ޗާގޮސްއަކީ ބައިނަލްއަގުވާމީ ގާނޫނުތަކުގެ ދަށުން މޮރިޝަސްއާއި ހަވާލު ކޮށްފަ އޮތް ތަނެއް ނޫންކަމުގައި ކުރީގެ ބަންޑާރަނައިބު އައިޝަތު އާޒިމާ ޝަކޫރު ވިދާޅުވެއްޖެއެވެ.
އޭނާ މިހެން ވިދާޅުވީ، "ކަނޑު ވިއްކުމާއި ދެކޮޅު" ކޯލިޝައިން ރޭ ހޮޓެލް ޖެންގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ރޭގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމާ ވިދާޅުވީ އިޓްލޮސްގެ ރޫލް އޮފް ޕްރޮސީޖާގައި މިމައްސަލަ އިސްތިއުނާފް ކުރެވޭނެ ހާލަތްތައް އެބަހުރި ކަމަށާއި، ޗާގޮސްއަކީ މޮރިޝަސްގެ ބައެއްކަމަށް ބައިނަލްއަގުވާމީ ގޮތުން ނިންމާފައި ނުވާކަމުގައެވެ.
ރޫލް އޮފް ދަ ޕްރޮސީޖާގައި އެބަހުރި އިސްތިއުނާފް ކުރެވޭނެ ހާލަތްތައް.. އަނެއްކާ ދެންމެ ޑރ. މުނައްވަރު އެ ވިދާޅުވިހެން.. ހަމަ އެއާއެކުގަ މިހާރު އަދި މިހާލަތުގައި މީ ޗާގޮސްއަކީ މޮރިޝަސްއާއި ގާނޫނީ.. ބައިނަލްއަގުވާމީ ގާނޫނުތަކުގެދަށުން ހަވާލުކޮށްފަ އޮތް ތަނެއް ނޫނޭ. އެހެންވީމަ މިހުކުމް ތަންފީޒު ކުރުމާއި ބެހޭގޮތުންވެސް އަޅުގަޑުމެންނަށް ކިތައްމެ ޗެލެންޖެއް ކުރެވޭނެ.
އާޒިމާ ވިދާޅުވިއެވެ.
އާޒިމާ ވިދާޅުވީ އެންމެ ބޮޑު ހިތާމައަކީ ދައުލަތުގެ ބަންޑާރަ ނައިބު ބައިނަލްއަގުވާމީ ގާނޫނުތައް އެގިވަޑައިނުގެން ދައުލަތުގެ ފަރާތުން ސްޓޭންޑް ނެންގެވުން ކަމުގައެވެ.
ޗާގޮސްއަކީ މޮރިޝަސްގެ ބައެއްކަމަށް ބައިނަލްއަގުވާމީ ގޮތުން ނިންމާފައި ނުވާކަމަށް އާޒިމާ ވިދާޅުވިނަމަވެސް، 2017ވަނަ އަހަރުގެ ޖޫންމަހުގެ 22 ވަނަ ދުވަހު ޔޫއެން ޖެނެރަލް އެސެމްބްލީގައި ނެގުނު ވޯޓުން ނިންމާފައިވަނީ، 1960ގެ އަހަރުތަކުގައި މޮރިޝަސްއަށް މިނިވަންކަން ލިބުމުގެ ކުރިން، އެގައުމުގެ އިހުތިސާސްއިން ފޯޅަވަހި ވަކިކޮށްފައިވާ މައްސަލާގައި، އިންޓަރނޭޝަނަލް ކޯޓް އޮފް ޖަސްޓިސްގެ އެޑްވައިޒަރީ އޮޕީނިއަންއެއް (ކޯޓުގެ ލަފާ) ހޯދުމަށެވެ. ޔޫއެންގެ ޖެނެރަލް އެސެމްބްލީގައި މި ނިންމުން ފާސްކޮށްފައިވަނީ 94 ގައުމު މިނިންމުމާ އެއްކޮޅަށް ވޯޓު ދީގެންނެވެ. ދެކޮޅަށް (ދެކޮޅަކަށް ނުވަތަ އެއްވެސް ކޮޅަކަށް) ވޯޓު ނުދީ ތިބީ އެންމެ 15 ގައުމެކެވެ.
އެއަށްފަހު 2019ވަނަ އަހަރުގެ ފެބްރުއަރީމަހުގެ 25ވަނަ ދުވަހު، އިންޓަރނޭޝަނަލް ކޯޓު އޮފް ޖަސްޓިސްއިން، އެކޯޓުގެ 13 ފަނޑިޔާރުންގެ ބޮޑު އަޢުލަބިއްޔަތަކުން ވޯޓު ދީގެން ނިންމާފައިވަނީ ޗާގޮސް އާކިޕެލަގޯ (ފޯޅަވަހި)ގެ މައްޗަށް އޮތް އިދާރީ ވެރިކަމުގެ ބާރުތައް ވީއެންމެ އަވަސް މުއްދަތެއްގައި އިނގިރޭސިން ނިމުމަކަށް ގެންނާން ޖެހޭނެ ކަމުގައެވެ. މި ނިންމުމާއި ދެކޮޅަށް ވޯޓު ދީފައިވަނީ ކޯޓުގެ ފަނޑިޔާރުންގެ ބެންޗުގެ އެންމެ ފަނޑިޔާރެކެވެ. އިނގިރޭސިވިލާތާއި އެއްކޮޅަށް ވޯޓު ދީފައިވާ ފަނޑިޔާރަކީ ބެންޗުގައި އިންނެވި އެމެރިކާގެ ފަނޑިޔާރު އެކަންޏެވެ.
އިންޓަރނޭޝަނަލް ކޯޓު އޮފް ޖަސްޓިސްގެ މި ނިންމުމާއެކު، 2019ވަނަ އަހަރުގެ މޭމަހުގެ 22 ވަނަ ދުވަހު ޔޫއެން ޖެނެރަލް އެސެމްބްލީގައި ބަހުސްކޮށް ފާސްކޮށްފައިވާ ގަރާރުގައި ބުނެފައިވަނީ އިނގިރޭސިވިލާތުން 50 އަހަރުވަންދެން އިސްތިއުމާރު ކޮށްފައި އޮތް ފޯޅަވައްސަކީ، މޮރިޝަސްއަސްއަށް ފުރިހަމަ އިހުތިސާސް ލިބިގެންވާ ސަރަހައްދެއް ކަމުގައެވެ.
