ރާއްޖެއާއި މޮރިޝަސްގެ ކަނޑުން ފުށުއަރާ ބައި "އިކުއި ޑިސްޓޭންސް"ގެ އުސޫލުން ބެހުމަށް އިޓްލޮސްގެ ފަނޑިޔާރުން ކުރި ހުކުމްގައި، މައްސަލަ ސާބިތުކުރުމަށް، މައްސަލައިގެ އެއްވެސް ހިސާބެއްގައި ކިތާބީ ހެއްކެއްގެ ގޮތުގައި ރައީސް ސާލިހު މޮރިޝަސްގެ ބޮޑުވަޒީރަށް ފޮނުވި ސިޓީ ހިމަނާފައި ނުވާކަމަށް ބަންޑާރަނައިބު އިބުރާހިމް ރިއްފަތު ވިދާޅުވެއްޖެއެވެ.
ރައްޔިތުންގެ މަޖިލިހަށް މިހާރު ހުށަހެޅިފައިވާ ބަންޑާރަ ނައިބުގެ އިތުބާރު ނެތްކަމުގެ މައްސަލާގައި ރައްޔިތުންގެ މަޖިލިހަށް ޖަވާބުދާރީވަމުން ރިއްފަތު ވިދާޅުވީ ވިދާޅުވީ ދެކުނުގެ އީޒެޑްގެ މައްސަލައާއި ރާއްޖޭގެ އައުޓަރކޮންޓިނެންޓަލްޝަލް ޝެލްފްގެ މައްސަލާގައިވެސް ރާއްޖެއިން ނަގާފައިވާ ގާނޫނީ ސްޓޭންޑް ބަދަލު ނުކުރާނެކަމަށް ރައީސްގެ ސިޓީގައި ކަޅާއި ހުދުން ލިޔެފައި އޮތްކަމަށްވެސް ރިއްފަތު ރައްޔިތުންގެ މަޖިލިހަށް ޖަވާބުދާރީ ވެވަޑައިގަންނަވަމުން ވިދާޅުވެފައި ވެއެވެ.
އިޓްލޮސްގެ މައްސަލަ ސާބިތު ކުރުމަށް އިޓްލޮސްގެ ފަނޑިޔާރުން ފާހަގަކޮށްފައިވާ އެއްވެސް ކިތާބީ ހެއްކެއްގެ ތެރޭގައި ރައީސް ފޮނުވި ސިޓީ ނުހިމެނޭކަން ފާހަގަ ކުރަން. ދެކުނުގެ އީޒެޑްގެ މައްސަލައާއި ރާއްޖޭގެ އައުޓަރކޮންޓިނެންޓަލްޝަލް ޝެލްފްގެ މައްސަލާގައިވެސް ރާއްޖެއިން ނަގާފައިވާ ގާނޫނީ ސްޓޭންޑް ބަދަލު ނުކުރާނެކަމަށް ރައީސްގެ ސިޓީގައި ކަޅާއި ހުދުން ލިޔެފަ އޮތްކަން ތިޔަ އިއްޒަތްތެރި މެމްބަރުންނަށް ދަންނަވަން.
ރައްޔިތުންގެ މަޖިލީހަށް، ލިޔުމުން ތައްޔާރު ކޮށްފަ އޮތް ޖަވާބު ވިދާޅުވެ ދެއްވަމުން ރިއްފަތު ވިދާޅުވެފައި ވެއެވެ.
ރިއްފަތު އިތުރަށް ވިދާޅުވީ ސިޔާސީ މަސައްކަތުގައި ހަތުރުން މިތުރުންނަށްވެސް މިތުރުން ހަތުރުންނަށް ވުމަކީ ދުނިޔޭގެ ތަބައީ އުސޫލަށް ވެދާނެކަމަށާއި އެހެންނަމަވެސް، ގާނޫނީ މަސައްކަތަކީ ތަފާތު މަސައްކަތެއް ކަމުގައެވެ. އެހެންކަމުން ގާނޫނު މާނަކުރުމަކީ ކޮންމެމީހަކު ހިތުހުރި ގޮތަކަށް ކުރާން އޮންނަ ކަމެއް ނޫންކަމަށް ރިއްފަތު ވިދާޅުވިއެވެ.
އަދި ރިއްފަތު ވިދާޅުވީ އޭނާ ގާނޫނު އަސަސީއާއި ޚިލާފްވެފައިވަނީ ކޮން އުސޫލަކުންތޯ ސުވާލު ކުރައްވާފައެވެ. އަދި ސަބަބު ބަޔާން ކޮށްގެން މެނުވީ ވަޒީރެއްގެ އިތުބާރު ނެތްކަމުގެ މައްސަލަ ހުށަނޭޅޭނެކަމަށް ބަޔާން ކޮށްފައި ވާކަމަށް ވިދާޅުވަމުން ރިއްފަތު ވިދާޅުވީ ދެކުނުގެ އީޒެޑްގެ މައްސަލާގައި ރާއްޖެއަށް ބޮޑުބައި ލިބޭގޮތަށް އޭނާ ވަކާލާތު ކުރެއްވި ގޮތާމެދު މަޖިލިހުގެ ރައީސްއާއި މަޖިލިހުގެ 13 މެމްބަރަކު ހިތަށް ފެންނަ ގޮތަކީ ގާނޫނު އަސާސީގައި ބުނާ ސަބަބު ނޫން ކަމުގައެވެ.
