ކ. ގުޅޫފަޅުގެ ބިން ހިއްކުމުގެ މަޝްރޫޢު ރައީސް ސާލިހު މިއަދު ފައްޓަވާ ދެއްވައިފިއެވެ.
ބިޑް ކުރުމަކާ ނުލާ، ނެދަލޭންޑްސްގެ ބޮސްކާލިސް ކުންފުންޏާއި ހަވާލުކޮށްގެން ކުރިޔަށް ގެންދާ މި މަޝްރޫޢުގެ ދަށުން 150 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ބޮސްކާލިސް ކުންފުންޏާއި މި މަޝްރޫޢު ހަވާލުކޮށްފައިވަނީ އޮކްޓޯބަރު 17، 2019 ގައެވެ. މިމަޝްރޫއަށް ދެ ބިލިޔަނެއްހާ ރުފިޔާ ހޭދަވާނެއެވެ.
މިމަޝްރޫޢު ފައްޓާވާ ދެއްވުމަށް މިއަދު ބޭއްވުނު ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވީ، ގުޅީފަޅު ބިން ހިއްކުމުގެ މަޝްރޫއަކީ މާލެ ސަރަހައްދުގައި ދިރިއުޅެމުންދާ މީހުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ކޮންމެވެސް ވަރެއްގެ ހައްލެއް ގެނެސްދޭނެ މަޝްރޫޢެއް ކަމުގައެވެ.
އަދި ރައީސް ސާލިހު ވިދާޅުވީ، މިއީ މާލެ ސަރަހައްދުގައި ކުރިޔަށްދާ މަޝްރޫޢެއް ނަމަވެސް މިއީ ހއ. އުލިގަމުން ފެށިގެން އައްޑޫ ސިޓީ ގަމާ ހަމައަށް ފެތުރިގެންދާނެ ތަރައްގީގެ ބިޔަ މަޝްރޫޢެއް ކަމުގައެވެ.
އަދި މިއީ މާލެ ސަރަޙައްދުގެ ތަރައްޤީއަށް ބޮޑެތި ބަދަލުތަކެއް ގެނުވާނެ މަޝްރޫޢެއް ކަމަށާ، މި މަޝްރޫޢާ ގުޅިފައިވާ އެންމެ މުހިންމު ކަމަކީ، މާލެ ސަރަޙައްދުގެ ބޯހިޔާވަހިކަމަށް ހެޔޮ ބަދަލުތަކެއް ގެނައުންކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސް ސާލިހުގެ ވާހަކަފުޅުގައި، ބިންވެރިޔާ ސްކީމަކީ، މާލެ ސަރަޙައްދުން ބަންޑާރަ ގޯތި ދޫކުރުމަށް، ރާއްޖޭގެ ތާރީޚުގައި ވެސް މިހާތަނަށް ހިންގާ އެންމެ ބޮޑު މަޝްރޫޢުކަން ފާހަގަކުރައްވައި، މިމަޝްރޫޢުގެ ސަބަބުން މުޅިރާއްޖެއަށް އެތައް މަންފާއެއް ލިބޭނެކަން ފާހަގަކުރެއްވިއެވެ. މިގޮތުން މާލޭގެ ވިޔަފާރި ބަނދަރު ގުޅިފަޅަށް ބަދަލުކުރުމާއި އަދި ގުޅިފަޅުގައި ބައިނަލް އަޤުވާމީ ވިޔަފާރި ބަނދަރެއް ތަރައްޤީކުރުމުން ލިބިގެންދާނެ އިޤުތިޞާދީ މަންފާތަކުގެ މައްޗަށްވެސް ރައީސް ސާލިހުގެ ވާހަކަފުޅުގައި އަލިއަޅުއްވާލެއްވިއެވެ.
ގުޅިފަޅު ބިންހިއްކުމުގެ މަޝްރޫޢަކީ، ބޮސްކާލިސް ވެސްޓްމިންސްޓަރ ކޮންޓްރެކްޓިންގ ލިމިޓެޑާ ހަވާލުކުރައްވައިގެން ސަރުކާރުން ކުރިޔަށް ގެންދަވާ މަޝްރޫޢުއެކެވެ. މިމަޝްރޫޢުގެ ދަށުން ޖުމުލަ 150 ހެކްޓަރުގެ ބިން ހިއްކާނެއެވެ. މިބިމުގެ ތެރޭގައި ސަރުކާރުގެ ބިންވެރިޔާ ޕްރޮގްރާމްގެ ދަށުން ގޯތި ދޫކުރާ ބިމާއި، މާލޭ ވިޔަފާރި ބަނދަރު، ގުޅިފަޅަށް ބަދަލުކުރުމަށް ބޭނުންވާ ބިން ހިމެނެއެވެ.
ކޮމެންޓު ފޮނުވާ