ގއ. ވިލިނގިލީގައި ނިވާކަން ކުޑަ ހެދުން ލައިގެން ޢީދު ފާހަގަ ކުރުމަށް ނެށި ނެށުމާއިއެކު ގިނަ ބަޔެއްގެ ނުރުހުން އަމާޒުވެއްޖެއެވެ.

މިފަހަރުގެ ބޮޑު އީދަށް ވިލިނގިލިން ގެންދިޔަ މާލޭގައި ނަށާ ގުރޫޕެއް ކަމަށްވާ "ގޮމަ" ގްރޫޕެވެ. އެގްރޫޕުން ވަނީ ނިވާކަން ކުޑަ އެހުދުން އަޅައިގެން މިމަހުގެ 28 ވަނަ ދުވަހުގެ ރޭ ޝޯއެއް އެރަށުގައި ދީފައެވެ.

ސޯޝަލް މީޑިއާގައި އާންމު ވެފައިވާ ވީޑިއޯތަކުން ފެންނަ ގޮތުގައި އެގްރޫޕުގައި ބުރުގާ އަޅައިގެން ތިބި މީހުންވެސް ތިއްބެވެ. ކުރު ހެދުން ލައިގެން އެމީހުން ތިބިއިރު، ބެލެވޭ ގޮތުގައި އެމީހުން ތިބީ ނިވާކަން ކުޑަކަމަށް ސިފަވާގޮތަށް ގަޔަށް ބާރު ހަމުގެ ކުލައިގެ އެއްޗެއް ލައިގެންނެވެ. މިކަމާއި ގުޅިގެން ގިނަ ބައެއްގެ ފާޑު ކިޔުން ވަނީ އަމާޒުވެފައެވެ.

މިކަން އެންމެ ހަރުކަށި އިބާރާތުން ކުށްވެރިކޮށް ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ކުރެއްވި ޓުވީޓުގައި ވިދާޅުވީ ޙައްޖުގެ މަތިވެރި އަޅުކަމާ ގުޅިގެން އަންނަ އަޟުޙާ އީދަކީ ނުހަނު މަތިވެރި މާތް ޢީދުކަމަށެވެ. އެތައް ހެޔޮކަމެއް އެކުލެވިގެންވާ މާތް ދުވަސްތަކެއްގައި އަންނަ ޢީދުގައި، ފާހިޝް ނެށުންތަކާއި މުންކަރާތްތަކުން މިއީދުގެ މަތިވެރިކަން ނަގާލުމަކީ އެއްވެސް މުސްލިމަކު ކޮށްގެންވާނެ ކަމެއްނޫން ކަމަށެވެ.

މާތް ރަސްކަލާންގެ ވަނީ ކީރިތި ޤުރުއާނުގައި މި ދުވަސްތަކަށް ތަޢުރީފުކުރައްވާފަ. ސަޤާފީކަންކަމާއި ކުޅިވަރާއި އެނޫންވެސް ކަންކަމުގައި އިސްލާމްދީނުގައި ނަހީކުރައްވާފައިވާ ކަމެއް ނުހިމެނޭ ކޮންމެ ކަމަކުން ޢީދުގައި އުފާފާޅުކުރެވޭނެ.

– ޑރ.ޝަހީމް ވިދާޅުވިއެވެ.

ޙައްޖުގެ މަތިވެރި އަޅުކަމާ ގުޅިގެން އަންނަ އަޟުޙާ އީދަކީ ނުހަނު މަތިވެރި މާތް ޢީދެއް. އެތައް ހެޔޮކަމެއް އެކުލެވިގެންވާ މާތް ދުވަސްތަކެއްގައި އަންނަ ޢީދެއް. ފާހިޝް ނެށުންތަކާއި މުންކަރާތްތަކުން މިއީދުގެ މަތިވެރިކަން ނަގާލުމަކީ އެއްވެސް މުސްލިމަކު ކޮށްގެންވާނެ ކަމެއްނޫން. 👇

— Mohamed Shaheem Ali Saeed (@Mohamedshaheem1) June 29, 2023

މިކަމުގެ ކަންބޮޑުވުން ފާޅު ކުރައްވައި ދީނި އިލްމުވެރިޔާ ޝައިޚު ޒައިދާއި، ޑރ.އިޔާޒު ވިދާޅުވި މިފަދަ ނާތަހުޒީބު ޢަމަލުތަކަށް ހިތްވަރުދީ ހެދުމަކީ އެއްގޮތަކަށްވެސް ކޮށްގެންވާނެ ކަމެއް ނޫންކަމަށެވެ. އަދި މިއީ ރަށްރަށުގައިވެސް އަދި މާލޭގައި ކުރުމަށް ޖާގަ ދެވިގެންވާނެ ކަންތައްތަކެއް ނޫންކަމަށާއި، މިއީ ކަޑައެޅިގެން މުންކަރާތް ކަމުގައި އެދެބޭފުޅުން ވިދާޅުވިއެވެ.

މިފަދަ މުންކަރާތްތައް މަނާކޮށް ހުއްޓުވުމަކީ ކޮންމެ މީހަކުވެސް އެމީހެއްގެ ކުޅަދާނަކަން ހުރި މިންވަރަކުން ކުރަންޖެހޭ ކަމެއް. https://t.co/QB6fUQrkBB

— Dr.Mohamed Iyaz (@dr_iyaz) June 30, 2023

ދީނީ އިލްމުވެރިޔާ ޒަމްޒަމް ފާރިޝް ކުރެއްވި ޓްވީޓެއްގައި ވިދާޅުވެފައިވަނީ ކުޅިވަރުގެ ނަމުގައި ހިންގާ ލަނގިރި ޖެހުމާއި ނާޗަރަންގީގެ ކަސްބިއްޔާތުގެ ޢަމަލު ހިންގާ މީހުންނަކީ ބޮޑެތި ފާޖިރުން ކަމަށެވެ. އަދި އެބައިމީހުންނަށް ވުރެ ބޮޑެތި ފާޖިރުންނަކީ ވަކި ވެރިކަމެއްގައި އެކަންކުރީމަ އެކަންކަމާ ދެކޮޅަށް ބަސްބުނެ، އަނެއްބައި ވެރިކަންތަކުގައި އެކަންކުރީމަ ހަނު ތިބޭ މީހުން ކަމަށެވެ.

ޢަޖައިބެއް ފަދަ ކަމެކެވެ. ޢީދުގެ ނަމުގައި ޅަދަރިމައިން އެއްކޮށްގެން އިންތިހާއަށް ބަރަހަނާކަން ހާމަކޮށްގެން ކަސްބިއްޔާތު ޢާއްމު ކުރާއިރު އިސްލާމިކް މިނިސްޓްރީއާއި ދެން ތިބީން ހަމަ އެއްވެސް ބަހެއް ބުނެނުލާ އެތިބެނީ އެބައިމީހުންގެ އަނގަޔަށް އަނގުރު އަލިފާން އެޅިފައި ތިބީމަ ބާއޭ 👇🏻 pic.twitter.com/DHIahatz8D

— ZamzamFarish – ޒަމްޒަމް ފާރިޝް (@ZamzamFarish) June 30, 2023

މިކަމާއި ގުޅިގެން ގިނަ ރައްޔިތުންގެ ނުރުހުމާއި، ރުޅިވެރިކަން އިތުރުވެ މިކަން ބަލައި ފިޔަވަޅު އެޅުމަށް ވަނީ ގޮވާލާފައެވެ. އަދި ބައެއް ޢާންމު ރައްޔިތުން ވަނީ ގޮމަ ގްރޫޕަށް ޢީދާއި މިފަދަ ހަރަކާތްތަކާއި ގުޅިގެން އިތުރަށް ފުރުސަތު ނުދޭން ގޮވާލާފައެވެ.