މިހާތަނަށް ކާމިޔާބު ޕްރޮޖެކްތަ ތަކެއް ގެނެސްދީފައިވާ ޑައިރެކްޓަރު އިލްޔާސް ވަހީދު (އިއްލެ) ގެ ކްރައިމް ތުރިލާ "ނީނާ" ގެ ޓީޒާ އެއް ދައްކައިލައިފިއެވެ.
އާސިމް ޢަލީ އަދި އަޙްމަދު ވަހީދު ޕްރޮޑިއުސްކޮށް، 'އައި ފިލްމްސް' އިން ގެނެސްދޭ ނީނާ އަކީ 2019 ގެ ސައިކޮލިޖިކަލް ތުރިލާ "ބަވަތި" އަށް ފަހު އިއްލެ ގެނެސްދޭ ދެވަނަ ފީޗާ ފިލްމެވެ.
2020 ވަނަ އަހަރުގެ ކުރީކޮޅު ޝުޓިން ވެސް ނިންމައިފައިވާ މި ފިލްމް އަޅުވާނެ ތާރީހެއް އަދިވެސް ހާމައެއް ނުކުރެއެވެ. ފިލްމުގެ ބޮޑު ބައި ޝޫޓްކުރީ ލ. އަތޮޅުގަ އެވެ.
ނީނާގެ ލީޑުން ފެނިގެން ދާނީ އިއްލެ ގެނެސްދިން ފިލްމް "ބަވަތީ"ގެ ވެސް ލީޑުން ފެނިގެން ދިއަ ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް އެވެ. ފިލްމްގެ ކާސްޓުގައި ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހަމްދޫން ފާރޫގް، ޖުމައްޔިލް ނިމާލް، މަރިޔަމް ރަޝީދާ އަދި މަރިޔަމް ޝަކީލާ ހިމެނެއެވެ.
މީގެ އިތުރުން ވެސް މި ފިލްމް އިން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ވެސް ހިމެނެއެވެ.
"ނީނާ" ބެލުންތެރިންނަށް ގެނެސްދިނުން ލަސްވީ ކޮވިޑާ ހެދި އެވެ. އެކަމަކު 2021 ގައި ފިލްމު ރިލީޒްކުރާނެ ކަމަށް ބުނެ ޓީޒާއެއް ވެސް އާންމުކުރި ނަމަވެސް، އައު ތާރީހެއް އަދި އިއުލާން އެއް ނުކުރެއެވެ.
