ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ވާދަކުރާ ސިޔާސީ ޕާޓީތަކުގެ ޢީދު ބަންދު ނިމުމާއިއެކު ކެމްޕެއިންގެ ހަރަކާތްތައްތައް ފުޅާކޮށް، މާލެއާއި ރާއްޖޭގެ އެކި ކަންކޮޅުތަކުގައި ކެމްޕެއިން ހަރަކާތްތައް ފުޅާކޮށްފިއެވެ.
މިއިންތިޚާބުގައި ވާދަކުރައްވާ ޕާތީތަކުގެ ތެރެއިން އެމްޑީޕީއާއި، ޕީޕީއެމްއާއި، ޖޭޕީއާއި، އެމްއެންޕީން ދަނީ މާލެއާއި އަތޮޅު ތެރޭގައި ކެމްޕެއިން ހަރަކާތްތައް ހިންގަމުންނެވެ. މިފަހަރުގެ އިންތިޚާބަށް ރަށްރަށަށް ކެނޑިޑޭޓުންނާއި ތާއީދުކުރައްވާ ބޭފުޅުން ވަޑައިގެން ގިނަ ވައުދުތަކާއި އަހުދުތައް ވާނެކަމަށް ގިނަ ބަޔަކު ދެކެއެވެ.
ރައީސް ޞާލިހުގެ ކެމްޕެއިން މާލެއާއި، އަތޮޅުތަކުގައި:
ޕާޓީތަކުގެ ރިޔާސީ ކެމްޕޭނަށް ބަލާއިރު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ކެމްޕޭން މިއަދު އެންމެ ފުޅާކޮށް ކުރިއަށް ގެންދިޔައީ މާލޭގެ މާފަންނު މެދު ދާއިރާ ގައެވެ. ރައީސް ސޯލިހްގެ ކެމްޕޭން ހަރަކާތެއްގެ ގޮތުގައި މިއަދު މާފަންނު މެދު ދާއިރާގައި ކުރިއަށް ގެންދިޔައީ ދޮރުންދޮރަށް ހިނގުމުގެ ހަރަކާތެކެވެ. މިހަރަކާތުގައި އިސްކޮށް ހުންނެވީ ޑިފެންސް މިނިސްޓަރު އަދި މާލޭގެ ކޯޑިނޭޓަރު މާރިޔާ ދީދީއެވެ. މީގެއިތުރުން ރައީސް ސޯލިހްގެ ކެމްޕޭން ޓީމުތަކެއް ގެންދަނީ އަތޮޅު ތެރޭގެ ބައެއް ރަށްތަކުގައިވެސް ހަރަކާތްތެރިވަމުންނެވެ.
އެމްޑީޕީ ރިޔާސީ ކެންޑިޑޭޓް ރައީސް @ibusolih ގެ ކެމްޕެއިން ދޮރުން ދޮރުން ހަރަކާތް މާފަންނު މެދު ދާއިރާގައި މާލެ އޭރިޔާ ކޯރޑިނޭޓަރ @MariyaDidi އާއި ދާއިރާ ރައީސް @AhmedAmirT11 އަދި މާލެ ޓީމް އާއި އެކު ކުރިއަށް ދަނީ #Ibu2023 #UfaaveriAmaanRaajje pic.twitter.com/WxGlxzM0oT
— Hussain Shafiu (@charly_thuthu) July 7, 2023
ޕީޕީއެމްގެ ކެމްޕެއިން ހަރަކާތްތައް ކުރިއަށް:
ޕީޕީއެމް/ޕީއެންސީން މިދިޔަ ހަފްތާ މާލޭގައި ކެމްޕެއިން ފެށީ ދޮރުންދޮރަށް ހިނގުމުގެ ހަރަކާތާ އެކުގައެވެ. އަދި އަންނަ ހަފްތާ އެ ޕާޓީން އަތޮޅުތަކަށް ދަތުރުތައް ފަށާނެ ކަމަށް ވަނީ ބުނެފަ އެވެ. އެންމެ ފުރަތަމަ ދާނީ ނ. ރ. ބ. އަދި ޅ. އަތޮޅަށް ކަމަށް އެ ޕާޓީން ބުންޏެވެ.
ޕީޕީއެމްގެ ކެންޑިޑޭޓަކީ މަނީ ލޯންޑަރިން އާއި ރިޝްވަތުގެ ކުށުގައި 11 އަހަރަށް ޖަލަށް ލާފައިވާ ކުރީގެ ރައީސް ޔާމީނެވެ. އެކަމަކު އެ ޕާޓީން ޔަގީންކަމާ އެކު ބުނަމުން އަންނަނީ ޔާމީނަށް އިންތިހާބުގައި ވާދަކުރެއްވޭނެ ކަމަށެވެ.
ރައީސް ޔާމީން 2023 ކެމްޕޭންގެ ޚާއްސަ ހަރަކާތް
މާލެ ސަރަހައްދުގެ ދޮރުން ދޮރަށް ހިނގަން ފެށުން.
#RY2023
#FreePresidentYameen pic.twitter.com/xNuMmfSKWp— Progressive Party of Maldives (@ProgressPartyMV) July 3, 2023
ޖޭޕީގެ ކެމްޕެއިން ހުއްޓުމެއްނެތި ކުރިއަށް:
ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމްގެ ރިޔާސީ ކެމްޕޭން ހަރަކާތްތަކަށް ބަލާއިރު ގާސިމްގެ ކެމްޕޭން ޓީމެއް ގެންދަނީ ހއ، ހދ، ރ އަދި ބ. އަތޮޅުގައި ހަރަކާތެރިވަމުންނެވެ. ލ. އަތޮޅާއި މާލޭގައި ވެސް ގާސިމްގެ ކެމްޕޭން ހަރަކާތްތަކެއް ކުރިއަށްދާ ކަމަށް އެ ޕާޓީން ބުނެއެވެ.
— Qasim2023 (@qasim2023mv) July 6, 2023
ނާޒިމް ކުޅުދުއްފުށީގައި:
އެމްއެންޕީގެ ރިޔާސީ ކެންޑިޑޭޓް މުހައްމަދު ނާޒިމު މިރޭ ހުންނެވީ ހދ. ކުޅުދުއްފުށީ ގައެވެ. ނާޒިމު ބައިވެރިވާ ބޮޑު ޖަލްސާއެއް މިރޭ ކުޅުދުއްފުށީގައި ބޭއްވުމަށްވެސް ހަމަޖެހިފައިވެއެވެ. ނާޒިމު ބާއްވާ މި ޖަލްސާގައި ބޮޑުތިލަދުންމަތީގެ ތަރައްގީގެ ޕްލޭންތަކާއި ނާޒިމުގެ ހާރިޖީ ސިޔާސަތާއި ދިޕާއީ ސިޔާސަތާ ގުޅޭ މައުލޫމާތު ހިއްސާކުރުމަށް ހަމަޖެހިފައިވެއެވެ.
އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމްގެ ކެމްޕެއިން އިތުރަށް ފުޅާކުރުމުގެ ގޮތުން ބޮޑު ތިލަދުންމައްޗަށް ކުރާ ދަތުރުފުޅުގެ ތެރެއިން ހދ.ކުޅުދުއްފުއްޓަށް މިއަދު ވަނީ ދަތުރުކުރައްވާފައި.#nazim2023 #ujaalaazamaan pic.twitter.com/fm5nH8xCIS
— Nazim2023 (@nazim2023mv) July 7, 2023
އެމްޑީޕީތެރޭ އުފެދުނު މައްސަލަތަކުގައި އެ ޕާޓީން ވަކިވެ، މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވާ ބޭފުޅުން އުފައްދަން މަސައްކަތްކުރައްވާ ޑިމޮކްރެޓްސްގެ ހަރަކާތްތައް ވެސް އަންނަނީ ރާއްޖޭގެ އެކި ހިސާބުތަކުގައި ފުޅާކުރަމުންނެވެ. އެ ޕާޓީން ވެސް އިންތިހާބުގައި ވާދަކުރާނެ ކަމަށް ބުނެފައި ވިޔަސް އަދި ކެންޑިޑޭޓަކީ ކާކު ކަމެއް ނޭނގެއެވެ.
މިއަހަރު ބާއްވާ ރިޔާސީ އިންތިޚާބު އޮންނާނީ ސެޕްޓެމްބަރު މަހުގެ 9 ވަނަ ދުވަހުއެވެ. އަދި ދެވަނަ ބުރެއް ބާއްވަން ޖެހިއްޖެނަމަ ސެޕްޓެމްބަރު 30ގައި ބޭއްވުމަށް އިލެކްޗަންސް ކޮމިޝަނުން ވަނީ ނިންމަވާފައެވެ.
