އިނދިކޮޅު ޕީޕީއެމްގެ ރަސްމީ ކެމްޕޭން ލޯގޯއަކި އިންޑިއާގެ ތުރިވަނަންތަޕޫރަމްގެ ކޮލެޖެއްގެ ލޯގޯއިން ނަކަލް ކޮށްފައިވާ ލޯގޯއެއްކަން ހާމަވެއްޖެއެވެ.
ސޯޝަލް މީޑިއާގައި މިހާރު ދައުރުވަމުންދާ ބައެއް ފޮޓޯތަކުން ފެންނަ ގޮތުގައި، ރައީސް ޔާމިންގެ ނަމުގެ އަކުރުތައް ރަމްޒު ކޮށްދޭގޮތަށް ފަރުމާކޮށްފައިވާ ލޯގޯއަކީ އިންޑިއާގެ އިންސްޓިޓިއުޓްތައް ހިންގާ ގުރޫޕެއް ކަމުގައިވާ "ރާޖަދާނި ގުރޫޕު އޮފް އެޑިއުކޭޝަނަލް އިންސްޓިޓިއުޓްސް"ގެ ލޯގޯގެ ނަކަލެކެވެ.
ރާޖަދާނި ގުރޫޕުގެ ވެބްސައިޓުން އެގެން ހުރި ގޮތުގައި، އެގުރޫޕުގެ އިންސްޓިޓިއުޓްތަކުން އިންޑިއާގައި ހިންގަމުން ދަނީ ހޮސްޕިޓަލިޓީ އިންޑަސްޓްރީއާއި، ކޮންސްޓްރަކްޝަންއާއި، އުމްރާނީ ތަރައްގީއާއި އަދި އޭގެ އިތުރުން ޓެލެކޮމްގެ ދާއިރާއާއި ގުޅުންހުރި ކޯސްތަކެވެ. އަދި މި ގުރޫޕުން ދަނީ، އެކި ދާއިރާތަކަށް ޚާއްސަ ކޮށްފައިވާ އިންސްޓިޓިއުޓްތައް ހިންގަމުންނެވެ. އޭގެ ތެރޭގައި ރާޖަދަނީ އިންސްޓިޓިއުޓް އޮފް އިންޖިނިއަރިން އެންޑް ޓެކްނޮލޮޖީ، ރާޖަދަނީ އިންސްޓިޓިއުޓް އޮފް ސައިންސް އެންޑް ޓެކްނޮލޮޖީ، ރާޖަދަނީ އިންސްޓިޓިއުޓް އޮފް ހޮޓެލް މެނޭޖްމަންޓް އެންޑް ކޭޓަރިން ޓެކްނޮލޮޖީ، ރާޖަދަނީ ޕޮލިޓެކްނިކް ކޮލެޖް، ރާޖަދަނީ ބިޒްނަސް ސްކޫލް އަދި ރާޖަދަނީ އިންސްޓިޓިއުޓް އޮފް ހޮޓެލް މެނޭޖްމަންޓްވެސް ހިމެނެއެވެ.
މި ގުރޫޕުން ހިންގާ ގިނަ އިންސްޓިޓިއުޓްތަކާއި ކޮލެޖްތައް ހިންގަމުން ދަނީ، ދިވެހިން ގިނައިން ދަތުރުކޮށް އުޅޭ، އިންޑިއާގެ ކެރެލާ ސްޓޭޓުގެ ތުރިވަނަންތަޕޫރަމްގައިކަންވެސް ފާހަގަ ކޮށްލެވެއެވެ. އަދި މީގެ ތެރޭގައި ހިމެނޭ ބައެއް އިންސްޓިޓިއުޓްތައް އުފައްދާފައިވަނީ 2010ވަނަ އަހަރުއެވެ.
އިދިކޮޅު ޕީޕީއެމްއިން ފަރުމާކޮށް މިހާރު އާންމުކޮށް ބޭނުން ކުރަމުންދާ ރަސްމީ ކެމްޕޭން ލޯގޯއަކީ، އިންޑިއާގެ ތުރިވަނަންތަޕޫރަމްގެ ކޮލެޖެއްގެ ލޯގޯގެ ނަކަލެއްކަމަށް ބުނެ އެޕާޓީއަށް ތާއީދުކުރާ ބައެއް ފަރާތްތަކުން މިހާރުވަނީ މި ލޯގޯ ބަދަލުކުރުމަށްވެސް އަޑުއުފުލަން ފަށާފައެވެ. އަދި ޕީޕީއެންއިން އިންޑިއާގެ އަޅުވެތިކަމުން ރާއްޖެ ސަލާމަތް ކުރުމަށް ކަމަށްބުނެ "އިންޑިއާ އައުޓު"ގެ ނަމުގައި ޚާއްސަ ކެމްޕޭނެއް ކުރިޔަށް ގެންދަމުން ދަނިކޮށް، އިންޑިއާގެ ކޮލެޖެއްގެ ލޯގޯ ނަކަލް ކޮށްގެން ރިޔާސީ ކެމްޕޭންގެ ލޯގޯ ފަރުމާ ކުރުމަކީ ބަލައި ނުގަނެވޭ، އަދި ލަދުވެތި ކަމެއް ކަމުގައިވެސް، އިންޑިއާ އައުޓު ކެމްޕޭންގައި ހަރަކާތްތެރިވާ، ޕާޓީގެ ބައެއް ސަޕޯޓަރުން ދަނީ ބުނަމުންނެވެ.
ކުރިޔަށް އޮތް ރިޔާސީ އިންތިޚާބުގައި ބޭނުންކުރާނެ، ރައީސް ޔާމިންގެ ރަސްމީ ކެމްޕޭން ލޯގޯ ފަރުމާކޮށް އަދި މި ލޯގޯ ބޭނުން ކުރެވެމުންދަނީ ރައީސް ޔާމިންގެ ހުއްދަ އޮވެގެން ކަމެއްވެސް ސާފު ވެފައެއް ނުވެއެވެ.
ރައީސް ޔާމިންގެ ރަސްމީ ކެމްޕޭން ލޯގޯ ފަރުމާކުރި ފަރާތެއް ސާފުކުރުމަށް އެޕާޓީގެ އިސްފަރާތްތަކާއި ގުޅުމުން ފޯނު ނުނަންގަވާތީ، ލޯގޯ ފަރުމާކުރި ފަރާތެއްވެސް، އަދި ކެމްޕޭން ލޯގޯ ފަރުމާކުރިއިރު، އިންޑިއާގެ "ރާޖަދާނި ގުރޫޕު އޮފް އެޑިއުކޭޝަނަލް އިންސްޓިޓިއުޓްސް"ގެ ލޯގޯ ނަކަލަކަށް ބަލާފައިވާކަން ނުވަތަ ނޫންކަންވެސް ސާފު ކުރެވިފައެއް ނުވެއެވެ.
