ދާޖަހައިގެން ގެންގޮސް ގޮޅިތަކުގެ ތެރެއަށް އާޅާލެވުނު ދުވަސް ދެކެން ބޭނުމެއް ނޫން ކަމުގައި ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން ވިދާޅުވެއްޖެއެވެ.

ށ. ފޯކައިދޫގައި ރައީސް ޞާލިޙްގެ ކެމްޕެއިން ލޯންޗްކުރުމަށް ބޭއްވި ޖަލްސާގައި ވާހަކަދައްކަވަމުން މި ސަރުކާރުގެ ހޯމް މިނިސްޓަރުކަމުގެ މަގާމު ވެސް އަދާކުރައްވަމުން ގެންދަވާ އިމްރާން ވިދާޅުވީ، ކޯލިޝަނަކީ ދައުރެއް ނިމެންދެން ދެމެހެއްޓޭނެ އެއްޗެއްކަން ރާއްޖޭގެ ތާރީޚުގައި ފުރަތަމަ ފަހަރަށް ރައީސް ޞާލިޙް ސާބިތުކޮށްދެއްވާފައިވާ ކަމަށެވެ.

ރައީސް ޔާމީންގެ ފަސް އަހަރުގެ ވެރިކަމުގައި ކުރިމަތިވި ދަތިތަކުގެ ހަނދާން އާކުރައްވަމުން މިސާލުގެ ގޮތުގައި ފާހަގަ ކުރެއްވީ އޭރުގެ ޑިފެންސް މިނިސްޓަރު މުހައްމަދު ނާޒިމް ކޮޓަރިއަށް ފިސްތޯލައެއް ލުމަށް ފަހު، އޭނާ ފްރޭމްކޮށް ހައްޔަރުކުރުމާއި، ސިޔާސީ ލީޑަރުން ހައްޔަރުކުރުމާއި ސުޕްރީމް ކޯޓުގެ ފަނޑިޔާރުން ހައްޔަރުކުރުމާއި ރައްޔިތުންގެ މަޖިލީހުގެ މެމްބަރުން އެ މަޖިލީހުން ބޭރުކުރުމާއި، ވިޔާފަރިވެރިންނަށް ޖެއްސި ދުއްތުރާ ޖެއްސިކަން އިމްރާން ވަނީ ފާހަގަ ކުރައްވާފައެވެ.

ސިޔާސީ ހަރަކާތްތަކުގެ ލީޑަރުންނާއި ސިޔާސީ މަސައްކަތެއް ކުރިހާ މީހަކު ދާޖަހައިގެން ގެންގޮސް ގޮޅިތަކުގެ ތެރެއަށް އާޅާލެވުނު ދުވަސް ދިވެހިން ދެކޭކަށް ބޭނުމެއް ނުވާނެ.

– އިމްރާން ވިދާޅުވިއެވެ.

އިމްރާން ވިދާޅުވީ ކޯލިޝަނެއް ދެމި އޮންނަނީ އޭގައި މުހިއްމު ސިފަތަކެއް ހުރެގެން ކަމަށާއި ކޯލިޝަނުގެ ބައިވެރިން އެއް ބަޔަކު އަނެއްބަޔަކަށް އިހުތިރާމުކުރާ ބަޔަކަށްވާން ޖެހެއެވެ. އަދި ކޯލިޝަނުގެ ބައިވެރިންނަކީ ކަންކަމުގައި އެއްބަޔަކު އަނެއްބަޔަކާއި މަޝްވަރާކުރެވޭ ބަޔަކު ކަމުގައި ވާންޖެހޭ ކަމަށާއި، ތަހައްމަލު ކުރުމުގެ ޤާބިލިއްޔަތުކަން ވެސް ހުންނަ ބަޔަކަށް ވާންޖެހޭނެ ކަމަށް މިނިސްޓަރު ވިދާޅުވިއެވެ.

ކޯލިޝަނުގެ ބައިވެރިންގެ އެންމެ މުހިއްމު އެއް ސިފައަކީ އެންމެންގެ ތަފާތުތައް ނައްތާލައި ގައުމީ މަސްލަހަތު އިސްކޮށްގެން ގައުމައިގެން ކުރިއަށްދިއުމުގެ މަޝްވަރާ އާއި އުފެއް ދުންތައް އިސްކުރުން. ރައީސް ޞާލިޙް ވަނީ އެކަން ކިތަންމެ ރަނގަޅަކަށްވެސް ދައްކަވާފަ.

– އިމްރާން ވިދާޅުވިއެވެ.

ކޯލިޝަނުން ވަކިވެދިޔަ ސިޔާސީ ބޭފުޅުންނަށް އަމާޒުކުރައްވައި ވާހަކަދައްކަވަމުން އިމްރާނު ވިދާޅުވީ، އަދުގެ ސަރުކާރުގެ ކޯލިޝަން ހަޔާތުގެ މިހާހިސާބަށް އައިއިރު، ކޮންމެވެސް ވަރެއްގެ ނުތަނަވަސްކަމަކާ ކުރިމަތިލާން ޖެހުނުކަމަށެވެ. ރާއްޖެ ދެކެމުން މިދާ ހުރިހާ އުފަލަކާއި ހުރިހާ ތަރައްގީއަކާއި ކުރިއެރުމެއް ގެނެސްދެނީ ރައީސް ސޯލިހުގެ ކޯލިޝަންގައި އެންމެން އެކުވެ ބައިވެރިވެގެން މިއަދާ ހަމައަށް ތިބުމުން ކަމަށް ވެސް އިމްރާން ވިދާޅުވިއެވެ.