ކޮންމެ ދާއިރާއަކަށް ބަލާލިޔަސް ޚިދުމަތުގެ މިޒާން ބުރަވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ކޮޅަށްކަމަށް ޢަދާލަތު ޕާޓީގެ ތަރުޖަމާނު އަދި ހޯމް މިނިސްޓްރީގެ ސްޓޭޓު މިނިސްޓަރ ޢަލީ ނަޒީރު ވިދާޅުވެއްޖެއެވެ.
ޢަދާލަތު ޕާޓީގެ ރައީސް އައްޝައިޚް އިމްރާން ޢަބްދުﷲ އާ ގާތް ގުޅުމެއް އޮންނަ ނަޒީރު ކުރެއްވި ޓްވީޓެއްގައި ވިދާޅުވެފައުވަނީ ޚިދުމަތުގެ މީޒާން ރައީސް ޞާލިޙުގެ ކޮޅަށް ބުރަވުމުގެ އިތުރުން ކޮންމެ މީހަކާ ރައީސް ޞާލިޙާ އަޅާ ކިޔާލިޔަސް ބުރަވަނީ ހަމަ އެމަނިކުފާނުގެ ކޮޅަށްކަމަށެވެ. އަދި އެއީ ދިވެހިރައްޔިތުން ބަލައިގެންފައި އޮތް ހަޤީގަތެއްކަމަށާ، ކުރިއަށް އޮތް ރިޔާސީ އިންތިޚާބު ކާމިޔާބުކުރާނީ އެއްބުރުންކަމަށެވެ.
ކޮންމެ ދާއިރާއަކުން ވެސް ޚިދުމަތުގެ މީޒާން ބުރަވަނީ ރައީސް އިބޫކޮޅަށް،
ކޮންމެ މީހަކާ އަޅާކިޔަސް ކުރިލިބެނީ ރައީސް އިބޫއަށް،
އެއީ ދިވެހި ރައްޔިތުން ބަލައިގެންފައި އޮތް ޙަޤީޤަތެއް،
މާތް اللهގެ ތަނަވަސް ރަޙުމަތްފުޅާއެކު އަޅުގަނޑުމެން އިންތިޚާބު ކާމިޔާބުކުރާނީ އެއްބުރުން!#Ibu2023 pic.twitter.com/TnWWSaTes8— Ali Nazeer (@alynazeer) April 2, 2023
ޢަދާލަތު ޕާޓީއަކީ ރައީސް ޞާލިޙާއެކު އަންނަ ރިޔާސީ އިންތިޚާބުގައި ކޯލިޝަންހަދަން އެންމެ ފުރަތަމަ ނިންމި ޕާޓީއެވެ. އަދި މިހާރު ހިނގަމުންދިޔާ ދައުރުގައި ރައީސް ޞާލިޙާއެކު ކޯލިޝަން ހަދާފައިވާ ޕާޓީތަކުގެ ތެރެއިން މިހާތަނަށް ކޯލިޝަން އާކުރި ހަމައެކަނި ޕާޓީއެވެ. މިހާރުގެ ސަރުކާރުގައި ހިމެނޭ ކޯލިޝަން ޕާޓީތަކުގެ ތެރެއިން އެހެން އެއްވެސް ޕާޓީއަކުން އަންނަ ރިޔާސީ އިންތިޚާބުގައި ރައީސް ޞާލިޙަށް ތާޢީދުކުރާކަށް އަދި ނުނިންމައެވެ. ޖުމްހޫރީ ޕާޓީން ވަނީ ކޯލިޝަން ނުހަދާނެކަމަށާ، ރައީސް ޞާލިޙަށް ތާޢީދުނުކުރާނެކަން ހާމަކޮށްފައެވެ. އަދި ޖުމްހޫރީ ޕާޓީގެ ޓިކެޓުގައި އެޕާޓީގެ ލީޑަރު ޤާސިމް އިބްރާހީމް ރިޔާސީ އިންތިޚާބުގައި ވާދަކުރައްވަން ވަނީ ނިންމަވައި މަސައްކަތް ފައްޓަވާފައެވެ.
އެމްޑީޕީގެ ރިޔާސީ ޕްރައިމެރީގައި ރައީސް ޞާލިޙު ވިދާޅުވި އެންމެ މުހިންމު ވާހަކައަކީ ރިޔާސީ ޓިކެޓު ރައީސް ނަޝީދަށް ލިބިވަޑައިގެންފިނަމަ މިހަރުގެ ކޯލިޝަން ޕާޓީތައް އެމްޑީޕީއާއެކު އަންނަ ރިޔާސީ އިންތިޚާބަށް ކޯލިޝަން ނުހަދާނެ ވާހަކައެވެ. ކޯލިޝަން ނުހަދައި އެމްޑީޕީއަށް އިންތިޚާބު ކާމިޔާބު ނުވާނެކަމަށާ، އެހެންކަމުން އެމްޑީޕީގެ ވެރިކަން ދަމަހައްޓަން ބޭނުންނަމަ އޮތް ޗޮއިސްއަކީ އެމަނިކުފާނުކަމަށެވެ.
