ޒިނޭކުރުމަކީ ބޮޑުވެގެންވާ ފާފައެކެވެ. ޒިނޭކުރިކަން ޘާބިތުވާނީ ހަތަރު ހެކިންނަށް އެއްފަހަރާ މަންޒަރު ފެނިގެންނެވެ.

މާނައަކީ ފިރިހެންމީހާގެ ޒަކަރުން ފާޅުވާ ހިސާބު އަންހެންމީހާގެ ފަރްޖުގެ ތެރެއަށް ވަދެފައިވަނިކޮށް ފެނިގެންނެވެ. ނޫންނަމަ ދެމީހުންކުރެ އެކަކު އެކަމަށް އެއްބަސް ވުމުންނެވެ.

މިނޫން ގޮތަކުން އެއްވެސް މީހަކު ޒިނޭ ކުރިކަމަށް ޘާބިތެއް ނުވާނެއެވެ. އެހެންކަމުން، ޝައްކުގެ މައްޗަށް ބިނާކޮށް މީހެއްގެ ބޮލުގައި ޒިނޭގެ ތުހުމަތު އެޅުވުމަކީ ބޮޑުވެގެންވާ ފާފައެކެވެ. މިފަދަ ކަންތަކަށް ޝަރީޢަތުގައި ކިޔެނީ "ގަޛްފު" ކުރުމެވެ. ގަޛްފު ކޮށްފި މީހެއްގެ އަދަބަކީ އަށްޑިހަ އެތިފަހަރުން ޙައްދުޖެހުމެވެ.

ކީރިތި ގުރްއާނުގެ ނޫރު ސޫރަތުގެ 4 (ހަތަރެއް) ވަނަ އާޔަތުގެ މާނާގައިވެއެވެ. "އަބުރުވެރި، (ޢިއްފަތްތެރި) އަންހެނުންނާއި، ޒިނޭއާއި މަތިކޮށް، (ގަޛްފުކޮށް) އުޅޭމީހުން، އެއަށްފަހު، (ގަޛްފުކުރުމަށްފަހު) އެކަމުގެ މައްޗަށް (ޒިނޭކުރިކަމުގެ މައްޗަށް) ހަތަރު ހެކީން ނުގެނައިނަމަ، އެބައިމީހުން ކޮންމެ މީހަކު އަށްޑިހަ އެތިފަހަރުން ޙައްދު ޖަހާށެވެ". ފިރިހެނެއްގެ ބޮލުގައި ޒިނޭގެ ތުހުމަތު އެޅުވިނަމަވެސް ހަމަ މި ޙުކުމް އަންނާނެއެވެ.

ނޫރު ސޫރަތުގެ 23(ތޭވީސް) ވަނަ އާޔަތުން ދޭހަވާ ގޮތުގައި ޢިއްފަތްތެރި އަންހެނެއްގެ ބޮލުގައި ޒިނޭގެ ތުހުމަތު އަޅުވައިފި މީހަކަށް ދުނިޔޭއާއި އާޚިރަތުގައި ލަޢުނަތް ހުއްޓެވެ. އަދި އާޚިރަތް ދުވަހުން ވެސް ގަދަފަދަ ވެގެންވާ ޢަޛާބު ހުއްޓެވެ. މި ޙުކުމް ގެ ތެރެއަށް ފިރިހެނުން ގެ ބޮލުގައި ޒިނޭގެ ތުހުމަތު އަޅުވާމީހުން ވެސް ވަންނާނެއެވެ.

ރަސޫލާ-ޞައްލަﷲ ޢަލައިހި ވަސައްލަމަ- ޙަދީޘް ކުރައްވާފައިވެއެވެ. "ނުބައިކަން ބޮޑުވެގެންވާ ހަތް ކަމަކުން ތިޔަބައިމީހުން ދުރުހެލިވެ ރައްކައުތެރިވާށެވެ. އެހިނދު ޞަޙާބީން ދެންނެވިއެވެ. "އެއީ ކޮންކަންތަކެއްތޯއެވެ"؟ ޙަދީޘް ކުރެއްވިއެވެ. "ﷲ އަށް ޝިރްކު ކުރުމާއި، ސިޙުރު ހެދުމާއި، މާތް ﷲ ޙަރާމް ކުރެއްވި ނަފްސެއް ޙައްގަކާއި ނުލާ މެރުމާއި، ރިބާކެއުމާއި، ޔަތީމުންގެ މުދާކެއުމާއި، ހަނގުރާމައިގެ މައިދާނުން ފިލަން ދުވުމާއި، ޢިއްފަތްތެރި އަންހެނުން ގެ ބޮލުގައި ޒިނޭގެ ތުހުމަތު އެޅުވުމެވެ".

ކަމަކީ މިފަދަ ބޮޑު ކަމަކަށްވީ ހިނދު، މީހެއްގެ ބޮލުގައި ޒިނޭގެ ތުހުމަތު އެޅުވުމުގައި ރައްކާތެރިވާންވާނެއެވެ. މިފަދަ ކަމަކަށް އަރައިގަނެވިއްޖެމީހާ ވެސް މިކަމުން ތައުބާވެ، ތުހުމަތު އެޅުވުނު މީހާގެ ކިބައިން މާފަށް އެދެންޖެހޭނެއެވެ.

ފިރިމީހާ ނަހަމަ ގުޅުމެއް ހިންގާކަމަށް ޝައްކުވެއްޖެނަމަ، އޭނާއަށް ނަޞޭޙަތް ދިނުން ހުއްޓެވެ. އަދި އެފަދަކަންތައް ހުއްޓުވުމަށްޓަކައި ކުރެވެން ހުރި ހުރިހާ ކަމެއް ވެސް ކުރަންވާނެއެވެ. އެހެން ނަމަވެސް ޒިނޭކުރިކަން ޘާބިތު ނުވާހާ ހިނދަކު ޒިނޭ ކުރިކަމަށް އިލްޒާމް އަޅުވައިގެން ނުވާނެއެވެ.

واللهأعلموباللهالتوفيقوصلىاللهعلىمحمدوآلهوصحبهوسلم