އިނގިރޭސި ޕްރިމިޔަރ ލީގުގައި ވެސްޓހަމްގެ ދަނޑުގައި ލިވަރޕޫލާއި ދެކޮޅަށް ކުޅުނު މެޗު ލިވަރޕޫލުން 1-2ގެ ނަތީޖާއަކުން ކާމިޔާބު ކޮށްފިއެވެ.
ވެސްޓް ހޭމްގެ ލޫކަސް ޕަކޭޓާ މެޗުގެ 12 ވަނަ މިނިޓްގައި އޭރިއާބޭރުން ޖެހި ބޯޅައަކުން އެ ޓީމުން ލީޑުނެގި މި މެޗުގައި ލިވަޕޫލުން ވަނީ ފުރަތަމަ ހާފު ނިމުމުގެ ކުރިން ކޯޑީ ގަކްޕޯ ޖެހި ގޯލުން އެއްވަރުކޮށްފައެވެ. ގަކްޕޯ ވެސް މި ގޯލު ޖެހީ އޭރިއާބޭރުން ފޮނުވާލި ޝޮޓަކުންނެވެ.
ދެ ވަނަ ހާފުގެ ކުރީކޮޅުގައި ވެސްޓް ހޭމްގެ ޖެރޮޑް ބޮވެން ވަނީ ގޯލެއް ޖަހައިފައެވެ. އެކަމަކު، ވީއޭއާރް އިން ބަލާފައި ނިންމީ އޮފްސައިޑް ކަމަށެވެ. ލިވަޕޫލް މޮޅުވި ގޯލަކީ ކޯނަރެއްގައި އެންޑީ ރޮބަޓްސަން ނެގި ބޯޅައަކުން ޖޮއެލް މަޓިޕް ބޮލުން ޖެހި ގޯލެކެވެ. މެޗުގެ ފަހު ކޮޅުގައި ލިވަޕޫލްގެ ތިއާގޯ އަލްކަންޓާރާ އަތުގައި ބޯޅަ ޖެހުނު ކަމަށް ބަލައި، ޕެނަލްޓީ އަކަށް ވެސްޓް ހޭމް އިން އެޕީލް ކުރި ނަމަވެސް ރެފްރީ ކްރިސް ކަވަނާ ނިންމީ ޕެނަލްޓީއެއް ދޭން ނުޖެހޭ ކަމަށެވެ.
ލިވަޕޫލުން 32 މެޗުން 53 ޕޮއިންޓް ހަމަކުރިއިރު، އެ ޓީމު ވަނީ ލީގުގެ ހަ ވަނަ އަށް ޖެހިލައިފައެވެ. ލީގުގެ ހަ ވަނައިގައި ކުރިން އޮތް ޓޮޓެންހަމަށް ވެސް 32 މެޗުން 53 ޕޮއިންޓް ލިބިފައިވާއިރު، ލަނޑުގެ ތަފާތުން ކުރި ލިބެނީ ލިވަޕޫލް އަށެވެ. ތިނެއްގައި އޮތް ނިއުކާސަލް ޔުނައިޓެޑާއި ހަތަރެއްގައި އޮތް މެންޗެސްޓާ ޔުނައިޓެޑްގެ ވެސް އޮތީ 59 ޕޮއިންޓެވެ.
