މޯލްޑިވްސް އިސްލާމިކް ބޭންކު (އެމްއައިބީ) އިން އެބޭންކުގެ އެންމެ މަގުބޫލު ފައިނޭންޝަލް ސްކީމް ކަމަށްވާ "އުޖާލާ ދިރިއުޅުން" ފެސިލިޓީއަށް އިތުރު ފުރިހަމަ ކަމެއް ގެނެސް، ކަސްޓަމަރުން ސްކީމުގެ ދަށުން ލިބޭ މާލީ ފުރުސަތުގެ މިންވަރު އިތުރު ކޮށްފިއެވެ.
މިގޮތުން އެމްއައިބީން ހާމަ ކޮށްފައިވާ ގޮތުގައި "އުޖާލާ ދިރިއުޅުން" މެދުވެރިކޮށް މީގެ ކުރިން 4،00،000 ރުފިޔާއާއި ހަމައަށް މުދާ ނެގޭނެ ގޮތަށް އޮތް ނަމަވެސް، މިހާ އެ ސްކީމު މެދުވެރިކޮށް 700،000 ރުފިޔާއާއި ހަމަޔަށް މުދާ ލިބޭނެ ކަމުގައެވެ.
ރާއްޖޭގައި ހިންގޭ އެންމެ މަގުބޫލު އެއް ފައިނޭންސިން ސްކީމް ކަމަށްވާ އެމްއައިބީގެ "އުޖާލާ ދިރިއުޅުން" ފެސިލިޓިއަކީ، އާންމު ދިރިރުއުޅުމަށް ބޭނުންވާ މުދާ، ކުރެޑިޓް އުސޫލުން، މަހުންމަހަށް ބަލާލައިގެން ދެއްކުމުގެ ފުރުސަތު ފަހިކޮށް ދީގެން، އިސްލާމީ ޝަރީޢާގެ ހަމަތަކާއި އުސޫލުތަކާ އެއްގޮތަށް ދެވޭ ފެސިލިޓީއެކެވެ. މިގޮތުން މި ފެސިލިޓީގެ ދަށުން ދޫކުރާ ތަކެތީގެ ތެރޭގައި، ފަރުނީޗަރު، އިލެކްޓްރޯނިކްސް، ފޯނު، ހިފާގެންގުޅޭ ތަކެތި، އައުޓްބޯޑު އިންޖީން، އިމާރާތް ކުރުމަށް ބޭނުންކުރާ ތަކެތި، ސޯލާޕެނަލް، މޮޓޯސައިކަލް ގެ އިތުރުން ވެސް އެހިނެހެން އާންމު ބޭނުންތަކަށް މުހިންމު މުދާ ހިމެނެއެވެ.
އެމްއައިބީން ހާމަ ކޮށްފައިވާ ގޮތުގައި ކުރިން މި ފެސިލިޓީއިން 400،000 ރުފިޔާއާއި ހަމަޔަށް މުދާ ލިބޭއިރު، ގެރެންޓަރއެއްވެސް ބޭނުންވާ ކަމުގައެވެ.
އެހެންނަމަވެސް މި ސްކީމަށް އިތުރަށް ފުރިހަމަކަން ގެނެސް، އާންމުންނަށް ލުއިފަސޭހަކަމާއެކު ސްކީމުން މުދާ ނެގުމުގެ ފުރުސަތު ފަހިކޮށް ދިނުމުގެ ގޮތުން، ސްކީމުން މުދާ ނެގޭ މިންވަރު 700،000 ރުފިޔާއަށް އިތުރު ކުރުމުގެ އިތުރުން ބޭންކުން މިހާރު ހަމަޖައްސާފައިވަނީ މިސްކީމުން މުދާ ނެގުމަށް ގެރެންޓަރއެއް ހުށަހަޅަން ނުޖެހޭ ގޮތަށެވެ.
އޭގެ އިތުރުން ސްކީމަށް ގެނެސްފައިވާ އިތުރު ބަދަލުތަކުގެ ތެރޭގައި، ފައިސާ އަބުރާ ދެއްކުމަށް ކުރިން އޮންނަ 4 އަހަރުގެ މުއްދަތު 5 އަހަރަށް ބަދަލު ކުރުންވެސް ހިމެނެއެވެ.
މިގޮތުން 22،000 ރުފިޔާގެ މުސާރަ ލިބޭ ފަރާތްތަކަށް މީގެ ކުރިން މި ފެސިލިޓީގެ ބޭނުން ކޮށްގެން ނެގެނެނީ 400،000 ރުފިޔާގެ މުދަލެވެ. އެހެންނަމަވެސް މި ގިންތީގެ ފަރާތްތަކަށް މިހާރު 460،000 ރުފިޔާ 5 އަހަރަށް ބަހާލައިގެން ދެއްކޭނެއެވެ. އަދި 34،000 ރުފިޔާގެ މުސާރަ ލިބޭ ފަރާތްތަކަށް 700،000 ރުފިޔާގެ މުދާ މި ސްކީމުން ނެގޭއިރު އެފަރާތްތަކަށްވެސް 5 އަހަރަށް ބަހާލައިގެން ފައިސާ އަނބުރާ ދެކުމުގެ ފުރުސަތު އޮންނާނެއެވެ.
އިސްލާމިކް ބޭންކުން ބުނެފައިވަނީ މި ސްކީމުން މުދާ ނަގަން ބޭނުންވާ ފަރާތްތަކަށް އޮންލައިންކޮށް ފޯމު ފުރާލެވޭނެ ކަމުގައެވެ.
އެމްއައިބީގެ "އުޖާލާ ދިރިއުޅުން" ސްކީމުގައި ބައިވެރިވެވޭނީ އުމުރުން 18 އަހަރު ފުރިފައިވާ، ސްކީމަށް އެޕްލައި ކުރުމުގެ ކުރިން ފާއިތުވާ 6 މަސްދުވަހު ވަޒީފާ އަދާކުރަމުން އައިސްފައިވާ ފަރާތްތަކަށެވެ. އަދި ކަސްޓަމަރު، ސްކީމަށް އެޕްލައި ކުރުމުގެ ކުރިން ފާއިތުވެފައިވާ 3 މަސްދުވަހު ވަޒީފާ އަދާކޮށްފައިވާ ފަރާތް ވާންވާނީ އެމްއައިބީން ގަބޫލުކުރާ ފަރާތެއް ކަމުގައެވެ.
