އައް ސަފާ ހައްޖު އެންޑް އުމްރާ ގްރޫޕް މެދުވެރިކޮށް މިއަދު ހެނދުނާއި މިރޭ ސައުދީއަށް ފުރާން ހަމަޖެހިފައި ތިބި އުމްރާވެރިންނަށް މި އަހަރުގެ ރޯދަ މަހު އުމްރާއަށް ނުދެވޭނެ ކަން އެގްރޫޕުން އަންގައިފިއެވެ.
އެ ކުންފުނިން ރޭ ނެރުނު "ދަންނަވާލުމެއް" ގައި ބުނީ މި ރޯދަ މަހުގެ ބާކީ އޮތް ދުވަސްތަކުގައި ވެސް މައްކާއަށް ފުރޭތޯ މިހާތަނަށް ކުރި މަސައްކަތުން "އެއްވެސް އަލިމަގެއް ފެންނަން ނެތް" ކަމަށެވެ. އެހެންވެ، މި އަހަރުގެ ރޯދަ މަހުގެ އުމްރާ ދަތުރު ކެންސަލްކުރީ ކަމަށް ބުންޏެވެ.
ސަފާ އިން ބުނީ އެ ޖަމާއަތަށް ފައިސާ ދެއްކި މީހުންނަށް ދަތުރާ ގުޅުންހުރި މައްސަލަތައް ހައްލުކުރުމަށް ކުރިއަށް އޮތް ދުވަސްތަކުގައި ވަކިވަކިން ގުޅަމުންދާނެ ކަމަށެވެ.
ސަފާ އިން މިގޮތަށް އެންގި ނަމަވެސް އިސްލާމިކް މިނިސްޓްރީން ނެރުނު ބަޔާނެއްގައި ބުނެފައިވަނީ އުމްރާވެރިންގެ އަތުން އިތުރު ފައިސާ ނެގުމަކާ ނުލައި، ވީހާ ވެސް އަވަހަކަށް ރަމަޟާން މަހުގެ އުމްރާއަށް ދެވޭނެ އިންތިޒާމް ހަމަޖައްސަން އެ ކުންފުންޏަށް އަންގާފައިވާ ކަމަށެވެ.
ވިސާ ނުލިބުނު ކަމަށް ބުނެ ސަފާ ހައްޖު އެންޑް އުމްރާ ގްރޫޕުން 181 މީހުން އުމްރާއަށް ގެންދިއުން އެންމެ ފަހު ވަގުތު ކެންސަލް ކުރި މައްސަލަ ފެންމަތިވެފައިވަނީ އިއްޔެގެ ވަގުތެއްގައެވެ. އެކަން ކެންސަލް ކުރިއިރު، ބައެއް ފަރާތްތަކުން ތިބީ ފުރަން އެއާޕޯޓަށް ދާ މަގުމަތީގައެވެ. ފައިސާ ދައްކައި ކުރަން ޖެހޭ ކަންތައްކޮށް ނިމިފައި ތިބި އުމްރާވެރިންނަށް ނުފުރޭކަން އަންގައި ކުރި އެ ގްރޫޕުން ބުނީ، ވިސާގެ މައްސަލަ ހައްލުކޮށް އުމްރާއަށް ދެވޭނެ ގޮތެއް ވޭތޯ ބަލަމުންދާ ކަމަށެވެ.
ވިސާ ނުލިބޭ ކަމަށް ބުނެ ސަފާގެ ފަރާތުން އުމްރާއަށް ދިއުމަށް ތައްޔާރުވި މީހުންނަށް ނުފުރުނު ކަމަށް އެ ގްރޫޕުން ބުނި ނަމަވެސް އިސްލާމިކް މިނިސްޓްރީން ބުނީ، އެމައްސަލަ ދިމާވެފައި ވަނީ ސަޢުދީ ސަރުކާރުން ނުވަތަ ދިވެހި ސަރުކާރުން ދޭންޖެހޭ އެއްވެސް ހުއްދައެއް ނުލިބިގެން ނޫންކަމަށެވެ. އަދި ޢުމްރާ ވިސާއަކީ 3 މަސްދުވަހަށް ދުރާލާ ލިބޭ އެއްޗަކަށްވާއިރު، ކުންފުނިން އެގޮތަށް ހަމަޖައްސާފައި ނުވާކަމަށެވެ.
