ގދ. ތިނަދޫގައި ހުންނަ ޑރ. އަބްދުލް ސަމަދު މެމޯރިއަލް ހޮސްޕިޓަލުގައި ކީމޯތެރަޕީގެ ހިދުމަތް ދޭން ފަށައިފިއެވެ.
އެ ހޮސްޕިޓަލުގެ ނޫސްބަޔާނެއްގައި ބުނި ގޮތުގައި، ކެންސަރު ބަލި ތަހައްމަލު ކުރާ މީހުންނަށް ދޭ ކީމޯތެރަޕީގެ ހިދުމަތް އިފުތިތާހުކުރީ އެތަނުގައި އިއްޔެ ބޭއްވި ހާއްސަ ރަސްމިއްޔާތެއްގައި ޑެޕިއުޓީ ސީއީއޯ އަބްދުލް އަޒީޒް ރިފާއުއެވެ.
އޭނާ ވިދާޅުވީ، ކީމޯތެރަޕީ ހިދުމަތް އެ ހޮސްޕިޓަލުން ދޭން ފެށުމަކީ، އެ ހޮސްޕިޓަލްގައި ހިދުމަތްތައް އިތުރަށް ތަރައްގީ ކޮށް، ހަރުދަނާ ކުރުމަށް ކުރަމުންދާ މަސައްކަތުގެ ތެރެއަށް އިތުރު ކުރެވުނު ބޮޅެއް ކަަމަށެވެ.
އަބްދުލް ސަމަދު މެމޯރިއަލް ހޮސްޕިޓަލުން ނެރުނު ބަޔާނެއްގައި ބުނީ ހުޅުމާލެ ހޮސްޕިޓަލުގެ އެހީތެރިކަމާއެކު، ތިނަދޫ ހޮސްޕިޓަލްގެ ޑޮކްޓަރުންނާއި ނަރުހުން ކެންސަރު ބައްޔަށް ފަރުވާދިނުމަށް ތަމްރީނުކުރުމުގެ މަސައްކަތް ވެސް ކުރަމުން އަންނަ ކަމަށެވެ. ދެމެހެއްޓެނިވި ގޮތެއްގައި ކީމޯގެ ހިދުމަތް ދިނުމަށް އެސްޓީއޯގެ ދައުރު ފުޅާކޮށް، ހިދުމަތް މެދުނުކެނޑޭނެ ގޮތް ހެދުމަށް މަޝްވަރާ ކޮށްފައިވާ ކަމަށް ވެސް އެ ހޮސްޕިޓަލުން ބުންޏެވެ.
މިހޮސްޕިޓަލުގައި ކީމޯތެރަޕީގެ ޚިދުމަތް ރަސްމީކޮށް އިފްތިތާހްކުރުން. ކީމޯތެރަޕީގެ ޚިދުމަތާއެކު ހުވަދު އަތޮޅުގައި މިފަރުވާ ހޯދުމަށް އާއިލާތަކުން ކުރާ ހޭދަ އަދި ވަގުތުގެ އިތުރުން އުފުލަން ޖެހޭ ތަކުލީފުތަކަށް ވަރަށް ބޮޑު ލިޔެއް ލިބިގެން ދާނެ.@presidencymv @MoHmv @governmentmv pic.twitter.com/QZc2Pb31mG
— Dr. Abdul Samad Memorial Hospital (@drasmhospital) May 7, 2023
ތިނަދޫ ހޮސްޕިޓަލުން ވަނީ މިދިޔަ ހަފުތާގައި ލެޕްރޯސްކޮޕިކް ސާޖަރީގެ ހިދުމަތާއި އެޑްވާންސްޑް ވުންޑް ކެއާގެ ހިދުމަތް ވެސް ފަށައިފައެވެ. މާލެ ސަރަހައްދުގެ ހަތަރު ހޮސްޕިޓަލުގެ އިތުރުން ރީޖަނަލް ބައެއް ހޮސްޕިޓަލުތަކާއި ޅ. ނައިފަރުގައި ހުންނަ އަތޮޅު ހޮސްޕިޓަލުގައި މިހާރު ވެސް، ކެންސަރުގެ ސެލްތައް މަރާލުމަށް ދޭ ކީމޯތެރަޕީގެ ފަރުވާ ދެއެވެ.
އެ ހޮސްޕިޓަލުން މައުލޫމާތުދޭގޮތުގައި، އެތަނުން މި ހިދުމަތް ލިބެން ފެށުމުން ރާއްޖޭގައި ކެންސަރު ބަލި ޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުން އަންނައިރު، ހުވަދު އަތޮޅުހގައި މި ފަރުވާ ހޯދުމަށް އާއިލާތަކުން ކުރާ ހޭދަ އަދި ވަގުތުގެ އިތުރުން އުފުލަން ޖެހޭ ތަކުލީފުތަކަށް ވަރަށް ބޮޑު ލުޔެއް ލިބިގެންދާނެއެވެ.
ކޮމެންޓު ފޮނުވާ