ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ހަމަލާއަށް މިއަދަށް ދެއަހަރު ވެގެން ގޮސްފައިވާއިރު، ރައީސް ނަޝީދަށް އިންސާފު ހޯއްދެވުމަށް މިސަރުކާރުން އަދި ރައީސް ޞާލިހު ބޭނުން ނުވާކަމަށް ރައީސް ނަޝީދުގެ ފިކުރެއްގެ ދިރުމަށް ނިސްބަތްވާ އިސްބޭފުޅުން ވިދާޅުވެއްޖެއެވެ.
2021 ވަނަ އަހަރުގެ މޭ މަހުގެ 6 ވަނަ ދުވަހުގެރޭ އިރާކޮޅުގެ ވަގުތެއްގައި ރައީސް ނަޝީދަށް އަމާޒުކޮށްދިން ހަމަލާގައި އެމަނިކުފާނުގެ ހަށިކޮޅަށް ވަނީ ބޮޑެތި ޒަޚަމްތަކެއް ލިބިފައިވެއެވެ. އަދި ޒަހަމްތަކާއި ގުޅިގެން ގިނަ ސާޖަރީތަކެއް ހަދައި، ގިނަ ދުވަސްތަކެއް ވަންދެން ވަނީ ރާއްޖެއިން ބޭރުގައިވެސް ފަރުވާ ހޯއްދަވާފައެވެ.
މިހަމަލާއަށް 2 އަހަރު ވެގެން ގޮސްފައިވާއިރު، މިހަމަލާގެ ޝަރީއަތް އެންމެ އެކަށީގެންވާ ގޮތަށް ކުރިއަށް ނުދިއުމާއި، ހަމަލާއަށް ފަންޑު ކުރި މީހުންވެސް އަދާއައި ހަމަށްވެސް ހޯދިފައި ނުވާމަކީ ރައީސް ނަޝީދުގެވެސް އޮތް ބޮޑު ކަންބޮޑުވުމެކެވެ. ބޮމުގެ ހަމަލާއަށް ދެއަހަރު ފުރުނުއިރު ހަމަލާގެ ޝަރީއަތް ހިނގަމުންދާ ގޮތާއިމެދު ކަންބޮޑުވުން ފާޅު ކުރައްވަމުން މަޖިލީހުގެ ނައިބް ރައީސް އީވާ ވިދާޅުވީ 6 މޭ 2021 ގައި ރައީސް ނަޝީދު އަވަހާރަކޮށްލަން ދިން ބޮމުގެ ހަމަލާގެ މައުލޫމާތު އޭގެ ކުރިން ސަރުކާރަށް އެނގިތިބެ އަޅާނުލާ އަދި ހަމަލާއަށް 2 އަހަރު ވީއިރު އެ ހަމަލާ ރޭވި މީހުން ނުހޯދި ރައީސް ނަޝީދަށް އިންސާފު ނުހޯދައިދިނުމަކީ ރާވައިގެން ހިންގާ ޖަރީމާއެއް ކަމަށެވެ.
މައްސަލައިގެ ޝަރީއަތް ކުރިއަށްދާގޮތާއި، މައްސަލައާއި ގުޅިގެން ހިނގަމުންދާ ކަންކަމަށް ބަލާއިރު މިކަން ބަލައި ރައީސް ނަޝީދަށް އިންސާފު ހޯދުމަކީ ރައީސް ޞާލިހުގެ އެއްވެސް ޝައުގުވެރިކަމެއް އޮތްކަމެއް ނޫންކަން ފެންނަމުންދާކަމަށް އީވާ ވިދާޅުވިއެވެ.
ރައީސް މުހައްމަދު ނަޝީދު މަރާލަން ދިން ބޮމުގެ ހަމަލާއަށް 2 އަހަރު. މި ބިރުވެރި ނުރައްކާތެރި ހަމަލާގެ އަޑީގައި ތިބި ބަޔަކު ނުހޯދި. ރައީސް ނަޝީދަށް އިންސާފު ލިބުނަނުދީ ހިފަހައްޓާލައިގެން ތިބީ. އެއީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބޭނުންފުޅުވާ ގޮތްކަން ވަރަށް ސާފު.
– އީވާ ވިދާޅުވިއެވެ.
ރައީސް @MohamedNasheed މަރާލަން ދިން ބޮމުގެ ހަމަލާއަށް 2 އަހަރު. މި ބިރުވެރި ނުރައްކާތެރި ހަމަލާގެ އަޑީގައި ތިބި ބަޔަކު ނުހޯދި. ރައީސް ނަޝީދަށް އިންސާފު ލިބުނަނުދީ ހިފަހައްޓާލައިގެން ތިބީ. އެއީ ރ. @ibusolih ބޭނުންފުޅުވާ ގޮތްކަން ވަރަށް ސާފު.#justiceforpresidentnasheed pic.twitter.com/pUBmO0BqRs
— Eva Abdulla 🎈❓ (@evattey) May 6, 2023
މިމައްސަލާގައި ކަންބޮޑުވުން ފާޅު ކުރައްވަމުން މެމްބަރު ހަސަން ލަތީފް ވިދާޅުވީ މިހާރުވެސް މިމައްސަލާގައި ސަރުކާރުން މަސައްކަތް ކުރަނީ ކަމުގެ ހަގީގަތް ފޮރުވައި އިންސާފަށް ވާސިލްވާން އޮތް ހުރިހާ ދިމާލަކުން ހުރަސް އަޅަމުންކަމަށެވެ. އަދި މިވީ ދުވަސްތަކުގައި މައްސަލަ ކުރިއަސްދާ ގޮތަށް ބަލާއިރު، ރައީސް ޞާލިހަށް ރައީސް ނަޝީދަށް އިންސާފު ހޯދައި ދެވިފައި ނުވާކަމީ ފެންނަން އޮތް ހަގީގަތްކަމަށް ހަސަން ވިދާޅުވިއެވެ.
ސަރުކާރުން އަދިވެސް އެގެންދަނީ ހަދާފައި ހުރި ގޯސްތައް ވަންހަނާކޮށް ފޮރުވުމަށް މަސައްކަތް ކުރަމުން. ރައީސް އިބްރާހިމް މުހައްމަދު ޞާލިހު އަށް ރައީސް މުހައްމަދު ނަޝީދަކަށް އިންސާފެއް ހޯއްދަވައެއް ނުދެއްވޭނެ.
– ހަސަން ލަތީފް ވިދާޅުވިއެވެ.
މޭހައެއްގެ ހަމަލާ ކުށްވެރިކޮށް، އަދި ހުރި ކަންބޮޑުވުން ހިއްސާ ކުރައްވައި ފިކުރެއްގެ ދިރުމުގެ ޓީމުގައި އިސްކޮށް ހަރަކާތްތެރިވާ އެސްޓީއޯގެ ކުރީގެ އެމްޑީ ހުސެއިން އަމްރު ވިދާޅުވީ މިހަމަލާއަކީ ސަރުކާރަށް ކުރިން މިހާދިސާ ހިނގާ އުޅޭކަން އެނގިތިބި އަޅާނުލުމުން ދީފައިވާ ހަމަލާއެއްކަމަށެވެ.
6 މޭ 2021 ގަ ރައީސް ނަޝީދު އަވަހާރަކޮށްލަން ދިން ބޮމުގެ ހަމަލާގެ މައުލޫމާތު އޭގެ ކުރިން ސަރުކާރަށް އެނގިތިބެ އަޅާނުލާ އަދި ހަމަލާއަށް 2 އަހަރު ވީއިރު އެ ހަމަލާ ރޭވި މީހުން ނުހޯދި ރައީސް ނަޝީދަށް އިންސާފު ނުހޯދައިދިނުމަކީ ރާވައިގެން ހިންގާ ޖަރީމާއެއް.
– އަމްރު ވިދާޅުވިއެވެ.
ރައީސް ނަޝީދަށް ދިން ހަމަލާގެ ޝަރީއަތް ކުރިއަށްދާ ގޮތާއިމެދު އެކި ފަހަރު މަތީން އެމަނިކުފާނު ވަނީ ކަންބޮޑުވުން ފާޅު ކުރައްވާފައެވެ. އަދި ޝަރީއަތް ކުރިއަށްދާއިރު އިންސާފަށް ހުރަސް އެޅޭ އެތައްކަމެއް ހިނގާކަމަށް ރައީސް ނަޝީދު ވަނީ ފާހަގަ ކުރައްވާފައެވެ.
