ކެނެޑާގައި ކުޑަ ބަހަކާއި ބޮޑު ޓްރަކެއް އެކްސިޑެންޓުވެ 15 މީހުން މަރުވެއްޖެއެވެ. އެކްސިޑެންޓުވި ކުޑަ ބަސް ދަތުރު ކުރަމުން ދިޔައީ އުމުރުން ދުވަސްމީ މީހުންގެ ގުރޫޕެއް ގޮވައިގެންނެވެ. މިއީ ފާއިތުވެދިޔަ އަހަރުތަކުގައި ކެނެޑާގައި ހިނގި މިފަދަ އެންމެ ނުރައްކާތެރި އެކްސިޑެންޓެވެ.
މި އެކްސިޑެންޓް ހިނގާފައިވަނީ، ކެނެޑާގެ ވިއްނިޕެގްގެ ހުޅަނގުން 170 ކިލޯމީޓަރު ދުރުން އޮންނަ މަނިޓޯބާގެ ހުޅަނގު ދެކުނުން އޮންނަ ކާބެރީގެ މައި ދެ މަގު ގުޅުވައިދޭ ޖަންކްޝަންގައެވެ. ސިބީސީ ނިއުސްއިން، ކާބެރީގައި ހުންނަ ކެސިނޯއެއްގެ ތަރުޖަމާންއާއި ހަވާލާދީ ރިޕޯޓު ކޮށްފައިވާ ގޮތުގައި ބަސް ދަތުރު ކުރަމުންދިޔައީ އެ ކެސިނޯއަށެވެ.
"މަދުވެގެން 15 މީހަކު މަރުވެފައިވާކަން މިހާރުވަނީ ޔަގީން ކުރެވިފައި"، މަނިޓޯބާ ރޯޔަލް ކެނޭޑިއަން މައުންޓެޑް ޕޮލިސް ކޮމާންޑުގެ އެސިސްޓެންޓް ކޮމިޝަނަރ ރޮބް ހިލް ވިދާޅުވެފައި ވެއެވެ.
ފުލުހުން މައުލޫމާތު ދީފައިވާ ގޮތުގައި ބަހުގައި 25 މީހަކު ދިޔައީ ދަތުރު ކުރަމުންނެވެ. އެކްސިޑެންޓުގައި އަނިޔާވި 10 މީހަކަށް ހޮސްޕިޓަލުގައި ފަރުވާ ދެމުންދާ ކަމުގައިވެސް ފުލުހުން ބުނެފައި ވެއެވެ.
ކެނެޑާގައި މިހާތަނަށް ހިނގާފައިވާ މިފަދަ އެންމެ ހިތާމަވެރި ހާދިސާއަކީ، 1997 ވަނަ އަހަރު، ދަތުރު ކުރަމުންދިޔަ ބަހެއް ކުއެބެކް ޕްރޮވިންސްގެ ވާދީއަކަށް ވެއްޓި 44 މީހުން މަރުވި ހާދިސާއެވެ.
