ޔުއެފާ ޗެމްޕިއަންސް ލީގުގެ ފައިނަލުގައި އިންޓަރ މިލާން ބަލިކޮށް މެންޗެސްޓާ ސިޓީން މުޅިން އަލަށް މުބާރާތުގެ ތަށި އުފުލާލައިފިއެވެ.
ތުރުކީވިލާތުގެ އިސްތަންބޫލްގެ އެޓަޓާކް ސްޓޭޑިއަމުގައި ރޭ ކުޅުނު މި މެޗް ސިޓީން ކާމިޔާބުކުރީ 1-0 ގެ ނަތީޖާއަކުންނެވެ. ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ސިޓީން ގިނައިރު ބޯޅަ ގެންގުޅުނު ނަމަވެސް މި މެޗްގައި ގިނަ ހަމަލާ އުފައްދާފައިވަނީ އިންޓައިންނެވެ. މި މެޗްގެ ފުރަތަމަ ހާފްގައި ސިޓީ ފެނިގެންދިޔައި ވަރަށް ބޮޑަށް ހާސްވެގެންތިބެ ކުޅެމުންދިޔަ ތަނެވެ. އެގޮތުން އެ ޓީމުގެ ފަހަތުގައި ގޯސް ހެދުމާއި، ޕާސްތައް ގޯސްކޮށް ދިނުން އިތުރުކަން ފާހަގަވެގެންދިޔައެވެ. މިއާ ޚިލާފަށް އިންޓަރ ފެނިގެންދިޔައީ ވަރަށް ބޮޑަށް މެޗަށް ތައްޔާރުވެ ވަރަށް ވަރުގަދައަށް ކުޅެމުންދިޔަ ތަނެވެ.
ނަމެވެސް މިއާއެކުވެސް މި ހާފްގައި ދެ ޓީމުގެ ފަރާތުން މާގިނަ ހަމަލާތަކެއް އުފެެއްދިތަން ފެނިގެން ގޮސްފައެއް ނުވެއެވެ. މި ހާފްގައި އެންމެ ރަނގަޅު ފުރުސަތެއް ލިބިގެންދިޔައީ ސިޓީގެ ފޯވާޑް އަރލިން ހާލަންޑަށެވެ. ނަމަވެސް އޭނާ ފޮނުވާލި ހަމަލާ އިންޓަގެ ގޯލްކީޕަރ އަންޑްރޭ އޮނާނާ ވަނީ ދިފާއުކޮށްފައެވެ.
ދެން މި ހާފްގައި އެންމެ ބޮޑަށް ފާހަގަވެގެންދިޔައީ ސިޓީގެ އެންމެ މުހިންމު ކުޅުންތެރިންގެ ތެރޭގައި ހިމެނޭ ކެވިން ޑި ބްރެއިނާއަށް އަނިޔާވެގެން ބާލަން ޖެހުމެވެ. ސިޓީން މީގެ ކުރިން މިމުބާރާތުގެ ފައިނަލްގައި ކުޅުނު ފަހަރުވެސް ޑި ބްރްއިނާއަށް އަނިޔާވެގެން ވަނީ ބާލާފަވެ. އެ ފަހަރު ސިޓީ ވަނީ ފައިނަލްގައި ޗެލްސީ އަތުން ބަލިވެފައެވެ.
މި މެޗުގެ ފުރަތަމަ ހާފާއި ޚިލާފަށް ދެވަނަ ހާފުގައި ދެ ޓީމުންވެސް ލަނޑެއް ޖެހޭތޯ ކުރަމުންދިޔަ މަސައްކަތް އިތުރު ކުރިއިރު، މެޗްގެ 68 ވަނަ މިނެޓްގައި ސިޓީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ރޮޑްރީއެވެ. މިލަނޑާއެކު އިންޓައިން ގިނަ ބަދަލުތަކެއް ގެނެސް މެޗްގެ ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް، ދެން ވެސް ފެނިގެންދިޔައީ ސިޓީއަށް މެޗްގެ ލީޑު ފުޅާކުރަން ރަނގަޅު ފުރުސަތެއް ލިބިގެންދިޔަ ނަތެނެވެ. ނަމަވެސް ފުރަތަމަ ހާފްގައި ޑި ބްރެއިނާގެ ބަދަލުގައި ކުޅެން އެރި ފިލް ފޯޑެން، އޭރިއާ ތެރެއަށް ވަދެ ފޮނުވާލި ހަމަލާ އޮނާނާ ވަނީ ދިފާއުކޮށްފައެވެ.
މިމެޗްގައި އިންޓައަށް އެންމެ ރަނގަޅު ފުރުސަތެއް ލިބިގެންދިޔައީ މެޗް ނިމެން ގާތްވެފައިވަނިކޮށް އެ ޓީމްގެ ބަދަލު ކުޅުންތެރިޔާ ރޮމެލޫ ލުކާކޫއަށެވެ. އެގޮތުން އޭނާ ހުހަށްހުރެ ބޮލުން ފޮނުވާލި ހަމަލާ، ސިޓީގެ ކީޕަރ އެޑަރސަން ވަނީ ދިފާއުކޮށްފައެވެ. އަދި މެޗުގެ ފަހު ވަގުތު ކޮޅުގައި އިންޓަގެ ފަރާތުން ކުރިމަތިވި ހަމަލާތައް ދިފާއުކޮށް، ސިޓީ ވަނީ މި ނަތީޖާ އޮވެ މެޗު ނިންމާލާފައެވެ.
މި ކާމިޔާބީއާއެކު ސިޓީން މިވަނީ ޔުއެފާ ޗެމްޕިއަންސް ލީގުގެ ތަށި އެ ކްލަބްގެ ތާރީޚުގައި ފުރަތަމަ ފަހަރަށް ކާމިޔާބުކޮށްފައެވެ. މީގެއިތުރުން ޑޮމެސްޓިކް ދެ ތަށި ކަމަށްވާ އިނގިރޭސި ޕްރިމިއަރ ލީގުގެ އިތުރުން އިނގިރޭސި އެފްއޭ ކަޕް ކާމިޔާބުކޮށް، މި ސީޒަންގައި އެ ޓީމުން ވަނީ ތިން ތަށި ކާމިޔާބުކޮށްފައެވެ. މީގެކުރިން ޗެމްޕިއަންސް ލީގުގެ ތަށި ހިމެނޭ ގޮތަށް ތިން ތަށި ކާމިޔާބުކޮށްފައިވަނީ 1999 ވަނަ އަހަރުގެ ސީޒަނުގައި ވާދަވެރި މެންޗެސްޓާ ޔުނައިޓެޑެވެ.
