ފާއިތުވެދިޔަ ދިގު ތާރީޚުގައި އެހެން އެއްވެސް ވެރިޔަކު ގދ. ރަތަފަންދޫއަށް ގެނެސް ނުދެއްވާ ތަރައްގީ ރައީސް ސާލިހުވަނީ ގެނެސްދެއްވާފައި ކަމުގައި ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރ ސައުދުﷲ އަހުމަދު ވިދާޅުވެއްޖެއެވެ.
ސައުދު ކުރެއްވި ޓުވީޓެއްގައި ވިދާޅުވީ ރަތަފަންދޫގައި ފެނާއި ނަރުދަމާގެ ނިޒާމު ގާއިމް ކުރުމުގެ އިތުރުން ގިރާ ސަރަހައްދު ހިމާޔަތް ކޮށްދީ، އައިސްޕްލާންޓް ބެހެއްޓުމުގެ އިތުރުންވެސް ތަރައްގީގެ އެތައް ޕްރޮޖެކްޓެއް މި ސަރުކާރުން ކުރިޔަށް ގެންދާކަމުގައެވެ. އެހެންކަމުން ރަތަފަންދޫގެ ގިނަ ޒުވާނުންގެ އިތުރުން އެރަށުގެ ރައްޔިތުންގެ މެޖޯރިޓީ ބޭނުންވާ ގޮތަކީ އޭނާ ރައީސަށް ތާއީދުކޮށް، ރައީސް ސާލިހަށް ދެވަނަ ދައުރެއް ދިނުންކަމުގައި ސައުދު ވިދާޅުވިއެވެ.
މި ވޭތުވެ ދިގު ތާރީހުގައި އަޅުގަނޑު އުފަން ރަށް ގދ ރަތަފަންދޫ އަށް އެއްވެސް ވެރިޔަކު ނުގެއްނަވާ ތަރައްޤީ ވަނީ ރައިސް @ibusolih ގެނެސްދެއްވާފަ.ފެނާއި ނަރުދަމާ, ގިރާސަރަހައްދު ހިމާޔައްކުރުން, އައިސޕުލާންޓް, އެތަށް ޕުރެޖެކްޓް އެއްދަނީ ހިންގަމުން.ރަތަފަންދޫ ގިނަޒުވާނުންނާއި ..
— Saudulla Ahmed (@saudullaahmed1) April 5, 2023
ރައީސް ސާލިހަށް ރިޔާސީ ދެވަނަ ދައުރެއް ދޭންޖެހޭކަމަށް ސައުދު ވިދާޅުވެފައިވާއިރު، ސަރުކާރުގެ އިސް މަގާމްތަކުގައި ތިއްބެވި ގިނަ ބޭފުޅުން ގެންދަވަނީ ކުރިޔަށް އޮތް ރިޔާސީ އިންތިޚާބަށް ރައީސް ސާލިހު އެންޑޯސް ކުރައްވަމުންނެވެ.
މިގޮތުން، ސަރުކާރުގެ އިސް މަގާމްތަކުގައި ތިއްބެވި ޖުމުހޫރީ ޕާޓީއަށް ނިސްބަތްވާ އިސް ބައެއް ބޭފުޅުން ވަނީ ރައީސް ސާލިހަށް ތާއީދުކޮށް ޕާޓީގެ މެމްބަރުކަމުން އިސްތިއުފާވެސް ދީފައެވެ. ސައުދުއަކީ ކުރިން ޖުމުހޫރީ ޕާޓީގެ މެމްބަރެކެވެ. އެހެންނަމަވެސް އޭނާވަނީ މީގެ މަހެއްހާ ދުވަސްކުރިން އެޕާޓީން ވަކިވެފައެވެ.
