ތިލަފުށީ އިމާރާތެއްގައި ރޯވި އަލިފާންގަނޑުގެ 80 ޕަސެންޓް ކޮންޓްރޯލްކޮށްފިއެވެ.
އަލިފާނުގެ މި ހާދިސާ ހިނގައިގެން އުޅޭ ކަމަށް ރިޕޯޓުކޮށްފައި ވަނީ މެންދުރު 12:45 ގައެވެ. އެމްއެންޑީއެފުން ބުނީ ތިލަފުށީގައި ހުންނަ ސިފައިންގެ ފަޔަ ސްޓޭޝަނުން އަލިފާން ނިއްވުމުގެ މަސައްކަތް ކުރަމުން އަންނަ ކަމަށެވެ.
އެމްއެންޑީއެފްއިން ދެންމެ ބުނީ މިހާރު 80 ޕަސަންޓް އަލިފާން ކޮންޓްރޮލް ކުރެވިފައިވާކަމަށެވެ. އަދި އިތުރު ތަނަކަށް އަލިފާން ފެތުރިފައެއްނުވާ ކަމަށާއި، އަލިފާން ރޯވެފައިވަނީ 2 ބުރިއަށް ހަދާފަ ހުރި އިމާރާތެއްގައި ކަމަށް އެމްއެންޑީއެފް އިން ވަނީ ބުނެފައެވެ.
އިމާރާތުގެ ގްރައުންޑް ފްލޯރއަކީ ލަކުޑި ގުދަނެއް އަދި މަތީބައި ބޭނުން ކުރަނީ އެކޮމޮޑޭޝަން ބްލޮކެއްގެ ގޮތުގައިކަމަށާއި، މި ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާކަމަށް އެމްއެންޑީއެފްއިން ވަނީ ބުނެފައެވެ.
ތިލަފުށީގައި ރޯވެގެން ސިފައިން ހަރަކާތްތެރިވަމު އަންނަ އިރު މިދިޔަ އަހަރު ވަނީ އަލިފާނުގެ ގިނަ ހާދިސާތަކެއް ހިނގައިފަ އެވެ. އެގޮތުން ކ. ގުޅީފަޅުގައި ހުރި ބިދޭސީ މަސައްކަތްތެރިންގެ އެކޮމަޑޭޝަން ބްލޮކުގައި ރޯވެ އެކަކު މަރުވިއިރު، މާލޭގައި ބިދޭސީން ދިރިއުޅޭ ތަނެއްގައި ރޯވެ 10 މީހުން ވަނީ މަރުވެފައެވެ.
