މި ސަރުކާރުން ކަނޑު ވިއްލާފައިވާކަމަށް ބުނެ، ވިކާލިބައި އަލުން އިއާދަކުރުމަށް ރައީސަށް ގޮވާލާ ތައްޔާރު ކުރަމުންދާ ޕެޓިޝަނަށް ސޮއި ހޯދުމަށް މިއަދު އާޓިފިޝަލް ބީޗު ސަރަހައްދުގައި ޚާއްސަ ހަރަކާތެއް ބާއްވާގޮތަށް ޗާގޮސް ކޯލިޝަނުން ނިންމައިފިއެވެ.
ރައީސް ޞާލިހަށް ހުށަހަޅަން ތައްޔާރުކުރަމުންދާ ޕެޓިޝަނަކީ "ކަނޑު ވިއްކުމާއި ދެކޮޅު އިއްތިހާދު" ގެ ނަމުގައި އުފައްދާފައިވާ ޗާގޮސް ކޯލިޝަނުން ކުރިއަށްގެންދާ ހަރަކާތެކެވެ. އެ އިއްތިހާދުގައި ހިމެނެނީ އިދިކޮޅު ޕީޕީއެމް-ޕީއެންސީ އާއީ، ޖުމްހޫރީ ޕާޓީ، "ފިކުރެއްގެ ދިރުން" އަދި އެމްއެންޕީގެ އިތުރުން ކުރީ ބަނޑާރަ ނައިބުން ކަމަށްވާ ޑރ. މުހައްމަދު މުނައްވަރާއި އާޒިމާ ޝަކޫރު އަދި ކުރީގެ ހޯމް މިނިސްޓަރު އުމަރު ނަސީރެވެ.
ޕެޓިޝަނާއި ގުޅޭގޮތުން ދާދިފަހުން ބޭއްވި ނޫސްވެރިންގެ ބައްދަލުވުމުގައި އާޒިމާ ވިދާޅުވީ މި ޕެޓިޝަނަށް ހުރިހާ އިދިކޮޅު ޕާޓީއަކާއި، މައްސަލާގައި އިއްތިހާދާއި އެކު ހަރަކާތްތެރިވާ ފަރާތްތަކުން ސޮއި ހޯދުމުގެ މަސައްކަތް ކުރިއަށް ގެންދާނެ ކަމަށެވެ. އަދި ވީހާވެސް ގިނަ ބައެއްގެ ސޮއި މި ޕެޓިޝަނަށް ބޭނުންވާ ކަމަށާއި މިއީ މައްސަލާގައި ޤާނޫނީ ގޮތުން ކުރުމަށް ހަމަޖެހިފައިވާ މަސައްކަތައް ކުރަމުންދާ ކަމެއް ކަމަށް ވިދާޅުވި އެވެ.
ޗާގޮސް ކޯލިޝަނުން ބުނެފައިވަނީ މި ޕެޓިޝަނަށް ސޮއި ހޯދުމުގެ ހަރަކާތްތައް މިއަދު އާރޓިފިޝަލް ބީޗު ސަރަހައްދުގައި ކުރިޔަށް ދާނީ މިއަދު ހަވީރު 4:00 އިން ފެށިގެން ކަމުގައެވެ.
"ކަނޑު ވިއްކުމާ ދެކޮޅު ކޯލިޝަން"ގެ ނަމުގައި އުފައްދާފައިވާ ޗާގޮސް ކޯލިޝަންގައި އިދިކޮޅު ޕީޕީއެމްއާއި ނޭޝަނަލް ޕާޓީއާއި ޕީއެންސީ ބައިވެރިވެފައިވި ނަމަވެސް އެމްއާރުއެމްއިންވަނީ މި ކޯލިޝަންގައި ބައިވެރި ނުވާނެކަމަށް ބުނެފައެވެ. އަދި މައުލޫމާތު ލިބިފައިވާ ގޮތުގައި ޗާގޮސް ކޯލިޝަންއިން ހިންގާ ހަރަކާތްތަކަށް ޖޭޕީންވެސް ތާއީދެއް ނުކުރެެއެވެ.
އެހެންނަމަވެސް، މި ސަރުކާރުން ރާއްޖޭގެ ކަނޑު ވިއްލާފައިވާކަމަށް ބުނެ އިދިކޮޅު ޗާގޮސް ކޯލިޝަނުން ވަނީ އަންން ޖޫންމަހުގެ 2 ވަނަ ބޮޑު ޖަލްސާއެއްވެސް ބޭއްވުމަށް ނިންމާފައެވެ.
