާބުގައި ވާދަކުރުމަށް ފުރުސަތު ދިނުމެވެ.

އަދި އިދިކޮޅު ޕީޕީއެމްއަށް މިނޫން ހައްލެއް އޮތްތަން މިހާރު ފެންނާން ނެތްކަމުގައިވެސް ގިނަބަޔަކު ދަނީ ބުނަމުންނެވެ. އޭގެ އެންމެ ބޮޑު އެއް ސަބަބަކީ، ރިޔާސީ އިންތިޚާބެއްގައި ވާދަ ކޮށްލެވޭވަރަށް ޕާޓީގައި ފައިސާ ނެތުމެވެ. ރައީސް ޔާމިންގެ އެކައުންޓުގައި 100 މިލިއަނަށްވުރެ ގިނައިން ފައިސާ ޖަމާކޮށް، ރައްކާކޮށްފައި ހުއްޓެއްކަމަކު، އެފައިސާ ޕާޓީއަށް ޚަރަދު ކުރެއްވުމަށް ބޭނުންފުޅު ނުވުމެވެ.

ނަތީޖާއެއްގެ ގޮތުން، ޕާޓީ މިވަގުތު އޮތީ، ލައުޑް ސްޕީކަރެއްހާ މިންވަރުވެސް، ޕޯސްޓަރެއްހާ މިންވަރުވެސް ރަށްރަށުގައި ހުރި ޖަގަހަތަކަށް ފޮނުވާލެވޭނޭ ގޮތެއް ނެތިފައެވެ. ޓީމްތައް ތިބީ ކެމްޕޭން ދަތުރުތައް ކުރެވޭނޭ ގޮތެއް ނެތިފައެވެ. އޭގެ އިތުރަށް، މުޅި ރާއްޖެއަށް ޓީމްތައް މޮބިލައިޒްކޮށް، ކެނޑިޑޭޓަކު ގޮވައިގެން ރަށްރަށް އަރާ ދޮރުން ދޮރަށް ހިނގުމަށް އޮތް ވަގުތުވެސް ފާއިތުވެދަނީއެވެ.

ހަމަ އެއާއެކު، ކުރިޔަށް އޮތް ރިޔާސީ އިންތިޚާބަށް ޕީޕީއެމްގެ ތާއީދާއެކީ ކެނޑިޑޭޓަކު ވާދަކުރާއިރު، އިންތިޚާބު ކާމިޔާބު ކުރެއްވޭނެ ހުރިހާ ވަސީލަތްތަކެއް ހުރެމެ، އިންތިޚާބު ކާމިޔާބު ކުރައްވާ، ވެރިކަމަށް ވަޑައިގަތުމަށްފަހު، ރައީސް ޔާމިން ޖަލުން މިނިވަން ކޮށްދެއްވާނޭކަމުގެ ޔަގީންކަންވެސް އެބޭފުޅަކު ދެއްވާންވެސް ޖެހޭނެމެއެވެ.

މިގޮތުން އިސްވެ ދެންނެވުނު ހުރިހާ ޝަރުތުތައް ފުރިހަމަވާ، އިދިކޮޅު ޕީޕީއެމްއަށް ޖޭޕީގެ ރިޔާސީ ކެނޑިޑޭޓު ނޫން އެހެން ހައްލެއް އޮތްތަން މިހާލަތުގައި ފެންނާން ނެތްކަމުގައި ދަންނަވާން ޖެހެއެވެ. އެއީ ކެމްޕޭން ކުރުމަށް ބޭނުންވާ ފައިސާއާއި ވަސީލަތްތަކެވެ. ދެޕާޓީގެވެސް ލީޑަރޝިޕްގައި އެއްބަޔަކު ތިބުމާއެކު، އެންމެން ރުހޭ އެއް ކެނޑިޑޭޓެއްގެ ގޮތުގައިވެސް ސިޔާސީ މަސްރަހުގައި މިވަގުތު ފެންނާން ހުރި ހަމައެކަނި ކެނޑިޑޭޓެއްގެ ގޮތުގައި ގާސިމް އިބުރާހިމް ހުންނެވުމެވެ. އޭގެ އިތުރަށް، މިވަގުތު ޖަލުގައި އޮންނެވި، ކުރީގެ ރައީސް ޔާމިނަށް މާފް ދެއްވުމެވެ.

ފެންނަމުންދާ މަންޒަރުތަކުންނާއި، އަދި މެދުވެރިވަމުންދާ ހާލަތުވެސް އިތުރަށް ޔަގީންކޮށްދެނީ، ޕީޕީއެމްގެ ތާއީދާއެކީ، އިދިކޮޅު ކެނޑިޑޭޓެއްގެ ގޮތުގައި ގާސިމް އިބުރާހިމް ރިޔާސީ އިންތިޚާބުގައި ވާދަކުރައްވާނޭ ތަނެވެ.