ރައްޔިތުންގެ މަޖިލިސް ހުއްޓިފައި އޮތުމަކީ ގާނޫނީ ނިޒާމުގެ ތެރެއިން ހައްގުތައް ކަށަވަރު ކުރުމަށް އެޅިގެންދާ ހުރަހެއް ކަމުގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބުނެފިއެވެ.
އެޗްއާރްސީއެމް އިން މިއަދު ނެރުނު ނޫސް ބަޔާނެއްގައި ބުނެފައިވަނީ ދިވެހި ރައްޔިތުންނާއި ދިވެހި ރާއްޖޭގައި ދިރިއުޅޭ އެންމެންގެ ހައްގުތަކާ ގުޅުންހުރި ބިލްތަކުގެ މަސައްކަތް މަޖިލީހުގައި ފުރިހަމައަށް ކުރިއަށް ނުދިއުމަކީ ގާނޫނީ ނިޒާމުގެ ތެރެއިން ހައްގުތައް ކަށަވަރުކުރުމަށް އެޅިގެންދާ ހުރަހެއް ކަމަށެވެ.
ރައްޔިތުންގެ މަޖިލީހުގެ މަސައްކަތް ފުރިހަމައަށް ކުރިއަށް ނުދިއުމަކީ ގާނޫނުއަސާސީގެ ތިންބާރު ވަކިވެފައި އޮތުމާއި އެއްބާރު އަނެއްބާރަށް ފާރަވެރިވެ ހަރަކާތްތެރިވުމަށްވެސް ހުރަސްއެޅޭ ކަމެއްގެ ގޮތުގައި އެޗްއާރްސީއެމް އިން ބަޔާނުގައި ސިފަކޮށްފައިވެއެވެ.
ރައްޔިތުންގެ ހައްގުތަކާ ގުޅޭ ބިލުތަކެއް މަޖިލީހުގައި މަޑުޖެހިފައި އޮތް ކަމަށް އެޗްއާާރްސީއެމުން ބުނި ނަމަވެސް އެއީ ކޮން ބިލުތަކެއްކަން އެ ކޮމިޝަނުގެ ބަޔާނުގައި ނުބުނެއެވެ.
ރައްޔިތުންގެ މަޖިލީހަކީ ދައުލަތުގެ އެހެން ބާރުތަކާއި ވުޒާރާތައް ޒިންމާދާރު ކުރުވަން ހުރި ގުނަވަން ކަމަށްވާއިރު މަޖިލިސްގެ މަސައްކަތް މަޑުޖެހުމަކީ "އެއް ބާރު އަނެއް ބާރަށް ފާރަވެރިވެ، ޖަވާބުދާރީ ކުރުވުމަށް އޮތް ހުރަހެއް" ކަމަށް ވެސް އެޗްއާރްސީއެމުން ބުނެއެވެ. އޭގެ އިތުރުން، އިލެކްޝަންސް ކޮމިޝަނުގެ މެމްބަރެއްގެ ދައުރު ޖުލައި 25، އަށް ހަމަވާތީ މެމްބަރަކު ފާސް ކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަން ފާސްނުކޮށް ދައުރު ނިންމައި ޗުއްޓީއަށް ދިޔުމުން އެކަމާމެދު ވެސް އެޗްއާރްސީއެމުން ކަންބޮޑުވުން ފާޅު ކުރިއެވެ.
ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގައި ބުނެފައިވާ ގޮތުން ރައްޔިތުންގެ މަޖިލީހުގެ ދެ ވަނަ ދައުރުގެ ހިނގާނީ ޖޫން މަހުގެ އެންމެ ފަހު ބުރާސްފަތި ދުވަހާ ހަމައަށެވެ. އެހެން ނަމަވެސް ދައުރުން ބޭރުން ޖަލްސާ ބޭއްވުމަށް މަޖިލީހުގެ ގަވާއިދު ހުއްދަ ކުރެއެވެ.
