ކުރިއަށް އޮތް ރިޔާސީ އިންތިހާބުގާ ވާދަކުރައްވަން އިއުލާންކޮށްފައިވާ ޖުމްހުރީ ޕާޓީގެ ކެންޑިޑޭޓު ގާސިމް އިބްރާހިމާއެކު ކޯލިޝަން ހެދުމުގެ ވިސްނުމެއް ނެތް ކަމަށް އިންތިހާބުގައި ވާދަކުރާނެކަން އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރިޔާސީ އިންތިޚާބުގައި ޖުމްހޫރީ ޕާޓީއާއިއެކު ކޯލިޝަން ހެދުމަށް ދައުވަތު ދިނުމަށް ނިންމާފައިވާ ފަރާތްތަކުގެ ތެރޭގައި އުމަރު ނަސީރުވެސް ހިމެނެއެވެ. އުމަރު ހިމެނޭހެން ޕީޕީއެމާއި އެމްއާރުއެމާއި އެމްއެންޕީއަށްވެސް ކޯލިޝަން ހެދުމުގެ ދައުވަތު ދޭން ޖޭޕީން ވަނީ ނިންމާފައެވެ.
ރިޔާސީ ރޭހަށް ނިކުންނާނެކަމަށް އެންމެ ފުރަތަމަ އިއުލާން ކުރެއްވި ބޭފުޅުންގެ ތެރޭގައި ހިމެނޭ އުމަރު ނަސީރު ގެންދަވަނީ އިންތިޚާބަށް ދުރާލައި ތައްޔާރުވަމުންނެވެ. އުމަރު ގެންދަނީ އޭނާގެ ސިޔާސަތުތަކާއި، ތަންފީޒު ކުރާނެ ކަންކަންވެސް ހާމަ ކުރަމުންނެވެ. ޖޭޕީއާއިއެކު ކޯލިޝަން ހެދުމަށް އުމަރަށް ދައުވަތު ދޭން ނިންމާފައި ނިންމުމާއި ގުޅޭގޮތުން އުމަރު ވިދާޅުވެފައިވަނީ ރަސްމީކޮށް ގާސިމްގެ ދައުވަތު އަދި ލިބިފައިނުވާކަމަށެވެ. ނަމަވެސް އެ ފަދަ ދައުވަތެއް އައިސްފި ނަމަވެސް އޭނާ ދޭނެ ޖަވާބު ވަރަށް ސާފުކަމަށެވެ.
އުމަރު ވިދާޅުވެފައިވަނީ އޭނާއަކީ އެއްވެސް މީހެއްގެ ފަހަތަށް އަރައި މަސައްކަތް ކުރާނެ މީހެއް ނޫންކަމަށެވެ. އެހެން ބޭފުޅުން އޭނާއާއެކު މަސައްކަތް ކުރައްވަން ބޭނުންވާނަމަ އެކަމަށް އޭނާ މަރުހަބާ ކިޔާނެކަމަށެވެ. އޭނާ ވިދާޅުވީ ހާލަތު ބަދަލުވެ ފަހުން އެހެން ގޮތަކަށް ކަންކަން ބަދަލުވި ނަމަވެސް އޭނާ މަސައްކަތް ކުރާނީ އިންތިޚާބު ކާމިޔާބު ކުރުމަށް ކަމަށެވެ.
ގާސިމް ފޮނުއްވި ސިޓީއަށް އެމްއެންޕީ އަދި އެމްއާރުއެމް އިން މިހާތަނަށް ޖަވާބެއް ދީފައިނުވާއިރު، ޕީޕީއެމް އިން ވަނީ ގާސިމްގެ ފަހަތަށް ނާރަނެ ކަމަށް ބުނެފައެވެ. އަދި އެމްއެންޕީންވެސް ވަނީ ޖޭޕީއާއިއެކު ފުރަތަމަ ބުރުގައި ކޯލިޝަން ނަހާދާނެކަ ބުނެފައެވެ. މިހާތަނަށް ޖޭޕީއާއިއެކު ހުރީ ރައީސް ނަޝީދުގެ ފިކުރެއްގެ ދިރުމުގެ ޓީމު އެކަންޏެވެ.
