ކޮމެޓީތައް އެކުލަވާނުލެވި ހުއްޓިފައި އޮތް ރައްޔިތުންގެ މަޖިލީހުގެ ދައުރުން ބޭރުން މިމައްސަލަ ހައްލު ކުރުމަށް މިއަދު ބޭއްވި ޖަލްސާގައި ކޮމެޓީތައް އެކުލަވާލުމަށް މަޖިލީހުގައި ހިމެނޭ އިދިކޮޅު ޕާޓީތަކުން ހުށަހެޅި ހުށަހެޅުންތައް ތަޅުމުން ބޭރުކޮށްލައިފިއެވެ.
ރައްޔިތުންގެ މަޖިލީހުގައި ސިޔާސީ ޕާޓީތައް ތަމްސީލުކުރާ ގޮތަށް އައި ބޮޑު ބަދަލާ ގުޅުވައި ދާއިމީ ކޮމިޓީތަކުގެ އެކުލެވުން ބަދަލުކުރަން އިދިކޮޅު މެމްބަރުން 10 އިސްލާހެއް ވަނީ ހުށަހަޅާފައެވެ. މީގެއިން އެއްވެސް އިސްލާހެއް ފާސްވެފައި ނުވެއެވެ. މަޖިލީހުގައި ސިޔާސީ ޕާޓީތައް ތަމްސީލުކުރާ ގޮތަށް ބޮޑު ބަދަލެއް އައީ މަޖިލީހުގެ މެޖޯރިޓީ އޮންނަ އެމްޑީޕީން 13 މެމްބަރަކު ވަކިވެވަޑައިގެންނެވުމާއި ވަކި ޕާޓީއަކަށް ނިސްބަތްނުވާ މެމްބަރުންތަކެއް އެމްޑީޕީއާ ގުޅިވަޑައިގެންނެވުުމުންނެވެ.
އިދިކޮޅު މެންބަރުން އެންމެ ބޮޑަށް މަސައްކަތް ކުރީ ސަރުކާރުގެ މަސްއޫލިއްޔަތު ބަލާ ކޮމެޓީގައި އިދިކޮޅު މެންބަރުންގެ އަޣުލަބިއްޔަތު ހޯދުމަށެވެ. ސަރުކާރުގެ މަސްއޫލިއްޔަތު ބަލާ ކޮމެޓީ އެކުލެވިގެންވާ ގޮތް ބަދަލު ކުރަން އިދިކޮޅުން އިސްލާހު ހުށަހެޅި ނަމަވެސް އެއިން އެއްވެސް އިސްލާހަކަށް އެމްޑީޕީ މެންބަރުންގެ ތާއީދެއް ނުލިބުނެވެ.
އޭގެ އިތުރުން މާލިއްޔަތު ކޮމެޓީ އާއި ޖުޑީޝަރީ ކޮމެޓީ އެމްޑީޕީގެ އަޣުލަބިއްޔަތު ނޯންނާނެ ގޮތައް އެކުލަވާލަން ވެސް އިދިކޮޅު މެންބަރުން އިސްލާހު ހުށަހެޅިއެވެ. ސަލާމަތީ ހިދުމަތްތަކުގެ ކޮމެޓީގެ އަޣުލަބިއްޔަތު އިދިކޮޅު ފަރާތްތަކަށް އޮންނަ ގޮތް ހެދުމަށް ވެސް އިދިކޮޅު މެންބަރުން އިސްލާހު ހުށަހެޅިއެވެ.
އެެ އިސްލާހުތަކަށް ވަކިވަކިން ވޯޓަށް އެހި އިރު ޖަލްސާގައި ބައިވެރިވެވަޑައިގެން ތިއްބެވި އެމްޑީޕީގެ ހުރިހާ މެމްބަރުން ވެސް ވޯޓް ދެއްވީ އެ އިސްލާހުތަކާ ދެކޮޅަށެވެ. އެހެންވެ އެ ހުރިހާ އިސްލާހުތައް ވެސް ފާސްކުރަން ނުފެންނަ ކަމަށް 34 މެމްބަރަކު ވޯޓް ދެއްވިއެވެ. ފެންނަ ކަމަށް ވޯޓް ދެއްވީ 13 މެމްބަރެކެވެ.
ކޮމިޓީތަކުގައި މެންބަރުން ތަމްސީލުކުރާނެ ނިސްބަތް:
– އެމްޑީޕީ – 113 ސްލޮޓް – 62 ޕަސަންޓް
– ޕީޕީއެމް – 11 ސްލޮޓް – ހަ ޕަސަންޓް
– ޕީއެންސީ – 7 ސްލޮޓް – ތިން ޕަސަންޓް
– އެމްއެންޕީ – 7 ސްލޮޓް – ތިން ޕަސަންޓް
– ޖުމްހޫރީ ޕާޓީ – 5 ސްލޮޓް – ދެ ޕަސަންޓް
– އެމްޑީއޭ – 5 ސްލޮޓް – ދެ ޕަސަންޓް
– ވަކި ޕާޓީއަކަށް ނިސްބަތް ނުވާ މެންބަރުން – 35 ސްލޮޓް – 21 ޕަސަންޓް
ދާއިމީ ކޮމިޓީތަކުގައި މެންބަރުން ތަމްސީލުކުރާނެ ނިސްބަތް ފާސްވުމުން އެ ނިސްބަތުން މެންބަރުން އައްޔަންކުރަން ކޮމިޓީތަކުގައި ތަމްސީލުކުރާނެ މެންބަރުންގެ ނަންތައް މިރޭ 9:00 ގެ ކުރިން ފޮނުވައިދިނުމަށް މަޖިލީހުގެ މިއަދުގެ ޖަލްސާގައި ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފު އެދިވަޑައިގެންނެވިއެވެ. ހަސަން އަފީފު ވިދާޅުވި ގޮތުގައި މަޖިލީހުގެ ކޮމިޓީތަކަށް މިނިވަން މެންބަރުން އައްޔަންކުރާނީ މަޖިލީހުގެ ރައީސްއެވެ.
