މިއަހަރު ހައްޖަށް ދިޔަ އިތުރު ދިވެހި ހައްޖާޖީއަކު ނިޔާވެއްޖެއެވެ.
އިސްލާމިކް މިނިސްޓްރީން ބުނެފައިވަނީ މޯލްޑިވްސް ޙައްޖު ކޯޕަރޭޝަން ލިމިޓެޑްގެ ހަވާލުގައި މިއަހަރު ދިވެހިރާއްޖެއިން ޙައްޖަށް ދިޔަ ޙައްޖުވެރިޔަކު ކަމުގައިވާ ހއ. ކެލާ، ސީށާންގެ، ޢަލީ ގާސިމް (81)މަދީނާގެ ހޮޓަލުގައި ނިޔާވެފައި ވާކަމުގައެވެ.
ގާސިމް ނިޔާވި ވަކި ސަބަބެއް އިސްލާމިކް މިނިސްޓްރީން ހާމަ ކޮށްފައެއް ނުވެއެވެ.
ގާސިމްއަކީ މިއަހަރު ރާއްޖެއިން ހައްޖަށްދިޔަ މީހުންގެ ތެރެއިން ނިޔާވި ތިންވަނަ މީހާއެވެ.
ހައްޖު ކޯޕަރޭޝަންއިން ހައްޖަށްދިތަ މީހަކު މީގެ ކުރިންވެސް ނުވާވެފައި ވަނިކޮށް، އަލް-ހަރަމައިން ހައްޖު ގްރޫޕުގެ ބެލުމުގެ ދަށުން ހައްޖަށް ގޮސް އުޅެނިކޮށް ގެއްލިގެން ހޯދަމުން ދިޔަ ރ. މާކުރަތު، އުމުރުން 72 އަހަރުގެ މުހައްމަދު ނަސީމްވެސް ވަނީ ނިޔާވެފައެވެ. އޭނާ ނިޔާވެފައި އޮއްވާ ފެނިފައިވަނީ ގެއްލިގެން ހޯދަމުން ދަނިކޮށް 4 ދުވަސްް ފަހުންނެވެ.
އިސްލާމިކް މިނިސްޓްރީން ވިދާޅުވެފައިވަނީ، އޭނާ ނިޔާވެފައި ވަނިކޮށް ފެނިފައިވަނީ ނޫރު ފަރުބަދައާއި ދިމާލުން އިއްޔެ ރޭގެ ދަންވަރުގެ ވަގުތެއްގައި ކަމުގައެވެ. އަދި އޭނާ ފެނިގެން ހޮސްޕިޓަލަކަށް ގެންދިޔައިރުވެސް ނިޔާވެފައިވާކަން ހޮސްޕިޓަލުން ކަށަވަރު ކޮށްދީފައިވާކަމަށްވެސް އިސްލާމިކް މިނިސްޓްރީ މައުލޫމާތު ދީފައި ވެއެވެ.
