މަޖިލީހުގެ މިއަދުގެ ޖަލްސާ ނުފެށެނީސް ކާށިދޫ ދާއިރާގެ މެމްބަރު ޖާބިރު ނަން އިއްވައި ތަޅުމުން ނެރެލައިފިއެވެ.
މިއަދުގެ ޖަލްސާގައި އޮތީ އުނގޫފާރު ދާއިރާގެ މެންބަރު މުޙައްމަދު ވަޙީދު، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ އާ ކުރައްވާ ސުވާލަށް ޖަވާބު ހޯއްދެވުމެވެ. އޭނާ ކުރައްވާފައިވާ ސުވާލަކީ އެންވަޔަރަންމަންޓް ޕްރޮޓެކްޝަން އޭޖެންސީ މިނިވަން މުސްތަޤިއްލު ތަނަކަށް ހެދުމަކީ ރައީސުލްޖުމްހޫރިއްޔާގެ ރިޔާސީ ވައުދަކަށްވާ އިރު، އަދި ފުރަތަމަ 100 ދުވަސްތެރޭގައި ކުރަން ކަނޑައެޅި ކަމަކަށްވާއިރު، މި ވައުދު ނުފުއްދައި މިހާ ދިގުލަނީ ކީއްވެތޯއެވެ.
މިސުވާލަށް ޖަވާބު ދިނުމަށް ވަޒީރުވެސް ވަޑައިގެން އިންނަވަނިކޮށް މެމްބަރު ޖާބިރު ވަނީ މަޖިލިސް ރައީސްގެ މޭޒު ކުރިމައްޗަށް ވަޑައިގެން ނުރުހުން ފާޅުކޮށް އިހުތިޖާޖުކޮށްފައެވެ. އަދި މަޖިލިސްގެ ރައީސްގެ މޭޒު ކުރުމަތީގައި ތަޅުމުގައި އިށީގެ ވަޑައިގެން ތަޅުމުން ނިކުތުމަށްވެސް ދެކޮޅު ހައްދަވާފައެވެ.
ޖާބިރު މިގޮތަށް އަޑުގަދަކުރެއްވުމުން ރިޔާސަތުން ވަނީ އޭނާގެ ނަން އިއްވާފައެވެ. އެންމެ ފުރަތަމަ މަޖިލީހުގެ ސެކިއުރިޓީން އޭނާ މަޖިލީހުން ބޭރަށް ގެންދަން އުޅުމުން އޭނާ ވަނީ ބިންމަތީ އިށީނދެ ވަޑައިގެން މަޖިލީހުގެ ތަޅުމުން ބޭރަށް ވަޑައިގަންނަވަން ދެކޮޅުހައްދަވާފައެވެ. އެހެންނަމަވެސް ފަހުން ޖާބިރު މަޖިލީހުން ބޭރަށް ވަޑައިގަތީ އަމިއްލަފުޅަށެވެ.
ޖާބިރަކީ މަޖިލީހުގައި އަބަދުވެސް ބޭއަދަބީ ބަހުން ވާހަކަ ދެއްކުމާއި، މަޖިލީހުގެ ތަޅުމުގައި އަޑުގަދަކޮށް މަސްލަހަތު ގެއްލޭގޮތަށް އަމަލު ކުރައްވަމުންދާ މެމްބަރެއްކަން ފާހަގަ ކުރެވެއެވެ.
